വിദേശത്ത് നിന്ന് കുവൈറ്റിലേക്ക് മയക്കുമരുന്ന് കടത്തിയ രണ്ട് പേര്‍ അറസ്റ്റില്‍. ജഹ്റയില്‍ പ്രവര്‍ത്തിക്കുന്ന അനക്സില്‍ ലൈസന്‍സില്ലാത്ത ക്ലിനിക്ക് സ്ഥാപിക്കുകയും ഇവിടേക്ക് മയക്കുമരുന്ന് കടത്തുകയുമായിരുന്നു. മേജര്‍ ജനറല്‍ ഹമദ് അല്‍ ദവാസിന്റെ (ജഹ്റ ഇന്‍വെസ്റ്റിഗേഷന്‍സ് ഡിപ്പാര്‍ട്ട്മെന്റ്) നേതൃത്വത്തിലുള്ള ക്രിമിനല്‍ സെക്യൂരിറ്റി വിഭാഗമാണ് ഇവരെ പിടികൂടിയത്.

ഒരു വീട്ടിലെ അനെക്സ് മെഡിക്കല്‍ സെന്ററാക്കി മാറ്റിയതിന് ശേഷം അവരുടെ രാജ്യത്ത് നിന്നുള്ള രോഗികള്‍ക്ക് മരുന്നുകള്‍ സംഭരിക്കുകയും നല്‍കുകയും ചെയ്യുന്നുവെന്നാണ് അധികൃതര്‍ക്ക് വിവരം ലഭിച്ചത്. സ്ഥലത്ത് തിരച്ചില്‍ നടത്തിയപ്പോള്‍ നിയമവിരുദ്ധ പ്രവര്‍ത്തനത്തനത്തിലൂടെ നേടിയ പണത്തിന് പുറമേ, രക്തസമ്മര്‍ദ്ദം, പ്രമേഹം തുടങ്ങിയ അളക്കുന്നതിനുള്ള മെഡിക്കല്‍ ഉപകരണങ്ങളും മരുന്നുകളും കണ്ടെത്തി.