പി.എസ്.സി വഴി നിയമിക്കാന് സാമ്പത്തിക പ്രതിസന്ധി; എന്നാല് ഇഷ്ടക്കാരെ സ്ഥിരപ്പെടുത്താന് പ്രതിസന്ധിയില്ല; നൂറോളം കരാര് ജീവനക്കാരെ സ്ഥിരപ്പെടുത്താന് സര്ക്കാര് നീക്കം; എല്.ഡി.എഫ് സര്ക്കാര് യുവാക്കളെ വഞ്ചിക്കുന്നത് തുടരുന്നു
കോറോണ പ്രതിസന്ധിയെ തുടര്ന്ന് പി.എസ്.സി വഴിയുള്ള നിയമനങ്ങള് മരവിച്ച അവസ്ഥയിലാണ്. നിലവില് പി.എസ്.സി വഴി നിയമനങ്ങള് നടക്കുന്നില്ലെങ്കിലും നിരവധി കരാര് നിയമനങ്ങളാണ് ഈ കാലാളവില് നടന്നത്. മന്ത്രിസഭയുടെ തീരുമാനപ്രകാരം സൃഷ്ടിച്ച പുതിയ തസ്തികളില് പോലും കരാര് നിയമനം നടത്താണ് സര്ക്കാര് തീരുമാനമായി വന്നത്. ഇത്തരത്തില് നടക്കുന്ന കരാര് നിയമനങ്ങള് സ്വജനപക്ഷ പരമാണെന്നത് പരസ്യമായ രഹസ്യമാണ്. സ്വര്ണക്കടത്ത് കേസിലെ പ്രതി സ്വപ്ന സുരേഷ് ഇതിന് ഒരു ഉദാഹരണം മാത്രമാണ്. എന്നാല് ഇപ്പോള് പുറത്തു വരുന്ന വാര്ത്തകള് ഒരു സര്ക്കാര് ജോലിക്ക് വേണ്ടി വര്ഷങ്ങള് പരിശ്രമത്തിന് ശേഷം പി.എസ്.സി റാങ്ക് ലിസ്റ്റില് വന്നു നിയമന ഉത്തരവ് പ്രതീക്ഷിച്ചിരിക്കുന്ന ഉദ്യോഗാര്ഥികളെ കൂടുതല് നിരാശരാക്കുന്നതാണ്. കോവിഡിന്റെ മറവില് നിരവധി താല്ക്കാലിക ജീവനക്കാരെ സ്ഥിരപ്പെടുത്താന് സര്ക്കാര് നടപടി ആരംഭിച്ചു. ഇത്തരത്തില് നിയമനം ലഭിച്ചവരെല്ലാം ഇടതുപക്ഷ അനുഭാവികളും മന്ത്രിമാരുടെ അടുപ്പക്കാരുമാണ്.
