കെ.എം മാണിക്ക് പാലപോലെ ഉമ്മന്‍ചാണ്ടിക്ക് പുതുപ്പള്ളി പോലെ സി.എഫ് തോമസിന് എന്നും പ്രിയപ്പെട്ടതാണ് ചങ്ങനാശ്ശേരി. ഒന്‍പത് തവണയാണ് ചങ്ങനാശ്ശേരിക്കാര്‍ സി.എഫ് തോമസ് എന്ന അവരുടെ പ്രിയപ്പെട്ട അധ്യാപകനെ നിയമസഭയില്‍ എത്തിച്ചത്. 1980 മുതല്‍ 2016 വരെ തുടര്‍ച്ചയായി അദ്ദേഹം ചങ്ങനാശ്ശേരിയില്‍ നിന്നും വിജയിച്ചു. ഉമ്മന്‍ചാണ്ടിക്കും കെ.എം മാണിക്കും ശേഷം ഒരെ മണ്ഡലത്തില്‍ നിന്നും വിജയിച്ച് നിയമസഭാംഗമായിരുന്ന റിക്കോര്‍ഡ് സി.എഫ് തോമസിന് അവകാശപ്പെട്ടതാണ്. അതുകൊണ്ടു തന്നെ ആധുനിക ചങ്ങനാശേരിയുടെ മുഖ്യശില്‍പി എന്ന വിശേഷണം മറ്റാര്‍ക്കും അവകാശപ്പെടാനാവില്ല. അടിമുടി ഒരു ചങ്ങനാശ്ശേരിക്കാനായിരുന്നു സി.എഫ് തോമസ്.

സുതാര്യവും സംശുദ്ധവുമായ രാഷ്ട്രീയത്തിന്റെ വക്താവാണ് സി.എഫ് തോമസ്. കേരള കോണ്‍ഗ്രസ് രൂപം കൊണ്ട 1960കളില്‍ മികച്ച മുന്നേറ്റം നടത്തിയെങ്കിലും 1970 കളില്‍ പാര്‍ട്ടിയുടെ നിലപരുങ്ങലിലായി. ഇതോടെ കെ.എം മാണി നേതൃത്വം ഏറ്റെടുത്ത കേരള കോണ്‍ഗ്രസിന്റെ മുന്‍ നിര പോരാളികളായിരുന്നു സി.എഫ് തോമസ് ഉള്‍പ്പെടുന്ന കെ.വി കുര്യന്‍, പി.ജെ ജോസഫ്, വി.ടി സെബാസ്റ്റ്യന്‍, ഓ. ലൂക്കോസ്, തോമസ് കുതിരവട്ടം, ടി.എം ജേക്കബ്, ജോര്‍ജ്ജ് ജെ. മാത്യു എന്നിവര്‍. ഇതോടെ 1967 ലെ തിരഞ്ഞെടുപ്പില്‍ അഞ്ചു സീറ്റിലൊതുങ്ങിയ കേരളാ കോണ്‍ഗ്രസ് 1971 ലെ തെരഞ്ഞെടുപ്പില്‍ സീറ്റുകള്‍ 13 ആയി വര്‍ദ്ധിച്ചു. ഇതില്‍ മാണിക്കൊപ്പം നിന്നും ശക്തമായി പ്രവര്‍ത്തിയ യുവതുര്‍ക്കിയായിരുന്നു സി.എഫ് തോമസ്. പക്ഷേ, അപ്പോള്‍ തന്നെ കേരള കോണ്‍ഗ്രസ്സിന്റെ മുഖമുദ്രയായ സ്വഭാവം ഉണര്‍ന്നു തുടങ്ങിയിരുന്നു. ചേരിപ്പോരും പിളര്‍പ്പും. ഒമ്പതംഗ സംഘം അന്നത്തെ നേതാക്കളായ കെ.എം ജോര്‍ജ്ജിനെയും മാത്തച്ചനെയും ഒക്കെ ഒതുക്കാനാരംഭിച്ചു. കോട്ടയം ജില്ലാ പ്രസിഡണ്ട് തെരഞ്ഞെടുപ്പില്‍ ഔദ്യോഗികസ്ഥാനാര്‍ഥിക്കെതിരെ ഒമ്പതംഗ ഗ്രൂപ്പിന്റെ ഓ. ലൂക്കോസിനെ നിര്‍ത്തി ജയിപ്പിച്ചു. അധികം വൈകാതെ കേരള കോണ്‍ഗ്രസ്സിലെ ആദ്യത്തെ പിളര്‍പ്പ്. ഈ പിണര്‍പ്പില്‍ സി.എഫ് തോമസ് മാണിക്കൊപ്പം നിന്നു. ഈ നില്‍പ്പ് കെ.എം മാണിയുടെ മരണം വരെ തുടര്‍ന്നെങ്കില്‍ കെ.എം മാണിയുടെ മരണശേഷം അദ്ദേഹം പി.ജെ. ജോസഫ് വിഭാഗത്തിന്റെ ഭാഗമായി.

