90 പിന്നിട്ട അമ്മയെ അഗതി മന്ദിരത്തിലാക്കിയ സഹോദരനെ നിയമയുദ്ധത്തില് തോല്പ്പിച്ച് അമ്മയെ തിരികെ വീട്ടിലെത്തിച്ചു മറ്റൊരു മകന്!
മക്കളിലൊരാള് അഗതിമന്ദിരത്തില് തള്ളിയെങ്കിലും, ഒന്നര വര്ഷത്തിനു ശേഷം മറ്റൊരു മകന് നിയമപോരാട്ടങ്ങളിലൂടെ അമ്മയെ തിരികെ വീട്ടിലെത്തിച്ചു. തഴക്കര ഇറവങ്കര പണയില് പരേതനായ രാഘവന്റെ ഭാര്യ ഭാര്ഗവിയമ്മയെയാണ് (93) മക്കളില് ഒരാള് അഗതിമന്ദിരത്തിലാക്കിയത്.
കൊല്ലം കരുനാഗപ്പള്ളിക്ക് അടുത്തുള്ള അഗതി മന്ദിരത്തില് മറ്റു ബന്ധുക്കള് അറിയാതെ ഭാര്ഗവിയമ്മയെ പ്രവേശിപ്പിച്ചത് വിദേശത്തു ജോലിയുള്ള മകനാണ്. ബന്ധുക്കളെ തന്റെ വീട്ടില് നിന്നും അകറ്റി നിര്ത്തിയിരുന്നതിനാല് ഇയാളുടെ വീട്ടില് താമസിച്ചിരുന്ന ഭാര്ഗവിയമ്മയെ കരുനാഗപ്പള്ളിയിലെ കേന്ദ്രത്തില് ആക്കിയ വിവരം മറ്റു മക്കള് അറിഞ്ഞില്ല.
മക്കളിലൊരാളായ ഇറവങ്കര ചൈത്രം വീട്ടില് വിനയ് ബാബു, സുഹൃത്ത് മുഖേനെയാണ് സഹോദരന് അമ്മയെ ഉപേക്ഷിച്ച വിവരം അറിയുന്നത്. ഒട്ടേറെ വയോജന കേന്ദ്രങ്ങളിലും അനാഥ മന്ദിരങ്ങളിലും വിനയ്ബാബു അമ്മയെ തിരഞ്ഞെങ്കിലും കണ്ടെത്താനായില്ല.
ഒന്നരമാസം മുന്പു വവ്വാക്കാവിലെ ക്ഷേത്രത്തില് ദര്ശനത്തിനെത്തിയ അയല്വാസി കരുനാഗപ്പള്ളിയിലെ അഗതി മന്ദിരം സന്ദര്ശിച്ചു. അവിചാരിതമായി ഭാര്ഗവിയമ്മയെ അവിടെ കണ്ട അയല്ക്കാരന് വിനയ് ബാബുവിനെ വിവരമറിയിച്ചു. ഇവിടെയെത്തിയ വിനയ് ബാബുവിനൊപ്പം അമ്മയെ അയയ്ക്കാന് നിയമപ്രശ്നം മൂലം സ്ഥാപന അധികൃതര്ക്കായില്ല. പ്രശ്നം ചൂണ്ടിക്കാട്ടി വിനയ്ബാബു മാവേലിക്കര തഹസില്ദാര് എസ്. സന്തോഷ്കുമാറിനു പരാതി നല്കി.
ഒന്നര മാസം നീണ്ട നിയമ നടപടികള്ക്കൊടുവില് ഭാര്ഗവിയമ്മയെ ഇളയമകനായ വിനയ്ബാബുവിനൊപ്പം അയയ്ക്കാന് ചെങ്ങന്നൂര് ആര്ഡിഒ ഉത്തരവായി. ഇന്നലെ വൈകിട്ടു ചെങ്ങന്നൂര് ആര്ഡിഒ ജി. ഉഷാകുമാരി, മാവേലിക്കര തഹസില്ദാര് എസ്.സന്തോഷ്കുമാര്, ഭൂരേഖ തഹസില്ദാര് ദിലീപ് കുമാര് എന്നിവരുടെ നേതൃത്വത്തില് അഗതി മന്ദിരത്തില് നിന്നും ഭാര്ഗവിയമ്മയെ വീട്ടിലെത്തിച്ചു.
സംഭവത്തില് തുടര് നിയമ നടപടികള് സ്വീകരിക്കുമെന്ന് ആര്ഡിഒ ഉഷാകുമാരി വ്യക്തമാക്കി.
https://www.facebook.com/Malayalivartha