കുവൈറ്റിൽ ജോലിക്കായി എത്തിയത് കഴിഞ്ഞ വര്ഷം, കാണാതായ പ്രവാസി വാഹനാപകടത്തിൽ മരിച്ചു, മരണപ്പെട്ടതായി വിവരം ലഭിച്ചത് ആശുപത്രികൾ കേന്ദ്രീകരിച്ച് നടത്തിയ അന്വേഷണത്തിൽ...!!!
കുവൈറ്റിൽ ദിവസങ്ങളായി കാണാതായ പ്രവാസിയെ വാഹനാപകടത്തിൽ മരിച്ച നിലയിൽ കണ്ടെത്തി. തമിഴ്നാട് തൂത്തുക്കുടി സ്വദേശിയായ കുമരേശന് പെരുമാള് ആണ് മരിച്ചത്. ആശുപത്രികൾ കേന്ദ്രീകരിച്ച് നടത്തിയ അന്വേഷണത്തിലാണ് അബു ഹലീഫയില് നടന്ന വാഹനാപകടത്തില് ഗുരുതര പരിക്കേറ്റ് പ്രവേശിപ്പിച്ച കുമരേശന് മരണപ്പെട്ടതായി വിവരം ലഭിച്ചത്. അല്-ദൗ ജനറല് ട്രേഡിംഗ് ആന്ഡ് കോണ്ട്രാക്ടിംഗ് കമ്പനിയില് സേഫ്റ്റി ഓഫീസറായി ജോലി ചെയ്യുകയായിരുന്നു. കഴിഞ്ഞ വര്ഷമാണ് കുമരേശന് ജോലിക്കായി കുവൈറ്റിൽ എത്തിയത്.
ഡിസംബര് 16 മുതലാണ് കുമരേശനെ കാണാതായത്. ഇദ്ദേഹവുമായുള്ള ബന്ധം നഷ്ടപ്പെട്ടതോടെ നാട്ടിലുള്ള കുടുംബം തമിഴ്നാട് സർക്കാറിൻ്റെ സഹായം തേടി. ഇതു പ്രകാരം തമിഴ്നാട് ഫിഷറീസ് മന്ത്രി അനിത രാധാകൃഷ്ണന്, പ്രവാസി തമിഴ് ക്ഷേമ വകുപ്പ് മന്ത്രി നാസര് എന്നിവര് വിഷയത്തിൽ ഇടപെട്ട് കുവൈറ്റിലെ ഇന്ത്യൻ അധികൃതരുമായി വിഷയം സംസാരിച്ചത്. കുമരേശന്റെ തിരോധാനത്തിന്റെ വിശദാംശങ്ങള് കണ്ടെത്താൻ സാമൂഹിക പ്രവര്ത്തകർ ഉൾപ്പെടെയുള്ളവരുമായും ഏകോപിച്ച് പ്രവർത്തിച്ചിരുന്നു.
തമിഴ് എഞ്ചിനീയേഴ്സ് ഫോറത്തിന്റെ സഹായത്തോടെ, കുമരേശന്റെ തൊഴിലുടമയുമായി ബന്ധപ്പെട്ടപ്പോഴാണ് ഡിസംബര് 16 മുതല് കുമരേശനെ കമ്പനിയിലെ താമസസ്ഥലത്ത് നിന്ന് കാണാതായതായി വ്യക്തമായത്. തുടർന്ന് ആശുപത്രികൾ കേന്ദ്രീകരിച്ച് നടത്തിയ അന്വേഷണത്തിൽ വാഹനാപകടത്തില് ഗുരുതരമായി പരിക്കേറ്റ കുമരേശന് മരണത്തിന് കീഴടങ്ങിയതായി വിവരം ലഭിച്ചത്. മൃതദേഹം കുവൈറ്റ് എയര്വേയ്സ് വഴി നാട്ടിൽ എത്തിച്ചതായി ഇന്ത്യൻ എംബസി അധികൃതർ അറിയിച്ചു.
https://www.facebook.com/Malayalivartha