2001ലെ എ.കെ.ആന്റണി മന്ത്രിസഭയിലും തുടര്‍ന്നുവന്ന ഉമ്മന്‍ ചാണ്ടി മന്ത്രിസഭയിലും റജിസ്‌ട്രേഷന്‍, ഗ്രാമവികസനം, ഖാദി വകുപ്പുകളുടെ മന്ത്രിയായിരുന്നു. വിദ്യാര്‍ഥി സംഘടനാ പ്രവര്‍ത്തനത്തിലൂടെയായിരുന്നു പൊതുരംഗത്തേക്കുള്ള അദ്ദേഹത്തിന്റെ കടന്നുവരവ്. പി.ടി.ചാക്കോയില്‍ ആകൃഷ്ടനായി 1956ല്‍ കോണ്‍ഗ്രസ് അംഗത്വം സ്വീകരിച്ചു. വിമോചനസമരത്തില്‍ പങ്കെടുത്തു. 1964ല്‍ കേരള കോണ്‍ഗ്രസ് രൂപീകരിച്ചപ്പോള്‍ ഒപ്പം ചേര്‍ന്നു. പാര്‍ട്ടിയുടെ ആദ്യത്തെ ചങ്ങനാശേരി നിയോജകമണ്ഡലം സെക്രട്ടറി. പാര്‍ട്ടിയുടെ രൂപീകരണം മുതല്‍ കെ.എം.മാണിയുടെ വിശ്വസ്തനായി ഒപ്പമുണ്ടായിരുന്നു. ദീര്‍ഘകാലം കേരള കോണ്‍ഗ്രസ് എം അധ്യക്ഷനും ഉപാധ്യക്ഷനും ജനറല്‍ സെക്രട്ടറിയുമായി. കെ.എം.മാണിയുടെ മരണശേഷം പി.ജെ.ജോസഫിനൊപ്പം ചേര്‍ന്നു. നിലവില്‍ കേരള കോണ്‍ഗ്രസ് (എം) ജോസഫ് വിഭാഗം ഡെപ്യൂട്ടി ചെയര്‍മാനാണ്. എ.കെ.ആന്റണി, ഉമ്മന്‍ ചാണ്ടി മന്ത്രിസഭകളില്‍ അംഗമായിരുന്നു. കേരള കാത്തലിക് സ്റ്റുഡന്റ്‌സ് ലീഗ് സംസ്ഥാന ജനറല്‍ സെക്രട്ടറി, അതിരൂപതാ പാസ്റ്ററല്‍ കൗണ്‍സില്‍ അംഗം തുടങ്ങിയ പദവികളും വഹിച്ചിട്ടുണ്ട്.

ചങ്ങനാശേരി ചെന്നിക്കര സി.ടി.ഫ്രാന്‍സിസിന്റെയും അന്നമ്മയുടെയും മകനായി 1939 ജൂലൈ 30നായിരുന്നു ജനനം. എസ്ബി കോളജില്‍നിന്ന് ബിരുദവും എന്‍എസ്എസ് ട്രെയിനിങ് കോളജില്‍ നിന്ന് ബിഎഡും നേടി. 1962ല്‍ ചമ്പക്കുളം സെന്റ് മേരീസ് സ്‌കൂളിലും തുടര്‍ന്ന് ചങ്ങനാശേരി എസ്ബി സ്‌കൂളിലും അധ്യാപകനായി. 1980ല്‍ എംഎല്‍എ ആകുംവരെ 18 വര്‍ഷക്കാലം അധ്യാപകനായിരുന്നു.