കടുത്ത അതിര്ത്തി തര്ക്കം തന്നെ കാരണം! കടല്ത്തീരത്ത് ഗ്രീന് മാമ്പകളുടെ കടുത്ത പോരാട്ടം; കൗതുകകരമായ ദൃശ്യങ്ങള്
കടല്ത്തീരത്തെത്തിയവര്ക്ക് കൗതുകമായി ഗ്രീന് മാമ്പകളുടെ പോരാട്ടം. പതിവുപോലെ രണ്ട് ആണ് മാമ്പകള് തമ്മിലുള്ള അതിര്ത്തി തര്ക്കമാണ് ഇവിടെയും അരങ്ങേറിയത്. മാമ്പകളുടെ അതിര്ത്തിയില് മറ്റ് ആണ്മാമ്പകള് പ്രവേശിച്ചാല് പോരാട്ടം ഉറപ്പാണ്. പോരാട്ടത്തില് പരാജയപ്പെടുന്ന മാമ്പ അതിര്ത്തിവിട്ട് പോകുന്നതുവരെ പോരാട്ടം തുടരും.
ഗ്രീന് മാമ്പകളുടെ പോരാട്ട ദൃശ്യങ്ങള് പകര്ത്തിയത് കോര്ലെറ്റ് വെസ്സല് എന്ന യുവതിയാണ്. ഏകദേശം 45 മിനിട്ടോളം ഇവയുടെ പോരാട്ടം നീണ്ടു നിന്നെന്ന് കോര്ലെറ്റ് വെസ്സല് വിശദീകരിച്ചു. തീരത്തെ പൂഴിമണലില് പിണഞ്ഞു കിടന്നായിരുന്നു പോരാട്ടം. പാമ്പുകള് പരസ്പരം കീഴ്പെടുത്താന് ശ്രമിക്കുന്ന കാഴ്ച അഞ്ചു മീറ്ററോളം മാറിനിന്നാണ് കോര്ലെറ്റ് വെസ്സലും കൂട്ടരും ചിത്രീകരിച്ചത്.
തെക്കുകിഴക്കന് ആഫ്രിക്കന് തീരങ്ങളില് കാണപ്പെടുന്ന അതീവ വിഷമുള്ള പാമ്പുകളാണ് ഗ്രീന് മാമ്പകള്. മരത്തിനു മുകളില് കൂടി അനായാസം സഞ്ചരിക്കാന് ഇവയ്ക്കു കഴിയും ഈസ്റ്റ് ആഫ്രിക്കന് ഗ്രീന് മാമ്പയെന്നും വൈറ്റ് മൗത്ത്ഡ് മാമ്പയെന്നും ഇവ അറിയപ്പെടുന്നു. ഈ വിഭാഗത്തില് പെട്ട പെണ് മാമ്പകള്ക്ക് ആറര അടിയിലധികം നീളമുണ്ടാകും.
പക്ഷികളും വവ്വാലുകളും പക്ഷിമുട്ടകളും എലിയുമൊക്കെയാണ് ഇവയുടെ പ്രധാന ആഹാരം. മനുഷ്യരുടെ സാമീപ്യം കണ്ടാല് ഒഴിഞ്ഞുമാറുന്നവരാണ് ഗ്രീന് മാമ്പകള്. അതുകൊണ്ടുതന്നെ ഇവയെ അപൂര്വമായി മാത്രമേ കാണാന് സാധിക്കാറുമുള്ളൂ.
സാധാരണയായി തന്റെ ആവാസ പരിധിയില് അതിക്രമിച്ചു കടക്കുന്നവരെ ആണ് മാമ്പകള് തുരത്തിയോടിക്കുക പതിവാണ്. പെണ് മാമ്പകളുടെ മുന്നില് ശക്തി തെളിച്ച് ഇണചേരാനായും ആണ് മാമ്പകള് പോരാടാറുണ്ട്. അത്തരത്തിലുള്ള പോരാട്ടമാകാം ഇതെന്നാണ് നിഗമനം. അങ്ങനെയെങ്കില് സമീപത്തെവിടെയെങ്കിലും പെണ് മാമ്പ പതിയിരിക്കുന്നുണ്ടാവുമെന്നും പാമ്പുകളെക്കുറിച്ചു പഠനം നടത്തുന്നവര് പറയുന്നു.
https://www.facebook.com/Malayalivartha
