ജാനകി അമ്മൂമ്മയുടെ പാട്ടിനു കൂട്ടുമായി ജനമൈത്രി പോലീസ്!
എടതിരിഞ്ഞിയില് കാട്ടൂര് സ്റ്റേഷനിലെ ജനമൈത്രി പൊലീസുകാരായ ഇ.എസ്.മണി, വിവിന് കൊല്ലാറ എന്നിവര് സ്റ്റേഷന് പരിധിയിലെ വീടുകളില് എത്തി. പൊലീസ് സ്റ്റേഷന് പരിധിയിലെ വീടുകളില് സന്ദര്ശനം നടത്തി വിവരങ്ങള് ശേഖരിക്കുന്ന ജോലിയുടെ ഭാഗമായിട്ടായിരുന്നു സന്ദര്ശനം.
ഏകമകള് വിജയലക്ഷ്മി, മരുമകന് ദിവാകരന് എന്നിവര്ക്കൊപ്പം കഴിയുന്ന തൊണ്ണൂറ്റിനാലുകാരിയായ ജാനകിയമ്മയുടെ വീട്ടിലെത്തിയ പൊലീസിനെ കണ്ടപ്പോള് അമ്പരപ്പോടെ 'എന്തിനാ വന്നത്' എന്നായിരുന്നു അവര് ആദ്യം ചോദിച്ചത്. സൗഹൃദ സന്ദര്ശനമാണെന്നു പൊലീസുകാര് പറഞ്ഞപ്പോള് ജാനകിയമ്മയും സൗഹൃദഭാവത്തിലായി.
അമ്മ നന്നായി പാട്ട് പാടുമെങ്കിലും കേള്ക്കാന് ആളില്ലാത്തതിന്റെ സങ്കടമുണ്ടെന്നു മകള് പൊലീസിനോടു പറഞ്ഞു. സത്യമാണെന്നു ജാനകിയമ്മയും ശരിവച്ചു. ധൈര്യമായി പാടിക്കോളൂ, ഞങ്ങള് കേള്ക്കാമെന്നു പൊലീസുകാര് പറഞ്ഞപ്പോള് ജാനകിയമ്മ ഉഷാറായി. ഭക്തിഗാനങ്ങളും നാടന്പാട്ടുകളും ഈണത്തില് പ്രവഹിച്ചു. ഇമ്പമേറിയപ്പോള് പൊലീസുകാരിലൊരാളുടെ കാലില് തട്ടി താളംപിടിച്ചു.
'പൊട്ടിച്ചെറിയുക കൈവിലങ്ങുകള്' എന്ന നാടന്പാട്ടടക്കം ജാനകിയമ്മ പാടി. അമ്മൂമ്മ ആരെ അടുത്തുകിട്ടിയാലും പാടിക്കേള്പ്പിക്കുമെന്നു വിജയലക്ഷ്മി പറയുന്നു. ഒരിക്കല് കൈയ്ക്ക് പരുക്കേറ്റ് ആശുപത്രിയിലായപ്പോള് ശ്രോതാക്കള് നഴ്സുമാരും ആശുപത്രി ജീവനക്കാരുമായിരുന്നു.
അടുത്തിടെയായി ചെറിയ തോതില് മറവിയുണ്ട്. പാട്ടുകളിലെ ചില വരികള് മറന്നുപോകും. മുന്പ് കോല്ക്കളിയിലും പ്രാവീണ്യമുണ്ടായിരുന്നു. കോല് കയ്യില് കൊടുത്താല് ഇപ്പോഴും കളിക്കാന് അമ്മ തയാറാണെന്നു വിജയലക്ഷ്മി പറഞ്ഞപ്പോള് പല്ലില്ലാത്ത മോണ കാട്ടി ജാനകിയമ്മ ചിരിച്ചു.
https://www.facebook.com/Malayalivartha
