ദമാമിലെ ഫ്ലാറ്റില് നൂറുമേനി വിളവ് സമ്മാനിച്ച് ലോക്ക്ഡൗണ്!
മലപ്പുറം എടവണ്ണയിലെ മൊടവന് സലീം അവധി കഴിഞ്ഞു ദമാമിലെ ജോലി സ്ഥലത്തേക്കു വിമാനം കയറുമ്പോള് ബാഗേജില് പച്ചക്കറി വിത്തുകള് കരുതാറുണ്ട്. കഴിഞ്ഞ തവണ മടങ്ങിയപ്പോള് സലീമിന്റെ മാത്രമല്ല, കുടുംബാംഗങ്ങളുടെ ബാഗേജുകളിലെ പ്രധാന വസ്തുക്കള് വിത്തുകളും തൈകളും ഗ്രോബാഗുകളും ആയിരുന്നു. ദമാമിലെ ഫ്ലാറ്റിലെ ടെറസ് കൃഷി സജീവമാക്കണമെന്ന ആഗ്രഹമായിരുന്നു അതിനു പിന്നില്.
ദമാമിലെ കമ്പനിയില് മാനേജരായ സലീം വര്ഷങ്ങളായി ടെറസിനു മുകളില് ചെറിയ രീതിയില് കൃഷി ചെയ്യാറുണ്ട്. സ്കൂള് അടയ്ക്കുമ്പോള് നാട്ടിലേക്കു മടങ്ങുന്നതോടെ മാസങ്ങളോളം കൃഷി മുടങ്ങാറാണു പതിവ്. പക്ഷേ, ഇത്തവണ കോവിഡ് നിയന്ത്രണങ്ങള് വന്നതോടെ, സലീമിന് ഒരു മാസത്തിലേറെ ഓഫിസില് പോകേണ്ടിവന്നില്ല. അതുകൊണ്ട് സലീമിന്റെയും കുടുംബത്തിന്റെയും സ്വപ്നം പൂത്തുലഞ്ഞു
കൃഷിഭവനില്നിന്നു വാങ്ങിയ പയറും വെണ്ടയും പാവയ്ക്കയും മുളകും ചീരയുമെല്ലാം നല്ല വിളവാണെന്നു സലീം പറയുന്നു. ദമാമിലെ കടകളില്നിന്നു വാങ്ങി കൃഷി ചെയ്ത തക്കാളി, ചെറി തക്കാളി, പുതിന, മുരിങ്ങ, അത്തി തുടങ്ങിയവയും ഉണ്ട്.
ട്യൂഷന് എടുക്കാറുണ്ടായിരുന്ന ഭാര്യ സഹ്ലയുടെ തിരക്കും ഒഴിഞ്ഞു. മക്കള് ഇഷ മഹന്ന, ഫാദി അമ്മാര് എന്നിവരും കൂടെക്കൂടിയതോടെ ടെറസില് വിവിധയിനം പച്ചക്കറികള് പന്തലിട്ടു. നാട്ടില്നിന്നു കൊണ്ടുപോയ പാഷന് ഫ്രൂട്ട്, കുറ്റിക്കുരുമുളക് തുടങ്ങിയവയും വളരുന്നു. ചൂട് തടയാന് ടെറസിനു മുകളില് ഗ്രീന് ഹൗസുകള് നിര്മിച്ചിട്ടുണ്ട്. അടുക്കളയില്നിന്നുള്ള മാലിന്യം കംപോസ്റ്റ് വളമാക്കി ഉപയോഗിക്കുന്നു. വീട്ടിലെ ആവശ്യത്തിനുള്ള പച്ചക്കറി മാത്രമല്ല, സമീപത്തെ താമസക്കാര്ക്കെല്ലാം പച്ചക്കറി നല്കാന് കഴിയുന്നുണ്ടെന്ന് സലീം പറയുന്നു.
https://www.facebook.com/Malayalivartha