കോലിയെ പൂട്ടാനുള്ള ഒറ്റമൂലിയുമായി വിന്ഡീസ് കോച്ച് സിമ്മണ്സ്!
ഇന്ത്യയ്ക്കെതിരായ ഒന്നാം ട്വന്റി20ക്കു മുന്നോടിയായി മാധ്യമങ്ങളോടു സംസാരിക്കവേ, അസാധ്യ ഫോമില് കളിക്കുന്ന ഇന്ത്യന് ക്രിക്കറ്റ് ടീം ക്യാപ്റ്റന് വിരാട് കോലിയെ പൂട്ടാന് തന്റെ ടീമിന്റെ കൈയ്യില് തന്ത്രങ്ങളുണ്ടെന്ന് വെസ്റ്റിന്ഡീസ് കോച്ച് ഫില് സിമ്മണ്സ് പറഞ്ഞു.
കോലിയെ പൂട്ടാനുള്ള മൂന്നു മാര്ഗങ്ങള് തമാശരൂപേണ ഫില് സിമ്മണ്സ് വിശദീകരിച്ചത് ഇങ്ങനെയാണ്.
1. ആദ്യം അദ്ദേഹത്തിന്റെ ബാറ്റിനു പകരം സ്റ്റംപ് നല്കി ബാറ്റിങ്ങിനിറക്കുക.
2. 100 പന്തില് കൂടുതല് കളിക്കില്ലെന്ന് അദ്ദേഹത്തില്നിന്ന് എഴുതി വാങ്ങുക.
3. പറ്റുമെങ്കില് രണ്ടു ബോളര്മാര് ഒരേ സമയം വിരാടിനു നേരെ ബോള് ചെയ്യുക. ഇത്രയുമായാല് ഒരു പരിധി വരെ വിരാട് കോലിയെ തടയാം' - സിമ്മണ്സ് ചിരിച്ചുകൊണ്ടു പറഞ്ഞു.
അതേസമയം, ഇന്ത്യ അത്ര എളുപ്പം തോല്പ്പിക്കാവുന്ന എതിരാളികളല്ലെന്ന് സമ്മതിച്ച സിമ്മണ്സ്, കോലിയെ വിന്ഡീസ് താരങ്ങള് ഭയക്കേണ്ട കാര്യമില്ലെന്നും സിമ്മണ്സ് അഭിപ്രായപ്പെട്ടു. മുന് പരിചയം പൂര്ണമായും ഉപയോഗിച്ചാല് വിജയം അസാധ്യമല്ലെന്നും കൂട്ടിച്ചേര്ത്തു.
'കഴിഞ്ഞ വര്ഷം ഇവിടെ വന്നപ്പോള് ഏറെക്കുറെ ഇന്ത്യയ്ക്ക് ഒപ്പം നില്ക്കുന്ന പ്രകടനം കാഴ്ചവയ്ക്കാന് നമുക്കു സാധിച്ചിട്ടുണ്ട്. ഏകദിനത്തിലും ട്വന്റി20യിലും വിന്ഡീസ് കടുത്ത മത്സരമാണ് കാഴ്ചവച്ചത്. അതിലൊരു മത്സരം ടൈയില് അവസാനിക്കുകയും ചെയ്തു' - സിമ്മണ്സ് പറഞ്ഞു.
'അന്ന് വിന്ഡീസ് പുറത്തെടുത്ത പ്രകടനം വിശദമായി പരിശോധിക്കുകയാണ് ആദ്യപടി. ഇനി എന്തൊക്കെ കൂടുതലായി ചെയ്താല് ഇന്ത്യയെ വീഴ്ത്താമെന്നും നോക്കണം. കാരണം, അവരുടെ പ്രകടനത്തില് കാര്യമായ മാറ്റം വന്നിട്ടുണ്ട്. എന്തൊക്കെ പറഞ്ഞാലും കഴിഞ്ഞ തവണത്തേക്കാള് മികച്ച പ്രകടനം നാം ഉറപ്പാക്കണം. കാരണം, ഇന്ത്യ അത്ര എളുപ്പമുള്ള എതിരാളികളല്ല.' - സിമ്മണ്സ് പറഞ്ഞു.
https://www.facebook.com/Malayalivartha