ഗൾഫ് രാജ്യങ്ങളിലേക്ക് പ്രതിദിനം നിരവധി സർവീസുകളാണ് ഇന്ത്യയുടെ ബജറ്റ് എയർലൈനായ ഇൻഡിഗോ നടത്തുന്നത്. മറ്റ് എയർലൈനുകളെ അപേക്ഷിച്ച് താരതമ്യേന കുറഞ്ഞ നിരക്കായതിനാൽ പ്രവാസികളിലേറെ പേരും യാത്രക്കായി ഇൻഡിഗോയെ ആശ്രയിക്കുന്നവരാണ്. യുഎഇ പ്രവാസികൾക്ക് പ്രത്യേകിച്ച് മലബാർ മേഖലയിൽ നിന്നുള്ളവർക്ക് കോഴിക്കോട് നിന്ന് ഇനി എല്ലാ ദിവസവും ഇൻഡിഗോയിൽ അബുദാബിയിലേക്ക് കുറഞ്ഞ നിരക്കിൽ പറക്കാം.നീണ്ട ഇടവേളയ്ക്ക് ശേഷം നിർത്തിവെച്ചിരുന്ന സർവീസ് വീണ്ടും പുനരാരംഭിക്കുകയാണ് വിമാനകമ്പനി.

ഗൾഫ് രാജ്യങ്ങളിലേക്ക് യാത്ര ചെയ്യുന്നതിൽ മലബാർ മേഖലയിൽ നിന്നുള്ളവരുടെ എണ്ണം വളരെ കൂടുതലാണ്. അതിനാൽ ഇവിടെ നിന്നുള്ള യാത്രക്കാർക്ക് സർവീസ് പുനരാരംഭിച്ചത് ഗുണം ചെയ്യും. ഈ മാസം 21 മുതലാണ് സര്‍വീസ് ആരംഭിക്കുന്നത്. പുതിയ സര്‍വീസിന് ടിക്കറ്റ് ബുക്കിങ് ആരംഭിച്ച് കഴിഞ്ഞു. തിരക്കുള്ള സീസൺ സമയമായതിനാൽ, നിരക്ക് പരിശോധിക്കുകയാണെങ്കിൽ കോഴിക്കോട് നിന്ന് അബുദാബിയിലേക്ക് 468 ദിർഹവും അബുദാബിയിൽ നിന്ന് കോഴിക്കോട്ടേക്ക് 391 ദിർഹമുമാണ് ഈ കാലയളവിലെ നിലവിലെ ഏറ്റവും കുറഞ്ഞ നിരക്ക്.

കോഴിക്കോട് നിന്ന് പുലര്‍ച്ചെ 1.55ന് പുറപ്പെടുന്ന വിമാനം അബുദാബിയില്‍ പുലർച്ചെ 4.35ന് എത്തും. തിരികെ രാവിലെ 5.35ന് അബുദാബിയിൽ നിന്ന് പുറപ്പെടുന്ന വിമാനം രാവിലെ 10.50ന് കോഴിക്കോടും എത്തും വിധമാണ് സർവീസ് ക്രമീകരിച്ചിരിക്കുന്നത്. നിലവില്‍ ഈ സര്‍വീസ് ജനുവരി 16 വരെയാണ് പ്രഖ്യാപിച്ചിട്ടുള്ളത്. ഈ റൂട്ടില്‍ യാത്രക്കാരുടെ എണ്ണം വര്‍ധിക്കുകയാണെങ്കില്‍ സര്‍വീസ് നീട്ടാനും സാധ്യത ഏറെയാണ്.

നിലവില്‍ ദുബൈയില്‍ നിന്ന് കോഴിക്കോട് വിമാനത്താവളത്തിലേക്ക് ഇന്‍ഡിഗോ സര്‍വീസുകള്‍ നടത്തുന്നുണ്ട്. പുതിയ സര്‍വീസ് വരുന്നതോടെ ഈ റൂട്ടിലെ യാത്രക്കാര്‍ക്ക് ആശ്വാസമാകും. നേരത്തെ അബുദാബിയിൽ നിന്നും ഷാർജയിൽ നിന്നും കോഴിക്കോട്ടേക്കുള്ള നേരിട്ടുള്ള സർവീസ് നടത്തിയിരുന്നു.എന്നാൽ കൊവിഡിനെ തുടർന്നാണ് ഈ സർവീസുകൾ താൽക്കാലികമായി നിർത്തിവെച്ചത്. നിലവില്‍ ദമ്മാം, ജിദ്ദ, ദുബൈ എന്നിവിടങ്ങളിലേക്കാണ് എയര്‍ലൈന്‍സ് കോഴിക്കോട് വിമാനത്താവളത്തില്‍ നിന്ന് സര്‍വീസ് നടത്തുന്നത്.