കുറ്റം ചെയ്താല്‍ ശിക്ഷ കിട്ടും. പിഴയോ തടവോ വധശിക്ഷയോ വരെ കിട്ടാം. എന്നാല്‍ ഇവിടെ ശിക്ഷ ആജീവനാന്ത ദാമ്പത്യമാണ്. ഇത് ഏതെങ്കിലും വിദേശരാജ്യത്തെ ശിക്ഷാരീതിയൊന്നുമല്ല, നമ്മുടെ കൊച്ചു കേരളത്തിലാണ് സംഭവം. കുറ്റപത്രത്തിന്റെ രൂപത്തില്‍ അച്ചടിച്ച വിവാഹക്ഷണക്കത്ത് ശ്രദ്ധേയമായി.

തൃശൂര്‍ ജില്ലയിലെ ചാലക്കുടി സ്വദേശികളായ അക്ഷയ്കുമാറിന്റെയും ആതിരയുടെയും വിവാഹക്ഷണക്കത്ത് എല്ലാവരേയും അദ്ഭുതപ്പെടുത്തിയിരുന്നു. ഒരു കുറ്റപത്രം മോഡലില്‍ ഒരുക്കിയ കിടിലന്‍ ക്ഷണക്കത്തില്‍ കുറ്റവും ശിക്ഷയും നടപടികളുമൊക്കെയുണ്ടായിരുന്നു. ചെയ്ത കുറ്റം എന്നതാണെന്നു പറഞ്ഞുകേള്‍ക്കുമ്പോള്‍ തന്നെ മനസ്സിലാവും, പ്രണയവിവാഹം ആണെന്ന്! ഹൃദയം കവര്‍ച്ച ചെയ്തതിന്റെ കുറ്റപത്രമാണത്രേ. ഇതിനു ശിക്ഷയായാണ് ആജീവനാന്ത ദാമ്പത്യം വിധിച്ചത്. 2019 മാര്‍ച്ച് 17 ഞായര്‍ 10.30 നും 11.30 നും ഇടയില്‍ രണ്ടാം പ്രതിയായ വധുവിന്റെ ഭവനത്തില്‍ വച്ചാണ് ശിക്ഷ നടപ്പിലാക്കുന്നത് എന്നും അറിയിച്ചിരുന്നു.

ഇങ്ങനെ വേദിയും സമയവും സല്‍ക്കാര വിവരങ്ങളും ഈ ക്ഷണക്കത്തില്‍ ഉള്‍പ്പെടുത്തിയിട്ടുണ്ട്. വ്യത്യസ്ത ആശയവുമായി എത്തിയ ക്ഷണക്കത്ത് സമൂഹമാധ്യമങ്ങളില്‍ വൈറലായിരുന്നു.