പരിമിതികളെ കീഴ്പ്പെടുത്തി മുന്നേറുന്ന 'നോട്ട്ബുക്ക്ബോയ്'!
തായ്വാനിലെ തായ്പേയ് സ്വദേശിയായ ചെന് ഹോംഗ് ഷീ എന്ന 26-കാരന്റെ ഓര്മയില് കഴിഞ്ഞ 5 മുതല് 10 മിനിട്ടു വരെയുള്ള കാര്യങ്ങള് മാത്രമേ നില്ക്കുകയുള്ളു. ഒമ്പത് വര്ഷങ്ങള്ക്കു മുമ്പ് നടന്നൊരു വാഹനാപകടമാണ് അവന്റെ ജീവിതത്തെ മാറ്റി മറിച്ചത്. അപകടത്തിനു ശേഷം ചെന്നിന് വളരെ കുറച്ചുള്ള സംഭവങ്ങള് മാത്രമേ ഓര്മയില് നില്ക്കുകയുള്ളു. മസ്തിഷ്ക്കത്തിനേറ്റ പരിക്കാണ് ഈ പ്രശ്നത്തിന് കാരണമായത്.
ഓരോ ദിവസവും നടക്കുന്ന കാര്യങ്ങള് കൈവശമുള്ള നോട്ട് ബുക്കില് കുറിച്ചു വെച്ചാണ് ചെന് തന്റെ ഓര്മകള് നിലനിര്ത്തുന്നത്. ഓരോ ദിവസവും താന് ആരയൊക്കെ സഹായിച്ചു, എത്രമാത്രം ജോലി ചെയ്തു തുടങ്ങിയ കാര്യങ്ങളാണ് ചെന് കുറിച്ചു സൂക്ഷിക്കുന്നത്.
തായ്വാനിലെ സിന്ചു കൗണ്ടിയിലെ ഒരു കുഗ്രാമത്തില് 65-വയസുകാരിയായ രണ്ടാനമ്മയ്ക്കൊപ്പമാണ് ചെന് താമസിക്കുന്നത്. നാല് വര്ഷങ്ങള്ക്കു മുമ്പ് ചെന്നിന്റെ അച്ഛന് മരണമടഞ്ഞു. തുടര്ന്ന് സര്ക്കാരില് നിന്നും ലഭിക്കുന്ന ചെറിയ പെന്ഷന് തുകയും വീടിനു സമീപമുള്ള കൃഷിയില് നിന്നുമുള്ള വരുമാനവുമാണ് ചെനിന്റേയും രണ്ടാനമ്മയുടെയും ഉപജീവനമാര്ഗം.
കൈവശം എപ്പോഴും ബുക്ക് കൊണ്ടു നടക്കുന്നതിനാല് നോട്ട്ബുക്ക് ബോയ് എന്ന വിളിപ്പേരിലാണ് ചെന് ഗ്രാമത്തില് അറിയപ്പെടുന്നത്. ചെനിന്റെ മസ്തിഷ്ക്കത്തിനേറ്റ ക്ഷതം ഭേദമാകുന്നുണ്ടെന്നാണ് ചികിത്സിക്കുന്ന ഡോക്ടര് പറയുന്നത്. പഴയ ജീവിതത്തിലേക്കു മടങ്ങി വരുവാന് ചെന് നടത്തുന്ന പരിശ്രമം ഏറെ അഭിനന്ദനാര്ഹവുമാണെന്ന് അദ്ദേഹം കൂട്ടിച്ചേര്ത്തു. നോട്ട് ബുക്കില് കുറിച്ചു വച്ച വിവരങ്ങളുടെ അടിസ്ഥാനത്തില് ചെന് നഷ്ടപ്പെട്ടു പോയ മൊബൈല് ഫോണ് കണ്ടെത്തിയിട്ടുണ്ട്.
https://www.facebook.com/Malayalivartha