കാസര്‍കോഡ് രാജപുരത്ത് ക്വാറന്റീനിലിരിക്കെ പാമ്പ് കടിയേറ്റ ഒന്നര വയസ്സുകാരിയെ രക്ഷിച്ച് ക്വാറന്റീനിലായ ജിനില്‍ മാത്യു ക്വാറന്റീനു ശേഷം വീണ്ടും കുട്ടിയെ കാണാനെത്തി. സുഖവിവരം അന്വേഷിച്ച് കുട്ടിയെ താലോലിച്ചാണു ജിനില്‍ മടങ്ങിയത്.

പാണത്തൂര്‍ വട്ടക്കയത്തെ വീട്ടില്‍ ക്വാറന്റീനിലായിരുന്ന കുടുംബത്തിലെ കുട്ടിയെ അണലി കടിച്ചത് ഇക്കഴിഞ്ഞ ജൂലൈ 21-ന് രാത്രിയാണ്. സഹായത്തിനായുള്ള രക്ഷിതാക്കളുടെ നിലവിളി കേട്ടെത്തിയവര്‍ കോവിഡ് ഭയന്ന് മാറി നിന്നു. അപ്പോള്‍ അയല്‍വാസി ജിനില്‍ മാത്യുവാണ് കുട്ടിയെ ആശുപത്രിയിലെത്തിച്ചത്.

ജിനില്‍ മാത്യുവിന്റെ മനുഷ്യത്വത്തെ നാടൊന്നാകെ പ്രസംശിച്ചിരുന്നു. ചികിത്സയിലിരിക്കെ കുട്ടിക്ക് കോവിഡ് പോസിറ്റീവായതോടെ ജിനില്‍ മാത്യു പഞ്ചായത്ത് ഒരുക്കിയ ക്വാറന്റിന്‍ കേന്ദ്രത്തിലേക്ക് മാറുകയായിരുന്നു. ജിനിലിന്റെ ഭാര്യയും മക്കളും ക്വാറന്റിനിലായിരുന്നു.