ബിഗ് ബോസ് മലയാളം ആദ്യ സീസണിലായിരുന്നു പേളിയും ശ്രീനീഷും പരിചയപ്പെടുന്നതും അടുക്കുന്നതും. ബിഗ് ബോസില്‍ മൊട്ടിട്ട പ്രണയം പ്രേക്ഷകരും ആവേശത്തോടെ സ്വീകരിച്ചതിന് പിന്നാലെയായിരുന്നു ഇവരുടെ വിവാഹം.

മാര്‍ച്ച്‌ 20 നാണ് പേളി മാണിക്കും ശ്രിനീഷ് അരവിന്ദിനും പെണ്‍കുഞ്ഞ് ജനിച്ചത്. ജിവിതത്തിലെ ഓരോ ചെറിയ വിശേഷങ്ങളും സോഷ്യല്‍മീഡിയയിലൂടെ ആരാധകരുമായി പങ്കുവെക്കുന്ന താരമാണ് പേളി മാണി.

കുഞ്ഞ് ജനിച്ചപ്പോഴുള്ള ചിത്രവും പേളി ആരാധകര്‍ക്കായി സോഷ്യല്‍മീഡിയയില്‍ പങ്കുവെച്ചിരുന്നു.

ഇപ്പോഴിതാ കുഞ്ഞിന്റെ ഏറ്റവും പുതിയ ചിത്രവും ഒപ്പം പേരും പുറത്തുവിട്ടിരിക്കുകയാണ് താരദമ്ബതികള്‍. നില ശ്രീനീഷ് എന്നാണ് കുഞ്ഞിന് പേരിട്ടിരിക്കുന്നത്. മകള്‍ക്കൊപ്പമുള്ള കുടുംബ ചിത്രത്തിനൊപ്പം മനോഹരമായ കുറിപ്പും പേളി പങ്കുവെച്ചിട്ടുണ്ട്.

തങ്ങളുടെ ജീവിതം സന്തോഷകരവും കൂടുതല്‍ മനോഹരവുമാക്കിയത് മകളാണെന്ന് പേളി പറയുന്നു. മകള്‍ക്കൊപ്പം ജീവിതത്തില്‍ കൂടുതല്‍ സാഹസികതകള്‍ ചെയ്യാനാവട്ടെയെന്നും പേളി പറയുന്നു.

ശ്രീനീഷിനോടായി നിലാ എന്ന പേരുള്ള ഏറ്റവും ഇഷ്ടപ്പെട്ട ഗാനം ഏതാണെന്ന് പറയാനും പേളി ആവശ്യപ്പെടുന്നു. മകളുടെ പേരുള്ള തനിക്ക് ഏറ്റവും ഇഷ്ടപ്പെട്ട ഗാനവും പേളി പങ്കുവെച്ചു.

എആര്‍ റഹ്മാന്‍ ഈണമിട്ട് ഹരിണി പാടിയ ഇന്ദിര എന്ന ചിത്രത്തിലെ നിലാ കായ്ഗിരത് എന്ന ഗാനമാണ് പേളി പങ്കുവെച്ചിരിക്കുന്നത്. മകള്‍ക്ക് എന്തുകൊണ്ട് നില എന്ന് പേര് നല്‍കി എന്നതിനെ കുറിച്ചും പേളി വിശദീകരിക്കുന്നു,

" അവളെ ആദ്യമായി ഞങ്ങളുടെ കൈകളില്‍ പിടിച്ചപ്പോള്‍ ചന്ദ്രന്റെ ഒരു കഷണം കയ്യില്‍വെച്ചിരിക്കുന്നതായാണ് തോന്നിയത്. അത്ര വിലപ്പെട്ടതായിരുന്നു. സ്വപ്നം യാഥാര്‍ത്ഥ്യമായി. ഏറ്റവും പവിത്രവും ദൈവികവുമായ അനുഭവം. അതിനാല്‍, നിലാവിന്റെ പേര് തന്നെ മകള്‍ക്കിടാന്‍ തീരുമാനിച്ചു".