സൗദിയിലെ തൊഴില്‍ പീഡനങ്ങളെക്കുറിച്ച് വീഡിയോ സന്ദേശത്തിലൂടെ പുറംലോകത്തെ അറിയിച്ച ഇന്ത്യന്‍ തൊഴിലാളിയുടെ ജീവന്‍ അപകടത്തിലെന്ന് റിപ്പോര്‍ട്ട്. സൗദിയില്‍ െ്രെഡവറായി ജോലിനോക്കുന്ന അബ്ദുള്‍ സത്താര്‍ മകണ്ഡാര്‍ (35) എന്നയാളാണ് വീഡിയോ സന്ദേശം പ്രചരിപ്പിച്ചത്. തെറ്റായ വിവരം പ്രചരിപ്പിച്ചു എന്ന കുറ്റത്തിന് ഇയാളെ സൗദി പോലീസ് അറസ്റ്റ് ചെയ്തതായാണ് പുതിയ വിവരം.
തൊഴില്‍ രംഗത്ത് താന്‍ അനുഭവിക്കുന്ന കഷ്ടതകള്‍ കരഞ്ഞുകൊണ്ട് വിവരിക്കുന്ന ദൃശ്യങ്ങളാണ് അബ്ദുള്‍ സത്താര്‍ വീഡിയോയിലൂടെ പുറത്തുവിട്ടത്. തന്നെ നാട്ടിലേക്ക് മടങ്ങാന്‍ അനുവദിക്കുന്നില്ലെന്നും ശമ്പളം തരുന്നില്ലെന്നും ആഹാരം പോലു വാങ്ങിക്കഴിക്കാന്‍ വഴിയില്ലെന്നും സന്ദേശത്തില്‍ അബ്ദുള്‍ സത്താര്‍ വ്യക്തമാക്കിയിരുന്നു. ദൃശ്യം ശ്രദ്ധയില്‍പ്പെട്ട ഡല്‍ഹിയിലെ സാമൂഹിക പ്രവര്‍ത്തകന്‍ കുന്ദര്‍ ശ്രീവാസ്തവ, അത് തന്റെ ഫേസ്ബുക്ക് പേജില്‍ ഷെയര്‍ ചെയ്തു. ഇതോടെ സൗദിയിലെ തൊഴില്‍ പീഡനത്തിന് എതിരെ ഇന്ത്യയില്‍ വ്യാപക പ്രതിഷേധവും ഉയര്‍ന്നു.
എന്നാല്‍ വീഡിയോ വൈറലായതോടെ അബ്ദുള്‍ സത്താറിന്റെ ജീവന്‍ അപകടത്തിലായെന്ന പുതിയ റിപ്പോര്‍ട്ടാണ് പുറത്തുവന്നത്. അബ്ദുള്‍ സത്താര്‍ ജയിലിലാണെന്ന് അദ്ദേഹത്തിന്റെ സുഹൃത്തുക്കള്‍ അറിയിച്ചതായി ബന്ധുക്കള്‍ വ്യക്തമാക്കി.
ഇതോടെ തന്റെ ഫേസ്ബുക്ക് പേജില്‍നിന്ന് വീഡിയോ നീക്കം ചെയ്ത ശ്രീവാസ്തവ, അതിന്റെ പേരില്‍ സത്താറിനെ ദ്രോഹിക്കരുതെന്നും വീഡിയോ വൈറലായതില്‍ താന്‍ ക്ഷമ ചോദിക്കുന്നതായും പ്രസ്താവനയിറക്കി. തുടര്‍ന്ന് സത്താറിനെ നാട്ടില്‍ തിരിച്ചെത്തിക്കണമെന്ന് ആവശ്യപ്പെട്ട് ശ്രീവാസ്തവ വിദേശകാര്യ മന്ത്രാലയത്തെ സമീപിച്ചെങ്കിലും മറുപടി ലഭിച്ചില്ലെന്നും ആരോപണമുണ്ട്. അല്‍ സുറൂര്‍ യുണൈറ്റഡ് ഗ്രൂപ്പ് എന്ന കമ്പനിയിലാണ് അബ്ദുള്‍ സത്താര്‍ ജോലിചെയ്യുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha