വയറുചാടിയ, അല്ലെങ്കില്‍ അമിതവണ്ണമുള്ള പോലീസുകാരെയാണ് ഇന്ത്യക്കാര്‍ കുടുതല്‍ കണ്ടിട്ടുള്ളത്. എന്നാല്‍ സിനിമകളില്‍ നായകന്മാരായെത്തുന്ന പോലീസ് ഉദ്യോഗസ്ഥര്‍ അതീവ സൗന്ദര്യമുള്ളവരാണുതാനും! ഇത്തരത്തില്‍ സിനിമാ നടന്മാരെ വെല്ലുന്ന സൗന്ദര്യമുള്ള ഒരു പോലീസുകാരനാണ് സോഷ്യല്‍മീഡിയ അടക്കമുള്ള ഇന്റര്‍നെറ്റ് ലോകത്ത് ഇപ്പോള്‍ താരമായിരിക്കുന്നത്.

ഈ പോലീസുകാരന്റെ പ്രത്യേകതകള്‍ എന്തൊക്കെയാണെന്നോ? സച്ചിന്‍ അതുല്‍ക്കര്‍ എന്നി പേരുള്ള ഈ പോലീസുകാരനെ കണ്ടാല്‍ ഒരൊറ്റ നോട്ടത്തില്‍ ബോളിവുഡ് നടന്മാര്‍ ആരോ ആണെന്നേ വിചാരിക്കൂ. വെള്ളിത്തിരയില്‍ നാം കാണുന്ന പോലീസുകാരനല്ല ഇത്. മറിച്ച് ആളുകളെ മുള്‍മുനയില്‍ നിര്‍ത്തുന്ന വില്ലാളിവീരനാണ് ഇദ്ദേഹം. മധ്യപ്രദേശിലെ പോലീസ് സൂപ്രണ്ടന്റ് ആയ സച്ചിന് സമൂഹമാധ്യമത്തില്‍ പല താരങ്ങളെയും വെല്ലുന്ന വിധത്തിലാണ് ആരാധകരുള്ളത്.

ചുരുക്കി പറഞ്ഞാല്‍ പുതുതലമുറയില്‍ പലരും ഈ സച്ചിന്‍ പോലീസിന്റെ കടുത്ത ആരാധകരാണ്. ഭഗല്‍പൂര്‍ എന്ന ചെറുഗ്രാമത്തില്‍ നിന്നും പഠിച്ചു വന്ന സച്ചിന്‍ 2007 ഐപിഎസ് ബാച്ചുകാരനാണ്. പോലീസില്‍ ഉദ്യോഗം നേടിക്കഴിഞ്ഞാല്‍ പിന്നെ ആരോഗ്യസംരക്ഷണമൊക്കെ അതിന്റെ വഴിക്കു പോകും എന്നു ചിന്തിക്കുന്നവര്‍ക്ക് അപവാദമാണ് സച്ചിന്‍ എന്ന പോലീസുകാരന്‍. ഇദ്ദേഹത്തിന്റെ അതീവ ഫിറ്റായ ശരീരം തന്നെയാണ് അദ്ദേഹത്തിന്റെ ആരാധകരുടെ എണ്ണം അനുദിനം വര്‍ദ്ധിപ്പിക്കുന്നത്.

യോഗ ചെയ്യുന്നതില്‍ മുടക്കം വരുത്താത്ത സച്ചിന്‍ ഏറ്റവും വലിയ വ്യായാമമായി കരുതുന്നത് ശാന്തതയും സമാധാനവും അര്‍പ്പണബോധവുമാണത്രേ. ഉജ്ജയിനിലെ ജനങ്ങളുടെ പ്രിയപ്പെട്ട ഈ പോലീസുകാരനൊപ്പം സെല്‍ഫിയെടുക്കാനും ആളുകള്‍ മത്സരിക്കുന്നതായാണ് റിപ്പോര്‍ട്ടുകള്‍. സച്ചിന്‍ പങ്കുവയ്ക്കുന്ന ഫോട്ടോകള്‍ക്കു കീഴെ ഏറെയും സ്ത്രീആരാധകരുടെ കമന്റുകളാണ്. ചിലര്‍ക്ക് സച്ചിനെ ഒന്നു കണ്ടാല്‍ മതി, ചിലര്‍ക്കാകട്ടെ അദ്ദേഹത്തിനൊപ്പം നിന്നൊരു സെല്‍ഫി എടുക്കണം. എന്തായാലും പോലീസുകാരെല്ലാം സച്ചിനെ കണ്ടു ഫിറ്റ്‌നസ് പഠിക്കണമെന്നാണ് ഇപ്പോള്‍ ആരാധകരുടെ വാദം.