അമേരിക്കയിലെ ഫ്‌ലോറിഡ സംസ്ഥാനത്തുള്ള റോസാ ഫണ്ടിന്, ഇക്കഴിഞ്ഞ വ്യാഴാഴ്ച ബ്രൂക്‌സ്വില്ലിലൂടെ കാറോടിച്ചു പോകവേ പെട്ടെന്ന് പാമ്പ് പിടിത്തക്കാരിയുടെ റോള്‍ ചെയ്യേണ്ടിവന്നു .

കാറില്‍ പോകവെയാണ് റോഡരികില്‍ ഒരു ബിയര്‍ കാനിനുള്ളില്‍ തല കുടുങ്ങി ഇറങ്ങി പോകാന്‍ കഴിയാതെ തലങ്ങും വിലങ്ങും തിരിഞ്ഞു കൊണ്ടിരിയ്ക്കുന്ന ഒരു പാമ്പിനെ അവര്‍ കണ്ടത്. 

ഹ്യൂമന്‍സ് ആന്‍ഡ് അനിമല്‍സ് യുണൈറ്റഡ് റെസ്‌ക്യൂ എന്ന സ്ഥാപനത്തിന്റെ ഉടമയാണെങ്കിലും പാമ്പുകളോട് അത്ര പ്രതിപത്തി ഉള്ള ആള്‍ അല്ല മിസ്സിസ് ഫോണ്ട് .പക്ഷെ എന്നാലും ആ പാമ്പിനെ ആ നിലയില്‍ അവിടെ ഉപേക്ഷിച്ചു പോയിക്കൂടാ എന്ന് അവര്‍ക്കറിയാമായിരുന്നു .

പാമ്പ് അനങ്ങുന്നുണ്ടായിരുന്നു. അതിനാല്‍ തന്നെ അതിന് ജീവന്‍ ഉണ്ടെന്ന് മനസ്സിലായി. ഞാന്‍ തന്നെ അതിനെ വിടുവിച്ചാലേ പറ്റുമായിരുന്നുള്ളൂ എന്ന് താന്‍ തിരിച്ചറിഞ്ഞു എന്നും മറ്റാരെങ്കിലും വന്നു രക്ഷിയ്ക്കട്ടെ എന്ന് വച്ച് കടന്നു പോയാല്‍ കാണുന്നവര്‍ അതിനെ കൊല്ലുകയേ ഉള്ളു എന്ന് തനിക്കു തോന്നി എന്നും അവര്‍ പിന്നീട് പറഞ്ഞു.

അത് കൊണ്ട് പാമ്പിനെ മോചിപ്പിയ്ക്കാന്‍ തന്നെ അവര്‍ തീരുമാനിച്ചു . തന്റെ മൊബൈല്‍ ഫോണില്‍ അത് റെക്കോര്‍ഡ് ചെയ്യാനുള്ള സംവിധാനം എല്ലാം തയ്യാറാക്കിയതിനു ശേഷം തന്റെ ഒപ്പമുണ്ടായിരുന്ന വളര്‍ത്തു നായ്ക്കളോട് ദൂരെ നീങ്ങി നില്‍ക്കാന്‍ ആവശ്യപ്പെടുകയും ചെയ്തിട്ടാണ് പാമ്പിനെ സമീപിച്ചത്.

പാമ്പിനെ വിടുവിച്ചെടുത്തതിന്റെ വീഡിയോ 16,000 ത്തില്‍ അധികം വ്യൂസ് നേടിക്കഴിഞ്ഞു.

പേടിച്ചരണ്ട മിസ്സിസ് ഫോണ്ട്, താന്‍ പാമ്പിനെ ഉപദ്രവിയ്ക്കുവാന്‍ വന്നതല്ല, രക്ഷിയ്ക്കാന്‍ ശ്രമിയ്ക്കുകയാണ്, നിനക്ക് വേദനിക്കുമെന്ന് എനിക്കറിയാം എന്നൊക്കെ പാമ്പിനോട് പറയാന്‍ ശ്രമിയ്ക്കുന്നതായി വിഡിയോയില്‍ കാണാം. 

ഏതായാലും പേടിച്ചു നിലവിളിച്ചും പരിതപിച്ചും പാമ്പിനോട് ക്ഷമ പറഞ്ഞുകൊണ്ടുമൊക്കെ കുറച്ചേറെ പണിപ്പെട്ട് പാമ്പിന്റെ തല ബിയര്‍ കാനില്‍ നിന്നും പുറത്തെടുക്കുന്നതില്‍ മിസ്സിസ് ഫോണ്ട് വിജയിച്ചു.

എനിയ്ക്കു എങ്ങനെ അതിനു ധൈര്യം ഉണ്ടായി എന്ന് എനിയ്ക്കു തന്നെ അറിയില്ല. രണ്ടു തവണ ആ പാമ്പ് എന്റെ കൈയ്യില്‍ ചുറ്റുക പോലുമുണ്ടായി എന്ന് വീഡിയോ ഷെയര്‍ ചെയ്യുന്നതിനിടെ  അവര്‍  പറഞ്ഞു.

വളരെ ധൈര്യമുള്ള സ്ത്രീയാണ് നിങ്ങള്‍, ഞാന്‍ ആയിരുന്നെങ്കില്‍ ഇത് ചെയ്യുമായിരുന്നില്ല എന്നായിരുന്നു ഒരാളുടെ കമന്റ് . പാമ്പിനെ രക്ഷപ്പെടുത്തിയതിന് നന്ദി പറഞ്ഞ മറ്റൊരാള്‍ നിങ്ങള്‍ വളരെ കരുതല്‍ നല്‍കുന്ന ഒരു സ്ത്രീ ആണ് എന്ന് പ്രശംസിയ്ക്കുകയും ചെയ്തു .

കാനിനുള്ളില്‍ നിന്നും പുറത്തു വന്നശേഷം അല്‍പ സമയം കൂടി അവിടെ കിടന്നതിന് ശേഷം അത് ദൂരത്തേക്ക് ഇഴഞ്ഞുപോയി. അമേരിക്കയില്‍ പൊതുവെ കാണപ്പെടുന്ന വിഷമില്ലാത്ത തരം പാമ്പായിരുന്നു അതെന്ന് പിന്നീട് മനസ്സിലായി.