മലപ്പുറം ജില്ലയിലെ വള്ളിക്കുന്ന് അരിയല്ലൂര്‍ കരുമരക്കാട് സ്വദേശിയായ അനൂപ് ഗംഗാധരന്‍ എംഫില്‍ നേടി. അങ്ങനെ എത്രയോ പേര്‍ എം ഫില്‍ നേടുന്നു, പിന്നെ ഇതിത്ര വാര്‍ത്തയാക്കാന്‍ എന്തിരിക്കുന്നു എന്നു തോന്നുന്നുണ്ടാവും. ഇതിലിത്തിരി വാര്‍ത്തയാക്കാനുള്ള സംഗതിയുണ്ട്.

സ്വകാര്യ ബസ് ഡ്രൈവര്‍ ജോലിക്കിടയിലും പഠനം തുടര്‍ന്നാണ് മലപ്പുറം ജില്ലയിലെ വള്ളിക്കുന്ന് അരിയല്ലൂര്‍ കരുമരക്കാട് സ്വദേശിയായ അനൂപ് ഗംഗാധരന്‍ കാലിക്കട്ട് സര്‍വ്വകലാശാല ഫോക് ലോര്‍ വിഭാഗത്തില്‍ നിന്ന് എംഫില്‍ സ്വന്തമാക്കിയത്. സര്‍വ്വകലാശാല വിദൂര വിദ്യാഭ്യാസ വിഭാഗത്തില്‍ എംഎ ഇംഗ്ലീഷ് കോഴ്‌സ് ചെയ്യുന്ന അനൂപിന്റെ അടുത്ത ലക്ഷ്യം ഫോക് ലോറില്‍ പിഎച്ച്ഡിയാണ്.

കരുമരക്കാട് ചെഞ്ചരൊടി വീട്ടില്‍ ഗംഗാധരന്‍-ഭാര്‍ഗവി ദമ്പതികളുടെ മകനായ അനൂപ് പ്ലസ് വണ്‍ പഠനകാലത്ത് ബസ് കഴുകിയാണ് പഠനത്തിന് പണം കണ്ടെത്തിയത്. അതിനു മുമ്പ് കല്‍പ്പണി, സെന്ററിംഗ്, പെയിന്റിംഗ്, വയറിംഗ് മേഖലയില്‍ സഹായിയായും തൊഴിലെടുത്തു.

വീടുപണിക്കും സഹോദരിയുടെ വിവാഹത്തിനും മറ്റുമായി, റെയില്‍ വേയില്‍ ക്ലാസ് ഫോര്‍ ജീവനക്കാരനായിരുന്ന അച്ഛന്റെ സമ്പാദ്യം ചെലവഴിക്കേണ്ടി വന്നതോടെയാണ് പഠനച്ചെലവിനുള്ള പണം സ്വന്തമായി കണ്ടെത്താന്‍ അനൂപ് തീരുമാനിച്ചത്.

പരപ്പനങ്ങാടി കോഓപ്പറേറ്റീവ് കോളജില്‍ നിന്ന് 2004-ല്‍ പ്ലസ്ടുവും കാലിക്കട്ട് സര്‍വ്വകലാശാലയില്‍ നിന്ന് 2009-ല്‍ ബിഎ ഇംഗ്ലീഷ് ബിരുദവും നേടി. 2013-ലാണ് ഫോക് ലോറില്‍ പിജിക്ക് ചേര്‍ന്നത്.

ഹൈസ്‌കൂള്‍ പഠനം അരിയല്ലൂര്‍ മാധവാനന്ദ ഹയര്‍ സെക്കന്‍ഡറി സ്‌കൂളിലായിരുന്നു. അഞ്ഞൂറോളം പുസ്തകങ്ങളുള്ള ചെറു ലൈബ്രറിയുണ്ട് വായനയില്‍ താല്‍പര്യമുള്ള അനൂപിന്റെ വീട്ടില്‍ . മറ്റു ജോലികള്‍ പഠനത്തോടൊപ്പം കൊണ്ടുപോകാനാകാത്തതിനാലാണ് അവധി ദിവസങ്ങളില്‍ ബസ് ജീവനക്കാരനായത്. ക്ലീനറും ചെക്കറും കണ്ടക്ടറുമൊക്കെ ആയതിനു ശേഷം വര്‍ഷങ്ങള്‍ക്കിപ്പുറമാണ്  ബസിന്റെ സാരഥിയാകുന്നത്. അനൂപിന് പിന്തുണയുമായി നിരവധി സംഘടനകള്‍ രംഗത്തെത്തിയിട്ടുണ്ട്. സാമൂഹിക മാധ്യമങ്ങളിലും താരമായിരിക്കുകയാണ് ഇദ്ദേഹം.