രണ്ടാമത്തെ ബോയിംഗ് 777 വിമാനവും എത്തി; എയര്‍ഫോഴ്‌സ് വണ്‍ വിമാനത്തിന്റെ മാതൃക; വിമാനത്തിലെ ഞെട്ടിപ്പിക്കുന്ന സൗകര്യങ്ങള്‍ ഇങ്ങനെ; രണ്ട് വിമാനങ്ങള്‍ക്കും മിസൈല്‍ പ്രതിരോധ സംവിധാനങ്ങളുണ്ട്; പുതിയ വിമാനങ്ങള്‍ പറത്തുന്നത് വ്യോമസേനയിലെ പൈലറ്റുമാര്‍
രാഷ്ട്രപതി രാം നാഥ് കോവിന്ദ്, ഉപരാഷ്ട്രപതി വെങ്കയ്യ നായിഡു, പ്രധാനമന്ത്രി നരേന്ദ്ര മോദി എന്നിവരുടെ യാത്രകള്‍ക്കായി ഇന്ത്യ വാങ്ങിയ ബോയിംഗ് 777 വിമാനങ്ങളില്‍ രണ്ടാമത്തേത് ഇന്ന് രാജ്യ തലസ്ഥാനത്ത് എത്തി. ആദ്യ വിമാനം ഒക്ടോബര്‍ ഒന്നിന് ഡല്‍ഹിയിലെത്തിയിരുന്നു. പുതിയ വിമാനങ്ങള്‍ പ്രത്യേകം രൂപകല്‍പ്പന ചെയ്തതാണ്. രണ്ട് വിമാനങ്ങള്‍ക്കും മിസൈല്‍ പ്രതിരോധ സംവിധാനങ്ങളുണ്ട്. അമേരിക്കന്‍ പ്രസിഡന്റിന്റെ എയര്‍ഫോഴ്‌സ് വണ്‍ വിമാനത്തിന്റെ മാതൃകയില്‍ നിര്‍മ്മിക്കുന്ന ഈ വിമാനങ്ങളുടെ പരിപാലനച്ചുമതല എയര്‍ ഇന്ത്യയുടെ എന്‍ജിനിയറിങ് വിഭാഗമായ എയര്‍ ഇന്ത്യ എന്‍ജിനിയറിങ് സര്‍വീസസ് ലിമിറ്റഡിനാണ്. വ്യോമസേനയിലെ പൈലറ്റുമാരായിരിക്കും പറത്തുക.
നിലവില്‍ എയര്‍ ഇന്ത്യ വണ്‍ എന്ന് അറിയപ്പെടുന്ന എയര്‍ ഇന്ത്യയുടെ ബോയിങ് 747 വിമാനങ്ങളിലാണ് ഇന്ത്യന്‍ പ്രധാനമന്ത്രിയും രാഷ്ട്രപതിയും ഉപരാഷ്ട്രപതിയും യാത്രചെയ്യുന്നത് . എന്നാല്‍ വ്യോമസേന പറത്തുന്ന പുതിയ വിമാനങ്ങള്‍ 'എയര്‍ ഫോഴ്‌സ് വണ്‍' എന്നാകും അറിയപ്പെടുക. അമേരിക്കയിലേക്ക് നിര്‍ത്താതെ പറക്കാന്‍ കഴിയുന്ന പുതിയ ദീര്‍ഘദൂര വിമാനം, മൂന്ന് വിശിഷ്ടാതിഥികള്‍ക്ക് മാത്രമായിട്ടുള്ള ഇന്ത്യയുടെ ആദ്യത്തെ സമര്‍പ്പിത വിമാനമാണ്.
ഇത്രയും കാലം രാഷ്ട്രപതി, ഉപരാഷ്ട്രപതി,പ്രധാനമന്ത്രി എന്നാവരില്‍ ഒരാള്‍ക്ക് വിദേശയാത്ര ചെയ്യേണ്ടി വരുമ്പോഴെല്ലാം എയര്‍ ഇന്ത്യയുടെ വിമാനങ്ങള്‍ സര്‍ക്കാര്‍ ആവശ്യപ്പെടുകയായിരുന്നു ചെയ്തിരുന്നത്. പ്രധാനമന്ത്രിക്ക് ഓഫീസ്, സ്ലീപ്പിംഗ് ഏരിയ തുടങ്ങിയ ഇടം ക്രമീകരിക്കാന്‍ വിമാനത്തിന്റെ ഒരു ഭാഗത്ത് നിന്ന് സീറ്റുകള്‍ നീക്കം ചെയ്യുകയാണ് ചെയ്തിരുന്നത്. രണ്ട് വിമാനങ്ങളും ഓഗസ്റ്റില്‍ ഡെലിവര്‍ ചെയ്യാന്‍ നേരത്തെ നിശ്ചയിച്ചിരുന്നുവെങ്കിലും ചില സാങ്കേതിക കാരണങ്ങള്‍ കൊണ്ട് തീയതി നീണ്ടുപോവുകയായിരുന്നു. സെല്‍ഫ് പ്രൊട്ടക്ഷന്‍ സ്യൂട്ട് സജ്ജീകരിച്ച രണ്ട് ബി777 വിമാനങ്ങളാണ് ഇത്.
ഈ പുതിയ വിമാനങ്ങള്‍ ഇന്ത്യക്കായി പ്രത്യേകം രൂപകല്പന ചെയ്തതാണ്. ലാര്‍ജ് എയര്‍ക്രാഫ്റ്റ് ഇന്‍ഫ്രാറെഡ് കൗണ്ടര്‍മെഷേഴ്‌സ് എന്നു വിളിക്കുന്ന അത്യാധുനിക മിസൈല്‍ പ്രതിരോധസംവിധാനം ഇവയിലുണ്ടാകും. മിസൈലുകളില്‍നിന്ന് സുരക്ഷ നല്‍കാനുള്ള സെല്‍ഫ് പ്രൊട്ടക്ഷന്‍ സ്യൂട്‌സുമുണ്ടാകും. ശത്രുവിന്റെ റഡാര്‍ ഫ്രീക്വന്‍സി ജാം ചെയ്ത് ശത്രു മിസൈലുകളുടെ നിയന്ത്രണ സംവിധാനം നശിപ്പിക്കുന്ന സംവിധാനമാണിത്. ശത്രു മിസൈലിനെ ജാം ചെയ്ത വിവരം പൈലറ്റിനെ അറിയിക്കുകയും ചെയ്യും. ഇന്ധനം തീര്‍ന്നാല്‍ ആകാശത്ത് വച്ചു തന്നെ നിറയ്ക്കാനും കഴിയും. 19 കോടി ഡോളര്‍ (ഏകദേശം 1350 കോടി രൂപ)യാണ് ചെലവ്. പുതിയ വിമാനങ്ങള്‍ പറത്താന്‍ വ്യോമസേനയിലെ ചില പൈലറ്റുമാരെ അമേരിക്കന്‍ കമ്പനിയായ ബോയിങ് പരിശീലിപ്പിച്ചിട്ടുണ്ട്.
വിമാനത്തിനുളളില്‍ നിന്ന് തന്നെ രാജ്യത്തെ അഭിസംബോധന ചെയ്യാവുന്ന വിപുലമായ വാര്‍ത്താവിനിമയ സംവിധാനം, ശസ്ത്രക്രിയ ഉള്‍പ്പടെയുള്ള ചികിത്സാ സൗകര്യങ്ങള്‍, ആകാശത്തു വച്ചുതന്നെ ഇന്ധനം നിറയ്ക്കാനുളള സൗകര്യങ്ങള്‍, ആണവ സ്‌ഫോടനത്തിന്റെ ആഘാതത്തില്‍ പോലും ക്ഷതമേല്‍ക്കില്ല തുടങ്ങി അമ്പരപ്പിക്കുന്ന സൗകര്യങ്ങളും സുരക്ഷാ സംവിധാനങ്ങളുമാണ് ഈ വിമാനത്തിലുളളത്. ആഡംബര സൗകര്യങ്ങള്‍, പത്രസമ്മേളന മുറി, മെഡിക്കല്‍ സജ്ജീകരണങ്ങള്‍ എന്നിവയെല്ലാം പ്രത്യേകമായി ഉള്‍പ്പെടുത്തിയാണ് ബോയിംഗ് 777 എയര്‍ ഇന്ത്യ സജ്ജമാക്കിയത്. വൈഫൈ, മിസൈല്‍ പ്രതിരോധ സംവിധാനങ്ങള്‍ എന്നിവയെല്ലാം ഇതിന്റെ ഭാഗമാണ്.
അതെ സമയം വിവിഐപികള്‍ക്കായി പുതിയ വിമാനം വാങ്ങിയതിനെ വിമര്‍സിച്ച് കോണ്‍ഗ്രസ് നേതാവ് രാഹുല്‍ ഗാന്ധി രംഗത്ത് വന്നിയിരുന്നു. നികുതിപ്പണത്തില്‍ നിന്ന് 8000 കോടിയില്‍ അധികം രൂപ ഉപയോഗിച്ചാണ് എയര്‍ ഇന്ത്യ വണ്‍ വിമാനം വാങ്ങിയത്. സുഹൃത്ത് ട്രംപിന് ഒരു വി.വി.ഐ.പി വിമാനം ഉള്ളതു കൊണ്ടാണ് മോദിയും വിമാനം വാങ്ങിയതെന്ന് രാഹുല്‍ പരിഹസിച്ചു. പഞ്ചാബില്‍ കര്‍ഷക സമരത്തില്‍ പങ്കെടുത്തപ്പോള്‍ രാഹുല്‍ കുഷന്‍ ചെയ്ത സീറ്റുള്ള ട്രാക്റ്ററില്‍ യാത്ര ചെയ്ത് ബി.ജെ.പി വിമര്‍ശിച്ചിരുന്നു. ഇതിന് പ്രതികരണമായിയാണ് അദ്ദഹം അന്ന് പ്രത്യേക വിമാനത്തെ വിമര്‍ശിച്ചത്.
https://www.facebook.com/Malayalivartha
