ദുബായില്‍ മലയാളികളടക്കം 17 പേരുടെ മരണത്തിനിടയാക്കിയ ബസ് അപകടത്തില്‍ കുറ്റ സമ്മതം നടത്തി ഒമാന്‍ സ്വദേശിയായ ബസ് ഡ്രൈവര്‍. അപകടത്തിനു കാരണം തന്റെ പിഴവാണെന്ന് ബസ് ഡ്രൈവര്‍ മൊഴി നല്‍കിയതായി എമിറേറ്റ്‌സ് ട്രാഫിക് പ്രോസിക്യൂഷന്‍ ജനറല്‍ സലാ ബ ഫറൂഷാ അല്‍ ഫെലസി പറഞ്ഞു. കേസില്‍ ജൂലൈ ഒന്‍പതിനു കോടതി വാദം കേള്‍ക്കും.

നിരവധി വകുപ്പുകള്‍ ചുമത്തിയാണ് ബസ് ഡ്രൈവറുടെ പേരില്‍ കേസെടുത്തിട്ടുള്ളത്. അപകടത്തില്‍ മരിച്ചവരുടെ ആശ്രിതര്‍ക്ക് 34 ലക്ഷം ദിര്‍ഹം ബ്ലഡ് മണിയായി നല്‍കണമെന്നാണ് ദുബായ് ട്രാഫിക് പ്രോസിക്യൂഷന്‍ ആവശ്യപ്പെട്ടിരിക്കുന്നത്.
ജൂണ്‍ ആറിനാണ് അപകടം നടന്നത്. ഒമാനില്‍ ഈദ് അവധി ആഘോഷിച്ച് മടങ്ങിയവരാണ് അപകടത്തില്‍പ്പെട്ടത്. വിവിധ രാജ്യങ്ങളില്‍ നിന്നുള്ള 31 യാത്രക്കാര്‍ ബസില്‍ ഉണ്ടായിരുന്നു.