ഫോര്ട്ടുകൊച്ചിക്കാരന് വിജയകുമാറിന്റെ പ്രണയിനിയാകാന് നിയോഗം റഷ്യക്കാരിക്ക്!
റഷ്യയിലെ കിറോവില് നിന്നാണ് നറ്റാലിയ എത്തിയത്. ഫോര്ട്ടുകൊച്ചി സെയ്ന്റ് ജോണ് പാട്ടം സ്വദേശി വിജയ്കുമാറിനെ തേടിയായിരുന്നു വരവ്. ഫോര്ട്ടുകൊച്ചിയിലെ ടാറ്റു കലാകാരനാണ് വിജയ്കുമാര്. വെറുതെ വന്നതല്ല, നറ്റാലിയ. വിജയ്കുമാറിനൊപ്പം ജീവിക്കാന് തീരുമാനിച്ചായിരുന്നു ആ വരവ്.
വ്യാഴാഴ്ച ഉച്ചയോടെ മട്ടാഞ്ചേരി രജിസ്ട്രാര് ഓഫീസില് സുഹൃത്തുക്കളുടെ സാന്നിധ്യത്തില് ഇവര് വിവാഹിതരായി. ആറ് മാസം മുമ്പാണ് നട്ടാലിയയും വിജയ്കുമാറും ആദ്യമായി കണ്ടത്. റഷ്യയില് സ്വകാര്യ കമ്പനിയില് മാനേജരായ നട്ടാലിയ അവധിക്കാലത്ത് കൊച്ചി കാണാനെത്തിയതാണ്. ഫോര്ട്ടുകൊച്ചി കടപ്പുറത്തേക്ക് നടക്കുന്നതിനിടയില് വിജയ്കുമാറിനെ കണ്ടു. ചിത്രകാരനായ വിജയ്കുമാര് ടാറ്റു വരയ്ക്കുന്നത് ശ്രദ്ധയില്പ്പെട്ടു. കൗതുകത്തോടെ അവള് നോക്കി നിന്നു. പിന്നെ സ്വന്തം കൈയില് ടാറ്റു വരച്ചു. ഒരു സൗഹൃദത്തിന്റെ തുടക്കമായിരുന്നു അത്.
വിജയ്കുമാര് കഴിഞ്ഞ ഏഴ് വര്ഷമായി ഫോര്ട്ടുകൊച്ചിയില് ടാറ്റു വരയ്ക്കുന്നുണ്ട്. കഴിഞ്ഞതവണ വന്നപ്പോള്ത്തന്നെ വിവാഹം കഴിക്കാന് തീരുമാനിച്ചിരുന്നതായി വിജയ്കുമാര് പറഞ്ഞു. വിവാഹം കഴിഞ്ഞാല് റഷ്യയിലേക്ക് മടങ്ങാനാവില്ലെന്ന് അവരോട് പറഞ്ഞിട്ടുണ്ട്. നാട്ടില് നില്ക്കാന് തന്നെയാണ് ഇഷ്ടം. നറ്റാലിയയ്ക്കും കൊച്ചിയില് താമസിക്കാനാണ് താല്പര്യം. വിജയ്കുമാറിന്റെ വീട്ടില് അമ്മ മാത്രമാണുള്ളത്. ഏക സഹോദരിയെ വിവാഹം കഴിച്ചയച്ചു.
വിദേശിയുമായുള്ള വിവാഹത്തിന് ചില്ലറ പ്രശ്നങ്ങളുണ്ടായിരുന്നു. വിവാഹം രജിസ്റ്റര് ചെയ്യാന് കോടതിയുടെ അനുമതി വേണ്ടിയിരുന്നു. മുന് കൗണ്സിലറായ ആന്റണി കുരീത്തറയാണ് ഇതിനുള്ള സഹായം ചെയ്തത്. അഭിഭാഷകനായ അദ്ദേഹം കോടതിയെ സമീപിച്ചു. അനുകൂലമായ വിധി സമ്പാദിച്ചു. പിന്നീട് നിയമപ്രകാരം മട്ടാഞ്ചേരി രജിസ്ട്രാര് ഓഫീസില് രജിസ്റ്റര് ചെയ്തു.
വ്യാഴാഴ്ച രാവിലെ രജിസ്ട്രാര് ഓഫീസിലെത്തിയപ്പോള് നെറ്റ് തകരാറിലായതിനാല് രണ്ടു മണിക്കൂറോളം ഇവര്ക്ക് കാത്തുനില്ക്കേണ്ടിവന്നു. റഷ്യയിലെ വീട്ടുകാരെയും സുഹൃത്തുക്കളെയും നറ്റാലിയ വിവരം അറിയിച്ചിട്ടുണ്ട്. അവരുടെ കൂടി സാന്നിധ്യത്തില് ഉടനെ കൊച്ചിയിലെ ക്ഷേത്രത്തില് വെച്ച് വിവാഹം നടത്താനും തീരുമാനിച്ചിട്ടുണ്ട്. കൊച്ചിയില് ഹോം സ്റ്റേയില് തങ്ങുന്ന നറ്റാലിയ ഇനി താമസം വിജയ്കുമാറിന്റെ വീട്ടിലേക്ക് മാറ്റും.
https://www.facebook.com/Malayalivartha