സാഹസികവിനോദങ്ങള്‍ക്ക് അങ്ങനെ പേര് പറയുന്നത് തന്നെ അത് ജീവന് അപകടമുണ്ടാക്കാന്‍ സാദ്ധ്യത ഉള്ളതിനാലാണ്. അതുകൊണ്ട് തന്നെ അത്തരം വിനോദങ്ങളില്‍ ഏര്‍പ്പെടുന്നവര്‍ സുരക്ഷാക്രമീകരണങ്ങളൊക്കെ യഥാവിധി പാലിച്ചിട്ടുണ്ടോ എന്ന് ഡബിള്‍ചെക്ക് ചെയ്യേണ്ടതുണ്ട്.

ജീവന്‍ മുറുകെ പിടിച്ചുകൊണ്ടുള്ള അത്തരമൊരു യാത്രയുടെ വിഡിയോ പങ്കുവെച്ചിരിക്കുകയാണ് ക്രിസ് ഗര്‍സ്‌കി എന്ന യൂട്യൂബര്‍. ഫ്‌ലോറിഡയിലാണ് സംഭവം.

ആകാശത്ത് കൂടി പറക്കുന്ന ഹാങ്ങ് ഗ്ലൈഡിങ്ങ് സാഹസത്തിന്റെ വിഡിയോ അനുഭവം പകര്‍ത്താന്‍ എത്തിയതാണ് ക്രിസ് ഗര്‍സ്‌കി. ഹെല്‍മെറ്റും ബെല്‍റ്റും എല്ലാം കൃത്യമായി ധരിച്ചു. ആദ്യമായി പറക്കുന്ന ഗര്‍സ്‌കിയെ , ഹാങ്ങ് ഗ്ലൈഡ് ചെയ്യാന്‍ ഉപയോഗിക്കുന്ന ഇരുമ്പ് ദണ്ഡുമായി കൂട്ടികെട്ടാന്‍ ഒപ്പമുണ്ടായിരുന്ന പൈലറ്റ് പക്ഷേ മറന്നുപോയി.

ഹാങ്ങ് ഗ്ലൈഡര്‍ പറന്ന് ഉയരാന്‍ തുടങ്ങിയപ്പോഴാണ് അപകടം തിരിച്ചറിഞ്ഞത്. ഇരുമ്പ് ദണ്ഡില്‍ തൂങ്ങിപിടിച്ചും പൈലറ്റിന്റെ ഷര്‍ട്ടില്‍ പിടിച്ചും ഏകദേശം രണ്ട് മിനിട്ടോളം ഗര്‍സ്‌കി പറന്നു. അത്യാവശ്യം നല്ല ഉയരത്തില്‍ തന്നെയാണ് ഗര്‍സ്‌കി ഇപ്രകാരം പറന്നത്.

പിടിവിട്ടുപോയിരുന്നെങ്കില്‍ വന്‍ദുരന്തം സംഭവിക്കുമായിരുന്നു. തെറ്റുപറ്റിയെങ്കിലും പൈലറ്റ് കഴിയുന്നതും വേഗം ഒരു പുല്‍തകിടിയിലേക്ക് ഹാങ്ങ്‌ഗ്ലൈഡ് ഇറക്കി ജീവന്‍ രക്ഷിച്ചു.