മലയാളികളടക്കമുള്ള പ്രവാസികള്ക്ക് ഭീഷണി; സൗദിയില് ചില്ലറ വില്പ്പന മേഖല നിയന്ത്രിക്കാന് നീക്കം
മലയാളികളടക്കം പ്രവാസികള് കൂടതലായി ജോലി ചെയ്യുന്ന ചില്ലറ വില്പ്പന സ്ഥാപനങ്ങളെ നിയന്ത്രിക്കുന്നത് സൗദി പരിഗണിക്കുന്നു. പലചരക്കു കടകള്(ബകാലകള്) അടച്ചു പൂട്ടുകയും ചെറിയ റീട്ടെയ്ല് സ്ഥാപനങ്ങള് നിയന്ത്രിക്കുകയുമാണ് ലക്ഷ്യമിടുന്നത്. ഇതിനു പകരം സൗദി പൗരന്മാര്ക്ക് വന്തോതില് തൊഴില് നല്കുന്ന വന്കിട സ്ഥാപനങ്ങള് സ്ഥാപിക്കാനാണ് നീക്കം.
ബകാലകള് അടച്ചുപൂട്ടാനായി തൊഴില് മന്ത്രാലയത്തിനു നിര്ദേശം സമര്പ്പിച്ചതായി ശൂറാ കൗണ്സില് അംഗം മുഹമ്മദ് അല് ഖനെയ്സി അറിയിച്ചു. ഒരു പ്രദേശത്ത് ഒന്നില് കൂടതല് പലചരക്കുകടകള് ഉണ്ടായിട്ട് ഒരു കാര്യവുമില്ലെന്ന് അദ്ദേഹം പറഞ്ഞു. ഇത്തരം കടകള് ചെറുതായിരിക്കും. അതിനാല് അവിടെ വനിതാവത്ക്കരണം സാധ്യമല്ല. എന്നാല് വന് കിട കടകളില് കൂടുതല് യുവാക്കള്ക്കും യുവതികള്ക്കും തൊഴില് നല്കാന് കഴിയും. തങ്ങളുടെ ശുപാര്ശ മന്ത്രാലയം സ്വീകരിച്ചതായും അത് കൂടുതല് പഠിക്കുകയാണെന്നും അദ്ദേഹം അറിയിച്ചു.
സൗദിയിലെ ബകാല, ചില്ലറ വില്പ്പന മേഖലയിലായി പത്തു ലക്ഷത്തോളം പ്രവാസികള് ജോലി ചെയ്യുന്നതായാണ് കണക്ക്. പ്രവാസികളെ മാത്രം ആശ്രയിച്ചാണ് ഇത്തരം കടകളുടെ പ്രവര്ത്തനം. ഈ അവസ്ഥ അവസാനിപ്പിച്ച് വ്യാപാര, വാണിജ്യ മേഖലയില് കൂടുതല് സൗദികള്ക്ക് തൊഴില് ലഭ്യമാക്കുകയാണ് പദ്ധതി. ബകാലകളില് തൊഴിലടുക്കാന് സ്ത്രീകളും വിദ്യാസമ്പന്നരായ യുവാക്കളും മടിക്കുന്നതായി ശൂറാ കൌണ്സില് കണ്ടെത്തിയിരുന്നു. മിക്ക ചില്ലറ വില്പ്പന സ്ഥാപനങ്ങളുടെയും ലൈസന്സ് സ്ത്രീകളുടെ പേരിലാണെന്നും കണ്ടെത്തിയിരുന്നു. ഭര്ത്താക്കന്മാര് ഉദ്യോഗസ്ഥരായതിനാല് അവര്ക്ക് കട നടത്താന് നിയമം അനുവദിക്കാത്തതിനാലാണിത്.
പ്രവാസി സമൂഹത്തെ ആശങ്കയിലാക്കുന്നതാണ് ശൂറാ കൗണ്സിലിന്റെ ശുപാര്ശ. നിതാഖത്തില് ഉള്പ്പെടുത്തി ബകാലകള്ക്ക് സൗദിവത്ക്കരണ തോത് ഏര്പ്പെടുത്തിയിട്ടുണ്ടെങ്കിലും ഇവ പൂര്ണമായും അടച്ചുപൂട്ടാനുള്ള ശുപാര്ശ ആദ്യമായാണ്. പതിനായിരകണക്കിന് മലയാളികളാണ് സൌദിയില് ബകാല അടക്കമുള്ള ചില്ലറ വില്പ്പന മേഖലയില് തൊഴിലെടുക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha