ഇച്ഛാശക്തി കൊണ്ടു വിധിയെ തോല്‍പ്പിക്കാമെന്ന പാഠമാണ് പാലക്കാട് ആലത്തൂര്‍ കാട്ടുശ്ശേരി നരിയംപറമ്പ് ഗോവിന്ദന്‍ കുട്ടിയുടെ ജീവിതം. ഇടതുകൈ മാത്രമുള്ള ഗോവിന്ദന്‍ കുട്ടിയുടെ ഉപജീവനമാര്‍ഗ്ഗം വിറകു വെട്ടല്‍ ആണെന്ന് പറഞ്ഞാല്‍ വിശ്വസിക്കുമോ? തളരുന്നവന്റേതല്ല പൊരുതുന്നവന്റേതാണ് ലോകമെന്നു ഗോവിന്ദന്‍ കുട്ടി വീണ്ടും തെളിയിക്കുന്നു.

1999 മുതല്‍ 2015 വരെ തുടര്‍ച്ചയായി ലോക ഭിന്നശേഷി ദിനത്തില്‍ നടത്തുന്ന ജില്ലാ കായിക മേളയില്‍ ഷോട്പുട്ടില്‍ ഒന്നാം സ്ഥാനക്കാരന്‍ ഗോവിന്ദന്‍കുട്ടിയായിരുന്നു. പിന്നീടു മല്‍സര രംഗത്തുനിന്നു മാറി. 1996-ല്‍ തിരുപ്പൂരിലുണ്ടായ ട്രെയിന്‍ അപകടത്തിലാണു വലതു കൈ നഷ്ടമായത്. രണ്ടു മാസത്തോളം തൃശൂരിലെ സ്വകാര്യ ആശുപത്രിയില്‍ ചികില്‍സ.

കൈ മുറിച്ചുനീക്കണമെന്ന് ഡോക്ടര്‍ പറഞ്ഞപ്പോള്‍ മനസ്സു പിടഞ്ഞു. ഡോക്ടറുടെ ഉപദേശങ്ങളൊന്നും സമാധാനം പകര്‍ന്നില്ല. ഒടുവില്‍ മനസ്സിനെ വശപ്പെടുത്തി പണിയെടുക്കാന്‍ തുടങ്ങി. 500 കിലോ വിറക് ഒരു ദിവസം വെട്ടിത്തീര്‍ക്കും. മൂന്നു സെന്റ് സ്ഥലത്തെ വീട്ടില്‍ തനിച്ചാണു താമസം. ഷോട്പുട്ടില്‍ സജീവമായിരുന്ന കാലത്തു പരിശീലനത്തിനും സമയം കണ്ടെത്തിയിരുന്നു.