ഇറാക്കില്‍ നിന്നുള്ള അഭയാര്‍ത്ഥി ആയിരുന്ന കാലത്ത് , അഞ്ചു വയസ്സുണ്ടായിരുന്നപ്പോള്‍ തനിയ്ക്ക് ഒരു സൈക്കിള്‍ സൗജന്യമായി വാങ്ങിത്തന്ന ആളിനെ 24 വര്‍ഷങ്ങള്‍ക്കിപ്പുറം തേടി കണ്ടെത്തി ഒരു യുവതി . 1990-കളില്‍ അഭയാര്‍ത്ഥി ആയിരുന്ന കാലത്ത് തനിക്ക് സൈക്കിള്‍ വാങ്ങി തന്ന പേരറിയാത്ത ആ മനുഷ്യനെ കണ്ടെത്താന്‍ സഹായിയ്ക്കാമോ എന്ന് ചോദിച്ചുകൊണ്ട് ട്വിറ്ററിലാണ്  മേവന്‍ ബഭാകര്‍ എന്ന യുവതി പോസ്റ്റിട്ടത്.

ആ ആളുടെ ഒരു ചിത്രം പോസ്റ്റ് ചെയ്തു കൊണ്ട്, നെതര്‍ലാന്‍ഡ്സിലെ സ്‌വൊലെ എന്ന സ്ഥലത്തുണ്ടായിരുന്ന ഒരു അഭയാര്‍ത്ഥി ക്യാമ്പില്‍ ജോലി ചെയ്തിരുന്ന ആളാണ് അദ്ദേഹം എന്നും കുറിച്ചിരുന്നു . അവിടെ അഭയാര്‍ത്ഥികള്‍ക്കായി എത്തിയ്ക്കുന്ന അവശ്യ വസ്തുക്കളുടെ സംഭരണ കേന്ദ്രം നടത്തുകയായിരുന്നു അയാള്‍ എന്നും അറിയിച്ചിരുന്നു. വളരെ ദയാലു ആയ ഒരു മനുഷ്യനായിരുന്നു അദ്ദേഹം എന്നും അവര്‍ അനുസ്മരിയ്ക്കുന്നു.

ആ സന്ദേശം 7000-ത്തില്‍ അധികം തവണ റീ ട്വീറ്റ് ചെയ്യപ്പെടുകയും അവര്‍ അന്വേഷിച്ച ആളിനെ കണ്ടെത്താന്‍ സഹായകമാകുകയും ചെയ്തു.

അതേതുടര്‍ന്ന് ജര്‍മനിയിലെത്തി അദ്ദേഹത്തെ കണ്ട ശേഷം വീണ്ടും അവര്‍ പോസ്റ്റിട്ടിരുന്നു. ഒരിക്കലും താന്‍ അദ്ദേഹത്തില്‍ നിന്നും അകലേക്ക് പോയിരുന്നതായി തോന്നുന്നില്ലെന്നാണ് അദ്ദേഹം പറഞ്ഞതെന്നും സന്തോഷത്തോടെ അവര്‍ അറിയിച്ചു.

ഖുര്‍ദിഷ് വംശജരായിരുന്ന മേവനും മാതാപിതാക്കളും ആദ്യ ഗള്‍ഫ് യുദ്ധകാലത്താണ് ഇറാക്കില്‍ നിന്നും പലായനം ചെയ്തത്. 1994 -1995 കാലത്തായിരുന്നു പലായനവും അഭയാര്‍ത്ഥി ക്യാമ്പ് വാസവും എല്ലാം. ക്യാമ്പ് വിടുന്ന ദിവസമാണ് രണ്ടു സൈക്കിളുകളുമായി അദ്ദേഹം വന്നത്. അമ്മയ്‌ക്കൊരു വലിയ സൈക്കിളും തനിക്കൊരു ചെറിയ സൈക്കിളും ആണ് കൊണ്ട് വന്നതെന്ന് മേവന്‍ ഓര്‍മ്മിക്കുന്നു.

എന്നാലും പത്തിരുപത്തിനാല് വര്‍ഷത്തിന് ശേഷം അന്വേഷിച്ചു കണ്ടു പിടിച്ച് വന്നു കാണാനും നന്ദി പറയാനും തക്കവണ്ണം അതൊരു വലിയ കാര്യമല്ലെന്നാണ് അദ്ദേഹം പറയുന്നതത്രെ.

അദ്ദേഹം അതെ കുറിച്ച് അങ്ങനെയാണ് ചിന്തിയ്ക്കുന്നതെങ്കിലും, അദ്ദേഹത്തിന്റെ ദയാവായ്പ് എന്നെന്നും തന്റെ മനസ്സില്‍ ഉണ്ടായിരിയ്ക്കുമെന്നും ഒരു വ്യക്തി എന്ന നിലയില്‍ തന്റെ കാഴ്ചപ്പാടുകളെ രൂപപ്പെടുത്താന്‍ അത് തന്നെ വളരെ അധികം സഹായിച്ചുവെന്നുമാണ് മേവന്റെ അഭിപ്രായം . കുഞ്ഞു പ്രവര്‍ത്തികള്‍ക്ക് വളരെ വലിയ സ്വാധീനം ഉണ്ടാകാന്‍ കഴിയുമെന്ന് നാം എല്ലാവരും ഓര്‍ക്കണമെന്നും മേവന്‍ പറയുന്നു