6,36,000 രൂപയ്ക്ക് ഒരാള്‍ മദ്യപിച്ചുവെന്ന് നിങ്ങള്‍ ആരെങ്കിലും കേട്ടിട്ടുണ്ടോ? വര്‍ഷങ്ങളോളം മദ്യപിച്ച കഥയല്ല വെറും ഒരു ഗ്ലാസ് മദ്യം ഇത്രയും വില കൊടുത്ത് കഴിച്ച ഒരാളുടെ കാര്യമാണ് പറയുന്നത്. സ്വിറ്റ്‌സര്‍ലന്‍ഡിലെ ഒരു ബാറില്‍ ചൈനീസ് സ്വദേശിയാണ് 1878-ല്‍ നിര്‍മ്മിച്ച മദ്യം വന്‍ തുക കൊടുത്ത് രുചിച്ചത്. ബാര്‍ ജീവനക്കാരനാണ് ഈ സംഭവം പുറത്ത് പറഞ്ഞത്.

വര്‍ഷങ്ങള്‍ക്ക് മുന്‍പുള്ള മദ്യങ്ങളുടെ 2,500 വ്യത്യസ്ത ബ്രാന്‍ഡുകള്‍ സൂക്ഷിക്കുന്നുണ്ട് ഈ ബാര്‍ഹോട്ടലില്‍. ഇത് ഗിന്നസ് റെക്കോര്‍ഡിലും ഉണ്ട്. എന്നാല്‍ ഈ മദ്യക്കുപ്പികള്‍ നിധി പോലെ സൂക്ഷിക്കുന്നു എന്നല്ലാതെ അതിന് ആവശ്യക്കാര്‍ വരികയോ അത് തുറക്കുകയോ ചെയ്തിരുന്നില്ല.

എന്നാല്‍ കഴിഞ്ഞ ദിവസം ഒരു കൂട്ടം ആളുകള്‍ ബാറില്‍ എത്തുകയും, അതില്‍ ഒരാള്‍ ഈ കളക്ഷനിലെ ഒരു ബ്രാന്‍ഡഡ് മദ്യം ആവശ്യപ്പെടുകയുമായിരുന്നു. 1878-ലെ ഈ മദ്യത്തിന് വന്‍ തുകയാണ് വിലയെന്ന് ബാറുടമയുടെ മകന്‍ പറഞ്ഞെങ്കിലും തനിക്ക് ഇത് വേണമെന്നാണ് ആവശ്യക്കാരന്‍ പറഞ്ഞത്.

തന്റെ പിതാവ് കഴിഞ്ഞ 20 വര്‍ഷമായി ഈ ഹോട്ടല്‍ നടത്തുന്നുണ്ടെങ്കിലും ആരും 1878-ലെ മദ്യം ആവശ്യപ്പെട്ട് വന്നിട്ടില്ലെന്നും മകന്‍ പറയുന്നു. ആദ്യം പരിഭ്രമിച്ചെങ്കിലും ആവശ്യക്കാരന് മദ്യം നല്‍കാന്‍ തന്നെ തീരുമാനിച്ചു. ഒരു ഗ്ലാസ് മദ്യം നല്‍കിയ ശേഷം ഇത് വളരെ വില കൂടിയതാണെന്നും, വില കണക്കു കൂട്ടി പറയാമെന്നും ആവശ്യക്കാരനോട് പറഞ്ഞു. തുടര്‍ന്ന് 6,36,000രൂപയാണ് ഈ ഒരു ഗ്ലാസ് മദ്യത്തിന്റെ വില എന്നു പറഞ്ഞപ്പോള്‍ ആവശ്യക്കാരനായ ചൈനീസ് സ്വദേശി പണവും നല്‍കി മദ്യവും കഴിച്ച് പോവുകയായിരുന്നു.