അറബി സങ്കടക്കടലില് നിന്നും മോചനം... അറബികല്യാണം കഴിച്ച് വീട്ടുജോലിക്കാരിയാക്കിയ ഇന്ത്യന് യുവതിക്ക് പുതുജന്മം
അറബികല്യാണം നടത്തി നാടുകടത്തി സൗദിയില് കൊണ്ടുവന്ന് വീട്ടുജോലിക്കാരിയാക്കിയ ഇന്ത്യന് യുവതിക്ക് മോചനം. ശൈശവവിവാഹം നടത്തിയാണ് മുംബൈക്കാരിയായ പെണ്കുട്ടിയെ കൊണ്ടു പോയത്. നീണ്ട യാതനയ്ക്കൊടുവില് ഇന്ത്യന് എംബസ്സിയുടെയും, നവയുഗം സാംസ്കാരികവേദിയുടെയും, എംബസ്സി ദമ്മാം ഹെല്പ് ഡെസ്ക്കിന്റെയും സഹായത്തോടെ, വനിതാ തര്ഹീല് (നാടുകടത്തല് കേന്ദ്രം) വഴി യുവതി നാട്ടിലേയ്ക്ക് മടങ്ങി.
മുംബൈ സ്വദേശിനിയായ മീന ഹിലാല് അല് ദജാനിനാണ് ജീവിതത്തില് ഏറെ പരീക്ഷണഘട്ടങ്ങളെ നേരിടേണ്ടി വന്നത്. പത്തു വര്ഷങ്ങള്ക്കു മുന്പ്, ഒന്പതു വയസ്സുള്ളപ്പോഴാണ് മീന ഹിലാലിനെ, ഇന്ത്യയില് വേരുകളുള്ള നാല്പതു വയസ്സുകാരനായ സൗദി പൗരന്, മുംബയില് വെച്ച് വിവാഹം കഴിയ്ക്കുന്നത്. അവര്ക്ക് പതിനെട്ടു വയസ്സ് തികഞ്ഞപ്പോള്, തെറ്റായ രേഖകള് ഉണ്ടാക്കി പ്രായം ഇരുപത്തി അഞ്ച് വയസ്സ് എന്ന് രേഖപ്പെടുത്തിയ പാസ്പോര്ട്ട് ഉണ്ടാക്കി, ഒരു ഹൗസ്മൈഡ് വിസയില് സൗദി അറേബ്യയിലെയ്ക്ക് കൊണ്ടു വന്നു.
ഭര്ത്താവിന്റെ വീട്ടില് എത്തിയ മീന ഹിലാലിന് പ്രതീക്ഷയ്ക്ക് വിരുദ്ധമായ സാഹചര്യങ്ങളാണ് നേരിടേണ്ടി വന്നത്. വേറെ ഭാര്യയും മക്കളുമുള്ള ആ അറബി, മീനയെ ശമ്പളം കൊടുക്കേണ്ട ആവശ്യമില്ലാത്ത ഒരു വീട്ടുജോലിക്കാരിയായി മാത്രമായിരുന്നു കണ്ടത്. വീട്ടുജോലികളും ചെയ്ത് അടുക്കളയില് മാത്രമായി കഴിയാനായിരുന്നു അവരോട് അയാള് കല്പ്പിച്ചത്. വിചിത്രസ്വഭാവക്കാരനായ അയാള്, ഭാര്യ എന്ന നിലയിലുള്ള എന്തെങ്കിലും പരിഗണനകളോ, അടുപ്പമോ ഒന്നും അവരോടു കാട്ടിയില്ല. ശാരീരികവും, മാനസികവുമായി അവര് തമ്മില് യാതൊരു ഭാര്യാഭര്ത്തൃ ബന്ധങ്ങളും ഉണ്ടായിരുന്നില്ല.
