പ്രവാസി കമ്മിഷന്റെ പ്രവര്ത്തനം വൈകുന്നതില് കടുത്ത അതൃപ്തി അറിയിച്ച് ചെയര്മാന് ജസ്റ്റിസ് പി.ഭവദാസന്
പ്രവാസി കമ്മിഷന്റെ പ്രവര്ത്തനം വൈകുന്നതില് കടുത്ത അതൃപ്തി അറിയിച്ച് ചെയര്മാന് ജസ്റ്റിസ് പി.ഭവദാസന് മുഖ്യമന്ത്രി പിണറായി വിജയനും നോര്ക്ക സെക്രട്ടറി ഷീലാ തോമസിനും കത്തുനല്കി. കമ്മിഷന് രൂപീകരിച്ച് എട്ടുമാസം കഴിഞ്ഞിട്ടും ഓഫിസ് സൗകര്യം പോലും ലഭിച്ചിട്ടില്ലെന്ന് കത്തില് വ്യക്തമാക്കുന്നു. നോര്ക്ക വകുപ്പിലെ ഉദ്യോഗസ്ഥരുടെ അനാസ്ഥയും കത്തില് ചൂണ്ടിക്കാട്ടുന്നു എന്നാണ് സൂചന. പ്രവാസി ഭാരതീയ ദിവസ് സമ്മേളനത്തില് പങ്കെടുക്കാന് ബെംഗളൂരുവിലായതിനാല് കത്തിനെ സംബന്ധിച്ച കാര്യങ്ങള് അറിയാന് കഴിഞ്ഞിട്ടില്ലെന്നും പരിശോധിച്ചശേഷം നടപടിയെടുക്കുമെന്നും നോര്ക്ക സെക്രട്ടറി ഷീലാ തോമസ് പറഞ്ഞു. ഏപ്രില് 26ന് കമ്മീഷന് രൂപീകരിച്ചിട്ടും തുടര്നടപടികള് സര്ക്കാരിന്റെ ഭാഗത്തുനിന്ന് ഉണ്ടാകാത്തതിനെതുടര്ന്നാണ് ഇങ്ങനൊരു കത്ത് അയക്കേണ്ടിവന്നതെന്ന് അദ്ദേഹം വ്യക്തമാക്കുന്നു. ഓഫിസും മറ്റ് അടിസ്ഥാന സൗകര്യങ്ങളും ഒരുക്കണമെന്ന് പലതവണ ആവശ്യപ്പെട്ടിട്ടും നോര്ക്ക വകുപ്പില്നിന്ന് നടപടിയുണ്ടാകുന്നില്ല. 2016 ഏപ്രില് 30ന് ചേര്ന്ന ആദ്യ യോഗത്തിനുശേഷം ഒരു യോഗംപോലും ചേരാന് കഴിഞ്ഞിട്ടില്ല. പ്രവാസികളില്നിന്നു പരാതി സ്വീകരിക്കാന് ഓഫിസ് സൗകര്യം ഇതുവരെ ഒരുക്കിയിട്ടില്ല. കമ്മിഷന്റെ ചുമതലയുള്ള നോര്ക്ക അഡി. സെക്രട്ടറിയുടെ ഫോണില് ബന്ധപ്പെടുന്നതല്ലാതെ ഒരു തുടര്നടപടിയും ഉണ്ടാകുന്നില്ലെന്നു ജസ്റ്റിസ് അറിയിച്ചു. പ്രവാസി മലയാളിയുടെ ക്ഷേമത്തിനായി രൂപീകരിച്ച കമ്മിഷനില് ജസ്റ്റിസ് ഉള്പ്പടെ ഡോ. ഷംസീര്വയലില്, സോമന് ബേബി, പിഎംഎ സലാം, കെ.ഭഗവത് സിങ് എന്നിവരായിരുന്നു അംഗങ്ങള്. പ്രവാസി ക്ഷേമത്തിനാവശ്യമായ പരിഹാര മാര്ഗങ്ങള് നിര്ദേശിക്കുക, നിക്ഷേപങ്ങള് സംരക്ഷിക്കാന് സഹായിക്കുക, ജീവനും സ്വത്തിനും സംരക്ഷണം നല്കുക, റിക്രൂട്ട്മെന്റ് ഏജന്സികളുടെ ന്യായമല്ലാത്ത പ്രവര്ത്തനങ്ങളെക്കുറിച്ചു അന്വേഷിച്ച് നടപടിയെടുക്കുക തുടങ്ങിയ കാര്യങ്ങള്ക്കായാണ് പ്രവാസി കമ്മിഷന് രൂപീകരിച്ചത്.
https://www.facebook.com/Malayalivartha