ഭര്‍ത്താവുമായി പിണങ്ങി ആത്മഹത്യയ്ക്ക് ശ്രമിച്ച മലയാളി യുവതി പോലീസ് കസ്റ്റഡിയില്‍. കഴിഞ്ഞദിവസമാണ് സംഭവം. കണ്ണൂര്‍ സ്വദേശിനിയായ യുവതിയാണ് ഷാര്‍ജയില്‍ ആത്മഹത്യയ്ക്ക് ശ്രമിച്ചത്. ഭര്‍ത്താവ് ജോലിക്ക് പോയിട്ട് തിരികെ വരാന്‍ വൈകിയതിനെത്തുടര്‍ന്ന് യുവതി ഭര്‍ത്താവിനെ ഫോണില്‍ വിളിച്ചു. എന്നാല്‍ ജോലി തിരക്കാണെന്നും അല്‍പം വൈകുമെന്നും ഭര്‍ത്താവ് മറുപടി നല്‍കി.

എന്നാല്‍ അവിടെക്കിടന്ന് ജോലി ചെയ്‌തോ താനിപ്പോള്‍ മരിക്കും എന്നായിരുന്നു യുവതിയുടെ പ്രതികരണം. ഭര്‍ത്താവ് തമാശയായി കരുതി കാര്യമാക്കിയില്ല. പക്ഷെ ജോലി കഴിഞ്ഞ് വീട്ടില്‍ എത്തിയപ്പോള്‍ രക്തത്തില്‍ കുളിച്ചു അബോധാവസ്ഥയില്‍ കിടക്കുന്ന ഭാര്യയെയാണ് കണ്ടത്. ഭര്‍ത്താവ് ഉടന്‍തന്നെ ഇവരെ അടുത്തുള്ള ആശുപത്രിയില്‍ പ്രവേശിപ്പിച്ചു.

യുവതി ആദ്യം വീട്ടില്‍ ഇരുന്ന മദ്യത്തില്‍ ഉറക്കഗുളിക ഇട്ടു കഴിക്കുകയായിരുന്നു. എന്നിട്ടും ഒന്നും സംഭവിക്കുന്നില്ല എന്ന് കണ്ടപ്പോഴാണ് കൈയിലെ ഞരമ്പ് മുറിച്ചതെന്ന് യുവതി പറഞ്ഞു. ആശുപത്രി അധികൃതരാണ് വിവരം പോലീസിനെ അറിയിച്ചത്. പോലീസ് കസ്റ്റഡിയില്‍ ആയെങ്കിലും ഭാര്യയുടെ ജീവന്‍ തിരിച്ചുകിട്ടിയ ആശ്വാസത്തിലാണ് ഭര്‍ത്താവ്.