ഡോളറുമായുള്ള വിനിമയനിരക്കില്‍ രൂപ ശക്തമായ മുന്നേറ്റം നടത്തിയതാണ് ദിര്‍ഹവുമായുള്ള വിനിമയനിരക്കില്‍ ഇടിവ് സംഭവിക്കാന്‍ കാരണം. പ്രമുഖ എക്‌സ്‌ചേഞ്ചുകളില്‍ ഒരു ദിര്‍ഹത്തിന് 17.87 രൂപയായിരുന്നു ഇന്നലത്തെ നിരക്ക്. 1000 രൂപ നാട്ടിലെത്താന്‍ വേണ്ടത് 56.25 ദിര്‍ഹം. സമീപകാലത്ത് ആദ്യമായാണു ദിര്‍ഹത്തിന്റെ വിനിമയനിരക്ക് 18 രൂപയില്‍ താഴെയാകുന്നത്. ഇന്നലെ രാവിലെ മുതല്‍ വൈകുംവരെ ഒരേ നിരക്കിലായിരുന്നു രൂപയെന്ന് എക്‌സ്‌ചേഞ്ച് വൃത്തങ്ങള്‍ പറഞ്ഞു. ഗുണപരമായ ഈ മാറ്റം പ്രവാസികളെ സംബന്ധിച്ചിടത്തോളം അത്ര സന്തോഷകരമല്ല. പലരും ശമ്പളം ഇതിനോടകം അയച്ചുകഴിഞ്ഞതിനാല്‍ ഇതു ബാധിച്ചില്ല. നിരക്കിലെ വ്യത്യാസം അറിയാന്‍ പലരും എക്‌സ്‌ചേഞ്ചുകളില്‍ വിളിച്ച് അന്വേഷിക്കുന്നുണ്ടായിരുന്നു.

രൂപ കരുത്താര്‍ജിക്കാന്‍ വഴിയൊരുക്കിയത് ഇന്ത്യയിലെ തിരഞ്ഞെടുപ്പുഫലമാണ്. കേന്ദ്രസര്‍ക്കാരിന്റെ കര്‍മപരിപാടികള്‍ വിജയപ്രദമാകുമെന്ന പ്രതീക്ഷ പരത്താന്‍ നിലവിലുള്ള രാഷ്ട്രീയ സൂചനകള്‍ വഴിയൊരുക്കുന്നതായി സാമ്പത്തിക നിരീക്ഷകര്‍ ചൂണ്ടിക്കാട്ടുന്നു. ഓഹരി സൂചികയിലെ കുതിപ്പ്, നേരിട്ടുള്ള വിദേശനിക്ഷേപം, ഇന്ത്യന്‍ ഓഹരികളില്‍ വിദേശധനകാര്യസ്ഥാപനങ്ങള്‍ കൂടുതല്‍ താല്‍പര്യം കാട്ടുമെന്ന പ്രതീക്ഷ തുടങ്ങിയവ രൂപയ്ക്ക് അനുകൂലഘടകങ്ങളായി വിലയിരുത്തപ്പെടുന്നു. പ്രവാസികള്‍ക്ക് നിരാശതോന്നാമെങ്കിലും ഇതു ഗുണപരമായ മാറ്റമാണ്. ഭാവിയില്‍ പണപ്പെരുപ്പവും ചെലവും കുറയാന്‍ ഇതു സഹായകമായേക്കാം.