ഒരു വര്ഷത്തോളം അവിടെ വീട്ടുജോലിക്കാരിയായി കഴിഞ്ഞപ്പോള്, തന്റെ മാനസികനില തന്നെ തകരാറിലാകുമെന്ന് മീനയ്ക്ക് തോന്നി. ഒരു ദിവസം ഭര്ത്താവിന്റെ കണ്ണുവെട്ടിച്ചു പുറത്തു ചാടിയ അവര്, അടുത്തുള്ള പോലീസ് സ്റ്റേഷനില് പോയി സഹായം അഭ്യര്ഥിച്ചു. പോലീസുകാര് അവരെ വനിതാ തര്ഹീലില് എത്തിച്ചു. വനിതാ തര്ഹീലില് എത്തിയ നവയുഗം ജീവകാരുണ്യ പ്രവര്ത്തകയും, ഇന്ത്യന് എംബസ്സി വോളന്റീറോടും മീന ഹിലാല് സ്വന്തം ദുരവസ്ഥ വിവരിച്ച്, നാട്ടിലേയ്ക്ക് തിരികെ പോകാന് സഹായം അഭ്യര്ഥിച്ചു. അവര് വിവരങ്ങള് ഇന്ത്യന് എംബസ്സിയെ ധരിപ്പിച്ച്, മീനയുടെ കേസില് ഇടപെടാന് സമ്മതപത്രം വാങ്ങി.
മഞ്ജുവും നവയുഗം ജീവകാരുണ്യപ്രവര്ത്തകരും പല പ്രാവശ്യം മീനയുടെ ഭര്ത്താവുമായി സംസാരിച്ചു. വിവാഹ സര്ട്ടിഫിക്കറ്റും പാസ്സ്പോര്ട്ടും അയാള് തര്ഹീലില് കൊണ്ടുവന്നു മേലധികാരിയെ കാണിച്ച്, മീന തന്റെ ഭാര്യയായതിനാല് തിരികെ അയയ്ക്കില്ല എന്ന നിലപാട് ആയിരുന്നു ആദ്യം സ്വീകരിച്ചത്. എന്നാല് ബാലവിവാഹം ഇന്ത്യന് നിയമപ്രകാരം നിയമവിരുദ്ധമായതിനാല്, ആ വിവാഹ സര്ട്ടിഫിക്കറ്റിന് നിയമസാധുതയില്ല എന്നും, മീനയെ സൗദിയില് കൊണ്ട് വന്നത് ഫാമിലി വിസയില് ആല്ല, ഹൗസ്മൈഡ് വിസയില് ആണ് എന്നുള്ള വസ്തുതയും തര്ഹീല് മേലധികാരിയെ അറിയിച്ചു. വാദങ്ങള് ബോധ്യമായ മേലധികാരി മീനയുടെ താത്പര്യം എന്താണെന്നു തിരക്കി.
തനിയ്ക്ക് ഈ ബന്ധം തുടരാന് താത്പര്യം ഇല്ലെന്നും, നാട്ടിലേയ്ക്ക് തിരികെ പോകാനാണ് ആഗ്രഹമെന്നും മീന അദ്ദേഹത്തെ അറിയിച്ചു. തുടര്ന്ന് മീനയ്ക്ക് ഫൈനല് എക്സിറ്റ് നല്കി നാട്ടിലേയ്ക്ക് തിരികെ അയയ്ക്കാന് ഭര്ത്താവിനോട് തര്ഹീല് മേലധികാരി ഉത്തരവിട്ടു. ഒടുവില് മീന ഹിലാലിന്റെ എക്സിറ്റ് അടിച്ച പാസ്പോര്ട്ടും, ടിക്കറ്റും ഭര്ത്താവ് തര്ഹീലില് സമര്പ്പിച്ചു. തന്നെ സഹായിച്ച എല്ലാവര്ക്കും നന്ദി പറഞ്ഞ് മീന ഹിലാല് നാട്ടിലേയ്ക്ക് മടങ്ങി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha