കാലിക്കറ്റ് സര്‍വകലാശാലാ അത്‌ലറ്റിക് മീറ്റില്‍ ഹാമര്‍ത്രോയിലെ റെക്കോര്‍ഡ് സ്വര്‍ണം നേടിയ കൊടകര സഹൃദയ കോളജിലെ എംഎ വിദ്യാര്‍ഥി രാഹുല്‍ സുഭാഷിന്റെ വിജയത്തിന് ഇരട്ടിമധുരം. ട്രാക്കിലെ പ്രണയസാഫല്യത്തിന്റെ മൂന്നാം വാര്‍ഷികദിനത്തിലാണ് രാഹുലിന് റെക്കോര്‍ഡ് നേട്ടം സ്വന്തമായത്. കായികതാരം കൂടിയായ ഭാര്യ അനുവിനുള്ള മൂന്നാം വിവാഹ വാര്‍ഷിക സമ്മാനമാണ് റെക്കോര്‍ഡ് സ്വര്‍ണനേട്ടമെന്ന് രാഹുല്‍ പറഞ്ഞു.

ട്രാക്കില്‍ പരിചയപ്പെട്ട് ഏറെ വെല്ലുവിളികള്‍ മറികടന്നാണ് ഇവര്‍ വിവാഹിതരായത്.അനു കോഴിക്കോട് ഈസ്റ്റ്ഹില്‍ ഫിസിക്കല്‍ എജ്യൂക്കേഷന്‍ കോളജ് വിദ്യാര്‍ഥിനിയാണ്. ഒഴിവുദിവസങ്ങളില്‍ രാഹുല്‍ കൂലിപ്പണിക്കുപോയാണ് ജീവിതവും പരിശീലനവും മുന്നോട്ടുകൊണ്ടുപോകുന്നത്. സ്വന്തമായി വീടില്ല. അമ്മയ്ക്കും സഹോദരനുമൊപ്പം ഇരിങ്ങാലക്കുടയിലെ വാടകവീട്ടിലാണ് താമസം.

ഹാമര്‍ത്രോയില്‍ തന്റെ തന്നെ റെക്കോര്‍ഡ് തകര്‍ത്ത് സ്വര്‍ണം നേടിയതിനെക്കാള്‍ വലിയൊരു സന്തോഷംകൂടിയുണ്ട് ഇത്തവണ രാഹുലിന്. രാഹുല്‍ പരിശീലിപ്പിച്ച് കളത്തിലിറക്കിയ അനുജന്‍ ഗോകുലിനാണ് ഈയിനത്തില്‍ രണ്ടാം സ്ഥാനം. ജ്യേഷ്ഠന്‍ 50.33 മീറ്റര്‍ എറിഞ്ഞപ്പോള്‍ അനുജന്‍ 44.39 മീറ്ററിന്റെ ദൂരം കണ്ടെത്തി. 5 തവണ യൂണിവേഴ്‌സിറ്റി ചാംപ്യനായ ഈ ഇരുപത്തിനാലുകാരന്‍ ഇനി ഒരു ജോലി കണ്ടെത്താനുള്ള ശ്രമത്തിലാണ്.