മറഡോണ: അംഗീകരിക്കപ്പെട്ട എട്ടു മക്കളും അവകാശവാദവുമായി മറ്റ് പലരും... അച്ചടക്കമില്ലാത്ത ജീവിതത്തിന്റെ ബാക്കി പത്രം!
കളത്തിലെ പന്തടക്കം ജീവിതത്തിലില്ലായിരുന്ന ഇതിഹാസ താരം നിലത്തടിച്ച പന്തു പോലെ തെന്നിയും തെറിച്ചും ജീവിച്ചു. അംഗീകരിക്കപ്പെട്ട എട്ടു മക്കളും അവകാശവാദവുമായി രംഗത്തുള്ള ചിലരുമാണു അച്ചടക്കമില്ലാത്ത ആ ജീവിതത്തിന്റെ ബാക്കി പത്രം. പിന്തുടര്ച്ചാവകാശത്തിനു വേണ്ടിയുള്ള നിയമയുദ്ധമായി മരണ ശേഷവും മറഡോണയെ അതു വേട്ടയാടിയേക്കാം.
1986-ല് ഫുട്ബോള് പ്രേമികളുടെ ഹൃദയങ്ങളില് കുടിയേറും മുന്പേ മറഡോണ ക്ലോഡിയ വില്ലഫേനു തന്റെ ഹൃദയം കൈമാറിയിരുന്നു. നിര്മാതാവും നടിയുമായിരുന്ന അവര്ക്കു അപ്പോള് 17 വയസ്സ്. മറഡോണയ്ക്കു രണ്ടു വയസ്സു കൂടുതല്. ദമ്പതികള്ക്കു ഡാല്മ, ഗിയാന്നിന എന്നീ രണ്ടു പെണ്മക്കള്. മൂത്തമകള്ക്ക് അമ്മയുടെ പേരാണ് നല്കിയത്. പ്രണയവും വിവാഹവുമായി മൂന്നു പതിറ്റാണ്ടോളം നീണ്ട ബന്ധത്തിനു ശേഷം 2004-ല് ക്ലോഡിയയും മറഡോണയും പിരിഞ്ഞു.
പിന്നെയും ദീര്ഘകാലം അവര് നല്ല സുഹൃത്തുക്കളായി തുടര്ന്നു. അമേരിക്കയില് ഫ്ലാറ്റ് വാങ്ങുന്നതിനായി പണം മോഷ്ടിച്ചുവെന്നാരോപിച്ചു ക്ലോഡിയയ്ക്കെതിരെ മറഡോണ കോടതിയിലെത്തിയപ്പോഴാണു ഇരു ഹൃദയങ്ങളും അകന്നതായി ലോകം അറിഞ്ഞത്.
ഇറ്റാലിയന് രണ്ടാം ഡിവിഷനില് നാപ്പോളിക്കായി കളിക്കുന്ന കാലത്ത്, മോഡലായിരുന്ന ക്രിസ്റ്റീന സിനാഗ്രയുമായുണ്ടായ ബന്ധത്തില് ജനിച്ച ഡിയാഗോ ജൂനിയര് സിനാഗ്രയാണു, പ്രായം കണക്കിലെടുത്താല് മറഡോണയുടെ മൂത്ത മകന്. 1995-ല് ഇറ്റാലിയന് കോടതി മകനെന്നു വിധിച്ചിട്ടും മറഡോണ അംഗീകരിച്ചില്ല. ഒടുവില് ജൂനിയറിന് 30 വയസ്സായപ്പോള്, 2016-ല് താരം മനസ്സു മാറ്റി മകനെ അംഗീകരിച്ചു. ഒപ്പമുള്ള ചിത്രം പങ്കുവച്ച്, 'അവന് എന്നെപ്പോലെ ' എന്നു കുറിക്കുകയും ചെയ്തു.
നൈറ്റ് ക്ലബ്ബ് ജീവനക്കാരി വലേരിയ സബലൈനുമായുള്ള ബന്ധത്തില് ജനിച്ച ജന ഇപ്പോള് അറിയപ്പെടുന്ന മോഡലാണ്.
കഴിഞ്ഞ വര്ഷമാണ് ക്യൂബയില് 2 സ്ത്രീകളിലായി 3 മക്കളുണ്ടെന്ന് മറഡോണ വെളിപ്പെടുത്തിയത്. ജുവാന, ലു, ജാവിയെലിറ്റോ എന്നിവരുടെ അമ്മമാരെക്കുറിച്ച് പക്ഷേ, താരം പറഞ്ഞില്ല. ലഹരി വിരുദ്ധ ചികില്സയുടെ ഭാഗമായി 2000-05 കാലത്ത് ഹവാനയില് താമസിച്ച കാലത്തിന്റെ ശേഷിപ്പ്.
ദീര്ഘകാല പങ്കാളിയായിരുന്ന വെറോണിക്കാ ഒജേഡയില് ജനിച്ച ഡിയഗോ ഫെര്ണാണ്ടോയാണ് (ഏഴ്) അറിയപ്പെടുന്നതില് ഏറ്റവും ചെറിയ കുഞ്ഞ്.
മറഡോണയുടെ മദ്യാസക്തിയില് മനംമടുത്ത് 2018-ല് ബന്ധം ഉപേക്ഷിച്ച അര്ജന്റീന വനിതാ ഫുട്ബോള് ടീം അംഗമായിരുന്ന റോക്കിയോ ഒലീവയായിരുന്നു അവസാന പങ്കാളിയെങ്കിലും ഈ ബന്ധത്തില് മക്കളില്ല. 30 വയസ്സിനു ഇളപ്പമായിരുന്നു അവര്.
മഗലി ഗില്, സാന്തിയാഗോ ലാറ എന്നിവര് മറഡോണയുടെ മക്കളാണെന്നവകാശപ്പെട്ടു ഈയിടെ രംഗത്തെത്തി. അവകാശം സ്ഥാപിച്ചു കിട്ടാന് കോടതിയെ സമീപിക്കുമെന്നും ഇവര് അറിയിച്ചിരുന്നു.
ഭക്ഷണം കഴിച്ചെന്ന് കള്ളം പറഞ്ഞ്, മക്കള്ക്കു രണ്ടുരുള അധികം നല്കുന്ന അമ്മ ഡാല്മയുടെ സ്നേഹ വായ്പിനെക്കുറിച്ച് ജീവിതകഥയില് മറഡോണ പറയുന്നുണ്ട്. അമ്മയോടുള്ള സ്നേഹവും ആദരവും 'തോത്ത, ഐ ലവ് യൂ' എന്ന പച്ചകുത്തലായി മറഡോണയുടെ ശരീരത്തിലുണ്ടായിരുന്നു. കുടുംബ സ്നേഹത്തിന്റെ അടിത്തറ ഭദ്രമായിരുന്നിട്ടും മറഡോണ വഴി മാറി സഞ്ചരിച്ചു. ഇനി അദ്ദേഹത്തിന്റെ സ്വത്തിന്റെ അവകാശികള് ആരൊക്കെയാകും എന്നതിന് ഉത്തരം കണ്ടെത്തുന്നതിന് റഫറിയുടെ റോളില് കോടതി കളത്തിലിറങ്ങേണ്ടിവരും.
https://www.facebook.com/Malayalivartha