പണ്ടൊക്കെ ഗൾഫിൽ നിന്നും കേരളത്തിലേക്ക് വരുന്ന വിമാനങ്ങളിൽ
വെച്ച് എന്റെയൊരു സ്ഥിരം ജോലിയായിരുന്നു അടുത്തുള്ളവരുടെ ഇമിഗ്രേഷൻ ഫോറം പൂരിപ്പിച്ചു കൊടുക്കുക എന്നത്. അവർക്കൊന്നും അക്ഷരാഭ്യാസമില്ലാത്തതു കൊണ്ടല്ല മറിച്ച്, ഇമിഗ്രേഷൻ ഫോറം ഇംഗ്ളീഷിൽ മാത്രം ആയതുകൊണ്ടാണ് ഈ കുഴപ്പം വന്നത്.
എന്തിനാണ് ഈ ഫോറം ഇംഗ്ളീഷിൽ തന്നെ പൂരിപ്പിക്കണം എന്ന് നിർബന്ധം പിടിക്കുന്നത്? അല്ലെങ്കിൽ ഈ ഫോറത്തിന്റെ തന്നെ ആവശ്യമുണ്ടോ? എന്നൊക്കെ അന്നൊരിക്കൽ
ഞാൻ ചോദിച്ചിരുന്നു. ഭാഗ്യത്തിന് ഇപ്പോൾ ആ ഫോറം ഇല്ല, എന്റെ ചോദ്യം കേട്ട ആരോ ആണ് ആ തീരുമാനമെടുത്തതെന്ന് വിശ്വസിക്കാനാണ് എനിക്കിഷ്ടം. അത് കൊണ്ട് ഒരു ചോദ്യം കൂടി ചോദിക്കാം. എങ്ങാനും അടുത്ത ചക്ക ഇടുമ്പോളും മുയൽ ചത്താലോ ?
കഷ്ടം എന്തെന്നു വെച്ചാൽ ഇങ്ങോട്ടു വരുന്പോൾ ഫോറം ഇല്ലെങ്കിലും
ഇന്ത്യയിൽ നിന്നും പുറത്തേക്ക് പോകുന്പോൾ ഈ ഫോറം ഇപ്പോഴുമുണ്ട്. അതും ഇംഗ്ളീഷിൽ തന്നെ. ഇതിന്റെ രണ്ടിന്റെയും ലോജിക് എനിക്ക് പിടികിട്ടിയിട്ടില്ല. ആളുകൾ പൂരിപ്പിച്ചു കൊടുക്കുന്ന ഈ ഫോറം ആരെങ്കിലും എന്തിനെങ്കിലും ഉപയോഗിക്കുന്നുണ്ടോ?. അതുകൊണ്ട് ആർക്കെങ്കിലും എന്തെങ്കിലും ഗുണമുണ്ടോ ?. അമേരിക്ക ഉൾപ്പടെ പല രാജ്യങ്ങളിലേക്കും പുറത്തേക്ക് പോകുന്നിടത്ത് ഇമിഗ്രേഷൻ പരിശോധന പോലുമില്ല. ചെക്ക് ഇൻ ചെയ്‌താൽ പിന്നെ നേരിട്ട് സെക്യൂരിറ്റി ചെക്ക് ആണ്, നോ ഇമിഗ്രേഷൻ.
നാട്ടിലേക്ക് വരുന്പോൾ ഇമിഗ്രേഷന്റെ ഫോറം ഇല്ലാതാക്കിയപ്പോൾ
അതിലെ മിക്കവാറും ഭാഗങ്ങളെടുത്ത് കസ്റ്റംസുകാർ അവരുടെ ഫോറത്തിന്റെ നീളം ഇരട്ടിപ്പിച്ചു. ഇതിന്റെ കാര്യം അതിലും കഷ്ടമാണ്. ഈ ഫോറം ഇപ്പോൾ പലപ്പോഴും കിട്ടാറില്ല, അഥവാ കിട്ടി നമ്മൾ പൂരിപ്പിച്ചാൽ തന്നെ കസ്റ്റംസുകാർ അത് ചോദിക്കാറുമില്ല. ഇനി അഥവാ മേടിച്ചാൽ അവർ അതെന്താണ് ചെയ്യുന്നത്. കൊച്ചിയിൽ ഒരു ദിവസം ഇറങ്ങുന്നവരുടെ എണ്ണവും കിട്ടുന്ന ഫോറങ്ങളും തമ്മിൽ ആരെങ്കിലും ഒത്തു നോക്കാറുണ്ടോ ?, അതിൽ എഴുതിയിരിക്കുന്നത് ആരെങ്കിലും വായിക്കാറുണ്ടോ ?, ഇല്ലെങ്കിൽ എന്തിന് ദിവസവും പത്തു പതിനായിരം ഫോറം കൊച്ചിയിൽ മാത്രം ഇങ്ങനെ വെറുതെ പൂരിപ്പിച്ചു കളയുന്നു? ഒരു വർഷത്തിൽ എത്ര മരത്തിന്റെ കടലാസാണ് ഇതിന് വേണ്ടിവരുന്നത്. പുറമെ നിന്നും വരുന്നവരുടെ അലവൻസ് എത്രയാണെന്ന് ഒരു ലഘുലേഖ കൊടുക്കുകയും അതിൽ കൂടുതൽ ഉള്ളവർ മാത്രം ഫോറം പൂരിപ്പിച്ച് റെഡ് ചാനൽ ഉപയോഗിക്കണം എന്നും പറയുന്നതല്ലേ കൂടുതൽ പ്രായോഗികം ?
അനാവശ്യ ഫോറം പൂരിപ്പിക്കലും പരിശോധനയുമൊക്കെ ഇന്ത്യയിൽ മാത്രമല്ല കേട്ടോ. അമേരിക്കയിലേക്ക് വിസക്ക് അപേക്ഷിക്കുന്പോൾ നീണ്ട ഒരു ചോദ്യാവലി ഉണ്ട്. "നിങ്ങൾ വ്യഭിചാരിക്കാൻ ഉദ്ദേശിക്കുന്നുണ്ടോ" എന്നത് ആ ചോദ്യാവലിയിലെ ഒരു ചോദ്യത്തിന്റെ ഭാഗമാണ്. ഒരു വർഷം എത്ര ലക്ഷം പേർ അമേരിക്കൻ വിസക്ക് അപേക്ഷിക്കുന്നു എന്നും, അതിൽ ആരെങ്കിലുമൊക്കെ ഈ ചോദ്യത്തിന് "ഉണ്ട്" എന്ന് ഉത്തരം എഴുതാറുണ്ടോ എന്നും എനിക്കറിയില്ല.,

മുരളി തുമ്മാരുകുടി