സോഷ്യല്‍ മീഡിയയില്‍ തരംഗമായി മാറുന്നു ഫുട്‌ബോള്‍ വാങ്ങാനുള്ള ആസൂത്രണത്തെ കുറിച്ചുള്ള കുട്ടിപ്പട്ടാളത്തിന്റെ ആലോചനായോഗം!
സാമൂഹ്യപ്രവര്‍ത്തകന്‍ സുശാന്ത് നിലമ്പൂര്‍ പങ്കുവച്ച ഏറെ രസകരമായ ഒരു വീഡിയോ സോഷ്യല്‍ മീഡയയുടെ ഹൃദയം കീഴടക്കി.
പൊട്ടിപ്പോയ ബോളിന് പകരം എങ്ങനെ മറ്റൊന്നു വാങ്ങാം എന്നതിനെ കുറിച്ച് ചിന്തിക്കുവാന്‍ അടിയന്തിര മീറ്റിംഗ് വിളിച്ചു കൂട്ടിയ കുട്ടികളുടെ സംഘത്തിന്റെ വീഡിയോയാണ് സുശാന്ത് പങ്കുവച്ചത്.
സുശാന്തിന്റെ വീടിന് അടുത്തുള്ള സ്ഥലത്ത് കുറച്ച് കുട്ടികള്‍ ഫുട്‌ബോള്‍ വാങ്ങുന്നതിനുള്ള പണം സംഘടിപ്പിക്കുവാനാണ് ഈ മീറ്റിംഗ് കൂടിയത്. തെങ്ങിന്റെ മടലില്‍ കമ്പു വച്ച് കെട്ടി മൈക്ക് ആക്കിയാണ് പ്രസിഡന്റിന്റേയും സെക്രട്ടറിയുടെയും ബാക്കിയുള്ളവരുടേയുമൊക്ക പ്രസംഗം.
മിഠായി വാങ്ങാനുള്ള പണം സൂക്ഷിച്ച് ആഴ്ചയില്‍ പത്തു രൂപ സ്വരൂപിക്കുവാനാണ് കമ്മിറ്റിയുടെ തീരുമാനം. സംഘത്തിലുള്ള മികച്ച കളിക്കാരനെ പ്ലാസ്റ്റിക് കൂട് പൊന്നാടയാക്കി അണിയിച്ച് അഭിനന്ദിക്കുന്നുമുണ്ട്്. കൂടാതെ സംസാരിക്കുവാന്‍ ബുദ്ധിമുട്ടുള്ള കുട്ടി പ്രസംഗിക്കുവാന്‍ വരുമ്പോള്‍ അവന് സംസാരിക്കുവാന്‍ ബുദ്ധിമുട്ടുണ്ട്, ആരും കളിയാക്കുകയും ചിരിക്കുകയുമൊന്നും ചെയ്യരുതെന്ന് പ്രസിഡന്റും സെക്രട്ടറിയും ബാക്കിയുള്ളവര്‍ക്ക് നിര്‍ദ്ദേശവും നല്‍കുന്നു.
ഹൃദയം കവരുന്ന ഈ ദൃശ്യങ്ങള്‍ സോഷ്യല്‍മീഡിയയില്‍ വൈറലായി മാറിയിരിക്കുകയാണ്. കുട്ടികളെ അഭിനന്ദിച്ച് നിരവധിയാളുകള്‍ രംഗത്തെത്തിയിട്ടുണ്ട്.
https://www.facebook.com/Malayalivartha