ഇതിന്റെ ഭാഗമായി മന്ത്രി മേഴ്സിക്കുട്ടിയമ്മയുടെ പ്രൈവറ്റ് സെക്രട്ടറിയുടെ ഭാര്യയെ തൊഴില് വകുപ്പില് സ്ഥിരപ്പെടുത്തി ഉത്തരവിറങ്ങി. ഐടി വകുപ്പിന് കീഴിലുള്ള സിഡിറ്റില് അമ്പതിലധികം താല്ക്കാലിക ജീവനക്കാരെ സ്ഥിരപ്പെടുത്താനുളള നീക്കം അന്തിമ ഘട്ടത്തിലാണ്. തൊഴില് വകുപ്പിന് കീഴിലുള്ള കേരള ഇന്സ്റ്റിറ്റിയൂട്ട് ഓഫ് ലേബര് ആന്ഡ് എംപ്ലോയ്മെന്റ് അഥവാ കിലയില് താല്ക്കാലിക ജീവനക്കാരായ രണ്ടുപേരെ സ്ഥിരപ്പെടുത്തിക്കൊണ്ടുളള ഉത്തരവിറങ്ങിയത് കഴിഞ്ഞമാസമാണ്. എല്.ഡി ക്ലാര്ക്കായി സ്ഥിരനിയമനം ലഭിച്ച എ.ആര്.നസീജ മന്ത്രി മേഴ്സിക്കുട്ടിയമ്മയുടെ പ്രൈവറ്റ് സെക്രട്ടറി ബഷീറിന്റെ ഭാര്യയാണ്. കഴിഞ്ഞ ഇടതുസര്ക്കാരിന്റെ കാലത്താണ് ഇവരെ കിലയില് താല്ക്കാലിക അടിസ്ഥാനത്തില് നിയമിച്ചത്. സ്റ്റെനോ ടൈപ്പിസ്ററായി സ്ഥിരനിയമനം ലഭിച്ച എസ്.ഉമാദേവിയും സിപിഎം ബന്ധമുള്ള ആളാണ്. മറ്റു രണ്ടുപേര്ക്കുകൂടി കിലയില് സ്ഥിരനിയമനം നല്കാനുള്ള നീക്കം അന്തിമഘട്ടത്തിലെത്തി.
ഐ.ടിവകുപ്പിന് കീഴിലുളള സിഡിറ്റില് 51 പേരെ സ്ഥിരപ്പെടുത്താനും നീക്കമുണ്ട്. ഇതില് 19 പേര് മുഖ്യമന്ത്രിയുടെ പരാതി പരിഹാര സെല്ലിലും 12 പേര് സമൂഹമാധ്യമ വിഭാഗത്തിലും താല്ക്കാലികമായി തുടരുന്നവരാണ്. നേരത്തേ പി.ആര്.ഡിയുടെ കീഴിലായിരുന്ന സി-ഡിറ്റിനെ ഐ.ടി വകുപ്പിലേക്ക് മാറ്റിയതിന് ശേഷമാണ് താല്ക്കാലിക നിയമനങ്ങള് നടത്തിയത്. ഈ നിയമനങ്ങളെല്ലാം സ്ഥിരപ്പെടുത്താനാണ് ഇപ്പോഴത്തെ നീക്കം. പത്തുവര്ഷം പൂര്ത്തിയാക്കിയ താല്ക്കാലിക ജീവനക്കാര്ക്ക് സ്ഥിര നിയമനമാകാമെന്ന സുപ്രീംകോടതി വിധിയുടെ മറവിലാണ് സ്ഥിരപ്പെടുത്തല്. സംസ്ഥാനത്ത് അപ്രഖ്യാപിത നിയമനനിരോധനമെന്ന ഉദ്യോഗാര്ഥികള് ആരോപിക്കുമ്പോഴാണ് സ്ഥിരപ്പെടുത്തല് നടക്കുന്നത്. എല്ലാ വകുപ്പുകളും ഇതേ മാതൃക പിന്തുടര്ന്നാല് പി.എസ്.സി റാങ്ക് ലിസ്റ്റുകള്ക്ക് അര്ഥമില്ലാതാകും. നിലവിലെ പോലീസ് കോണ്സ്റ്റബിള് റാങ്കിലിസ്റ്റില് കഴിഞ്ഞ ഏഴു മാസമായി നിയമനം നടക്കുന്നില്ലെന്ന് ആരോപിച്ച് ഉദ്യോഗാര്ഥികള് പ്രതിഷേധ സമരത്തിലാണ്. ഇതുപോലെ കാലവധി പൂര്ത്തികാന് പോകുന്ന നിരവധി റാങ്കു ലിസ്റ്റുകളാണുള്ളത്. ഇവയിലൊന്നും കഴിഞ്ഞ അഞ്ചു മാസമായി പേരിനുപോലും ഒരു നിയമനവും നടന്നിട്ടില്ല.
https://www.facebook.com/Malayalivartha