ഭൂമിയിലെ ഏറ്റവും വലിയ ജീവിയാണ് തിമിംഗലം. അതുകൊണ്ടു തന്നെ ലോകത്തിലെ ഏറ്റവും ഭാരമുള്ള ഹൃദയവും ഇവയുടേതു തന്നെ. 250 മുതല്‍ 350 കിലോവരെയാണ് ഇവയുടെ ഹൃദയത്തിന്റെ ശരാശരി ഭാരം. വ്യാസം കണക്കാക്കിയാല്‍ ചുരുങ്ങിയത് മൂന്നു മനുഷ്യരെയെങ്കിലും ഈ ഹൃദയത്തിന് ഉള്‍ക്കൊള്ളാനാകും.

2014-ല്‍ ഭീമാകാരമായ മഞ്ഞ് കട്ടകള്‍ക്കിടയില്‍ പെട്ട് 9 തിമിംഗലങ്ങള്‍ കൂട്ടത്തോടെ മരണപ്പെട്ടിരുന്നു. ഇവയില്‍ കരക്കടിഞ്ഞ രണ്ട് തിമിംഗലങ്ങളില്‍ ഒന്നിന്റെ ഹൃദയമാണ് ഇപ്പോള്‍ ഗവേഷകര്‍ കാലാകാലങ്ങളിലേക്ക് സൂക്ഷിച്ചു വയ്ക്കാനൊരുങ്ങുന്നത്. 273 കിലോ ഭാരമുള്ള ഈ ഹൃദയം നിലവിലെ സാഹചര്യത്തില്‍ ഇനി 1000 വര്‍ഷത്തേയ്ക്ക് കേടാവില്ലെന്നാണ് ഗവേഷകര്‍ പറയുന്നത്.

കാനഡയിലെ റോയല്‍ ഒന്റേറിയോ മ്യൂസിയത്തിലാണ് ഈ ഹൃദയം സൂക്ഷിച്ചിട്ടുള്ളത്. സാധാരണഗതിയില്‍ ഈ നീലത്തിമിംഗലത്തിന്റെ ഹൃദയത്തിന് വലിപ്പമേറെയുണ്ടെങ്കിലും തങ്ങള്‍ വിചാരിച്ചതിനേക്കാളും വലിപ്പം കുറവാണെന്നാണ് ഗവേഷകരുടെ അഭിപ്രായം. ഒരു കാറിന്റെ വലിപ്പം നീലത്തിമിംഗലത്തിന്റെ ഹൃദയത്തിനുണ്ടാകുമെന്നാണ് തങ്ങള്‍ പ്രതീക്ഷിച്ചിരുന്നതെന്നും ഇവര്‍ വ്യക്തമാക്കി.

ജര്‍മ്മന്‍ വിദഗ്ധര്‍ പ്ലാസ്റ്റിനേറ്റ് ചെയ്താണ് ഈ ഹൃദയത്തെ ദീര്‍ഘകാലം കേടാകാതെ സൂക്ഷിക്കാന്‍ കഴിയുന്ന പാകത്തിലാക്കിയത്. കൂടാതെ നീലത്തിമിംഗലത്തിന്റെ ഹൃദയത്തോടൊപ്പമായിരിക്കും അതിന്റെ അസ്ഥികൂടവും പ്രദര്‍ശിപ്പിക്കുക.