ഒരു സിനിമയില്‍, 'നടി കുളത്തിലേക്കു ചാടുകയാണല്ലോ, ക്യാമറയും ഒപ്പം ചാടട്ടേ..' എന്നു ശ്രീനിവാസന്‍ പറഞ്ഞതു വെഡിങ് ഫൊട്ടോഗ്രഫിയുടെ കാര്യത്തില്‍ അച്ചട്ടാകുന്നു! കല്യാണം കഴിഞ്ഞാല്‍ ഫോട്ടോ ഷൂട്ടിനു പച്ചപ്പും ഹരിതാഭയും തേടി പോയിരുന്ന വധൂവരന്മാര്‍ ഇപ്പോള്‍ സ്വിമ്മിങ് പൂളിലേക്കു ചാടുകയാണ്. ക്യാമറയും ഒപ്പം ചാടും. കാഞ്ചീപുരം സാരിയും സ്വര്‍ണാഭരണങ്ങളുമണിഞ്ഞ വധുവും തൂവെള്ള മുണ്ടും ഷര്‍ട്ടും വേഷ്ടിയുമണിഞ്ഞ വരനും ജലനീലിമയില്‍ കാന്‍വാസിലെന്ന പോലെ ഫോട്ടോയ്ക്കു പോസ് ചെയ്യുന്നതാണ് പുതിയ ട്രെന്‍ഡ്.

പലരുടെയും മനസ്സില്‍ അനിമല്‍ പ്ലാനറ്റ് ചാനലിലെ കടല്‍ ഡൈവിങ് ദൃശ്യങ്ങളാണ് അണ്ടര്‍ വാട്ടര്‍ ഫൊട്ടോഗ്രഫിയെന്നു കേള്‍ക്കുമ്പോള്‍ ഓര്‍മ വരിക. എന്നാല്‍, വെള്ളത്തിനടിയിലെ കല്യാണ ഫൊട്ടോഗ്രഫിക്ക് ഇതുമായി ഒരു ബന്ധവുമില്ല. ഓക്‌സിജന്‍ മാസ്‌ക് ധരിച്ച് വെള്ളത്തിനടിയിലേക്ക് ഊളിയിടുന്ന ഏര്‍പ്പാടല്ലിത്. 5 അടിയില്‍ താഴെ മാത്രം താഴ്ചയുള്ള സ്വിമ്മിങ് പൂളുകളിലാണ് ഫോട്ടോഷൂട്ട് നടക്കുക. വരനും വധുവിനും നീന്താതെ സുഖമായി നില്‍ക്കാം.

ഒരു മണിക്കൂര്‍ വെള്ളത്തില്‍ നിര്‍ത്തി മുങ്ങിയും പൊങ്ങിയും ശ്വാസം നിയന്ത്രിച്ചും ശരീരത്തെ ശാന്തമാക്കിയ ശേഷമേ ഫോട്ടോഷൂട്ട് ആരംഭിക്കൂ. ഒരു മണിക്കൂറോളം നീണ്ട പല ശ്രമങ്ങളിലൂടെ കൂടുതല്‍ നേരം ശ്വാസം പിടിച്ചുവയ്ക്കാന്‍ ശരീരം പര്യാപ്തമാകും. പിന്നെ പടമെടുപ്പ് എളുപ്പം.

അണ്ടര്‍ വാട്ടര്‍ ഫൊട്ടോഗ്രഫിക്കു പ്രത്യേക ക്യാമറയൊന്നും വേണമെന്നില്ല. നമ്മുടെ നാട്ടിലെ ഫൊട്ടോഗ്രാഫര്‍മാര്‍ സാധാരണ ഉപയോഗിക്കുന്ന ഡിഎസ്എല്‍ആര്‍ ക്യാമറ ധാരാളം. വെള്ളത്തിനടിയില്‍ സുരക്ഷിതമായി ക്യാമറ ഉപയോഗിക്കാന്‍ വാട്ടര്‍ പ്രൂഫ് കിറ്റുകള്‍ സഹായിക്കും. ക്യാമറ ബോഡിക്കും ലെന്‍സിനും പ്രത്യേക കവറുകള്‍ ആണ് ഉപയോഗിക്കുക. പൊട്ടാത്ത, വെള്ളം കയറാത്ത വിദേശനിര്‍മിത മികച്ച കിറ്റുകള്‍ക്ക് ശരാശരി ഒന്നര ലക്ഷം രൂപ മുതല്‍ മുകളിലേക്കാണ് വില.

പലപ്പോഴും വെഡിങ് ഫോട്ടോഷൂട്ട് നടത്തുന്നത് പൂമല, ചെറുതുരുത്തി തുടങ്ങിയ സ്ഥലങ്ങളിലെ റിസോര്‍ട്ടുകളിലെ സ്വിമ്മിങ് പൂളുകള്‍ കേന്ദ്രീകരിച്ചാണ്. റിസോര്‍ട്ടുകളിലെ താമസവുമായി ചേര്‍ത്തുള്ള പാക്കേജുകളുമുണ്ട്. ഗൗണ്‍, സ്യൂട്ട് പോലുള്ള വസ്ത്രങ്ങള്‍ ധരിച്ചാണ് ഫോട്ടോഷൂട്ടെങ്കില്‍ ഇവ വാടകയ്‌ക്കെടുക്കുകയാണ് പതിവ്. വെള്ളത്തിലിറങ്ങാനുള്ള പേടികൊണ്ടു പലപ്പോഴും വധൂവരന്മാര്‍ പരിഭ്രാന്തരാകാറുണ്ട്. വളരെ സമയമെടുത്ത് അവര്‍ക്ക് ആത്മവിശ്വാസം നല്‍കിയാകും ഫോട്ടോഷൂട്ട്.

ഒരു ദിവസത്തെ ഫോട്ടോഷൂട്ട് ആണ് പലപ്പോഴും വധൂവരന്മാര്‍ക്കു വേണ്ടി ഒരുങ്ങുക. 20,000 രൂപയുടെ ബേസ് പാക്കേജ് മുതല്‍ മുകളിലേക്കാണ് പ്രതിഫലം. പകല്‍ വെളിച്ചത്തിലാണ് ഷൂട്ടിങ് നടക്കുക എന്നതിനാല്‍ പ്രത്യേക വെളിച്ച ക്രമീകരണമോ വലിയ സംഘമോ ആവശ്യമില്ല. വേഷവിതാനങ്ങളുടെ എണ്ണം കൂടുന്നതും ലൊക്കേഷന്‍ ദൂരേക്കു പോകുന്നതും തുക കൂട്ടാനിടയാക്കാം.

ആലപ്പുഴ, മൂന്നാര്‍, കൊച്ചി എന്നിവിടങ്ങളിലും അണ്ടര്‍ വാട്ടര്‍ ഫൊട്ടോഗ്രഫിക്കു റിസോര്‍ട്ടുകള്‍ വേദിയൊരുക്കാറുണ്ട്. കല്യാണ വേഷത്തില്‍ തന്നെ വെള്ളത്തിനടിയില്‍ ഫോട്ടോഷൂട്ട് നടത്താനാണ് പല വധൂവരന്മാരുടെയും ആഗ്രഹം. ഇത്തരം ചിത്രങ്ങള്‍ മാത്രം ഉള്‍പ്പെടുത്തി പ്രത്യേക ഫോട്ടോ ആല്‍ബം, വിഡിയോ ആല്‍ബം എന്നിവ തയാറാക്കുന്ന രീതിയുമുണ്ട്.