ചവര്പ്പാടത്തിനു സമീപം ഖാലിദിനെ കാത്തിരിക്കും ആ കാക്കക്കൂട്ടം!
ആലുവ കുന്നത്തേരി പേരേക്കാട്ടില് എം.എം. ഖാലിദ് സുബഹി നമസ്കാരം കഴിഞ്ഞ് ദിവസവും ഒന്നര കിലോമീറ്റര് നടന്ന് ചവര്പ്പാടത്തെത്തും. അവിടെ എന്നും രാവിലെ തന്നെ കാത്തിരിക്കുന്ന ഒരു കൂട്ടരുണ്ടെന്ന് ഖാലിദിനറിയാം. ഒരു പറ്റം കാക്കകളാണ് അവരുടെ പ്രഭാതഭക്ഷണം എത്തിക്കുന്ന ഖാലിദിനെ നോക്കിയിരിക്കുന്നത്. ഖാലിദ് പതിവ് തെറ്റിക്കില്ലെന്ന് അവര്ക്കറിയാം. ഖാലിദിന്റെ കയ്യിലെ തങ്ങള്ക്കുള്ള മൂന്നു പായ്ക്കറ്റ് ബിസ്കറ്റിലാണ് ആ കാക്കകളുടെ പ്രതീക്ഷ.
എഴുപത്തിയാറുകാരനായ ഖാലിദ് ഈ നടപ്പും ബിസ്കറ്റ് വിതരണവും തുടങ്ങിയിട്ട് ഒരു വര്ഷമായി. പാടത്തിനു നടുവിലെ സഡക് റോഡില് ചാരുബഞ്ചുകളിലൊന്നില് വിശ്രമിക്കുന്ന ഇടവേളയിലാണ് ഖാലിദിന്റെ ബിസ്കറ്റ് വിതരണം.
കുട്ടിക്കാലം മുതല് പക്ഷി മൃഗാദികളോടു തനിക്കു പ്രത്യേക സ്നേഹം തോന്നിയിരുന്നുവെന്നു ഖാലിദ് പറയുന്നു. സ്വന്തം ഭക്ഷണത്തില് ഒരു ഭാഗം മാറ്റിവച്ച് അവയ്ക്കു കൊടുക്കുമായിരുന്നു. അങ്ങനെയാണ് നടക്കാനിറങ്ങുമ്പോള് കയ്യില് ബിസ്കറ്റ് കരുതാന് തുടങ്ങിയത്.
വിവിധ കമ്പനികളില് ഇലക്ട്രിക്കല് ജോലികള് ചെയ്തിരുന്ന ഖാലിദ് ഇപ്പോള് വിശ്രമ ജീവിതത്തിലാണ്.
https://www.facebook.com/Malayalivartha