ഗാര്‍ഹിക തൊഴില്‍: യുഎഇയില്‍ പുതിയ നിയമം ഉടന്‍
യുഎഇയിലുള്ള ഗാര്‍ഹിക തൊഴിലാളികളെ സംബന്ധിച്ച് പുതിയ നിയമം ഉടന്‍ നിലവില്‍വരുമെന്ന് മേജര്‍ ഉബൈദ് ബിന്‍ സുറൂര്‍ അറിയിച്ചു. ഇതു പ്രാബല്യത്തിലാകുന്നതോടെ വ്യക്തിഗത വീസയില്‍ രാജ്യത്തേക്കു വരുന്ന വീട്ടുജോലി വീസക്കാരും അവരെ രാജ്യത്തേക്കു കൊണ്ടുവരുന്ന റിക്രൂട്ടിങ് ഏജന്‍സികളും സ്‌പോണ്‍സര്‍മാരും നേരിടുന്ന ബഹുവിധ പ്രശ്‌നങ്ങള്‍ക്കു പരിഹാരമാകും. ഈ മൂന്നു വിഭാഗത്തിന്റെയും പ്രയാസങ്ങള്‍ ഒരുപോലെ പരിഗണിക്കാന്‍ താമസകുടിയേറ്റ വകുപ്പ് തയാറാണെന്ന് അദ്ദേഹം പറഞ്ഞു.
നിലവിലുള്ള പരാതികള്‍ക്കു പരിഹാരം കാണുന്നതു രേഖകള്‍ പരിശോധിച്ചായിരിക്കും. നിയമം ലംഘിക്കുന്ന സ്ഥാപനങ്ങള്‍ക്കെതിരെ സാമ്പത്തിക മന്ത്രാലയവുമായി സഹകരിച്ചാണു നടപടി സ്വീകരിക്കുക എന്നും പറഞ്ഞു. ഗാര്‍ഹിക തൊഴിലാളികളുടെ ഒളിച്ചോട്ടം, വീസ പുതുക്കാതിരിക്കുക, വൈദ്യപരിശോധന പൂര്‍ത്തിയാക്കാതെ നിയമനം നടത്തുക, തൊഴിലാളി മരിച്ചാലുള്ള നിയമനടപടികള്‍ എന്നിവ സംബന്ധിച്ചു വ്യക്തത വരുത്തുന്നതാണു പുതിയ നിയമമെന്ന് മേജര്‍ ഉബൈദ് അറിയിച്ചു.
ഗാര്‍ഹിക തൊഴിലാളികളുടെ സുരക്ഷയ്ക്കായി ഇന്‍ഷുറന്‍സ് പദ്ധതിയാണു പുതിയ നിയമത്തിലൂടെ ആവിഷ്‌കരിക്കുന്നത്. നൂറ് ദിര്‍ഹം മുതല്‍ ഓരോ തൊഴിലാളിയുടേയും പേരില്‍ വാര്‍ഷിക ഗഡു അടയ്ക്കാന്‍ ആകുന്ന വിധത്തിലാണ് ഇന്‍ഷുറന്‍സ് പദ്ധതി പ്രാവര്‍ത്തികമാക്കുക. തൊഴിലാളികള്‍ മൂലമുണ്ടാകുന്ന സാമ്പത്തിക നഷ്ടം നികത്താന്‍ ഈ തുകയാണു വിനിയോഗിക്കുക. ഈ വര്‍ഷം തന്നെ നിയമം നിലവില്‍ വരുമെന്ന് അദ്ദേഹം പറഞ്ഞു.
ദുബായില്‍ തൊഴിലാളികളെ റിക്രൂട്ട് ചെയ്യുന്നതിനായി 173 സ്ഥാപനങ്ങളുണ്ട്. ഇതില്‍ 76 സ്ഥാപനങ്ങള്‍ക്കാണു ഗാര്‍ഹിക തൊഴിലാളികളെ കൊണ്ടുവരാന്‍ പെര്‍മിറ്റുള്ളതെന്ന് മേജര്‍ ഉബൈദ് പറഞ്ഞു. പൊതുജനങ്ങളില്‍ നിന്നുള്ള പരാതികള്‍ കേള്‍ക്കാന്‍ താമസകുടിയേറ്റ വകുപ്പിന് 'ആമര്‍' എന്ന സേവന സംവിധാനമുണ്ട്. കൂടാതെ നേരിട്ടെത്തിയും അധികൃതര്‍ക്കു മുന്നില്‍ പരാതികള്‍ ബോധിപ്പിക്കാം. അവീറിലെ താമസ, കുടിയേറ്റ വകുപ്പിലും ജാഫിലിയ്യയിലെ കാര്യാലയത്തിലും പരാതി പരിഹാര കേന്ദ്രങ്ങളുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
