ലിംഗമാറ്റ ശസ്ത്രക്രിയയ്‌ക്ക് ഒരു കാരണവശാലും ഇപ്പോഴത്തെ സാഹചര്യത്തില്‍ കേരളത്തിലെ ആശുപത്രികളെ സമീപിക്കരുതെന്ന് ആക്ടിവിസ്റ്റായ സുകന്യ കൃഷ്ണ വ്യക്തമാക്കുകയാണ്. അല്‍പം ചിലവ് കുറവുണ്ട് എന്ന് കരുതി ആശുപത്രികൾ തിരഞ്ഞെടുക്കരുത്. ആരോഗ്യത്തേക്കാള്‍ വലുതല്ല പണമെന്ന് സുകന്യ കുറിക്കുകയാണ്.

സര്‍ജറി ചെയ്താല്‍ മാത്രമേ പൂര്‍ണത ലഭിക്കു എന്ന ചിന്താഗതി തെറ്റാണ്. നല്ലത് പോലെ ആലോചിച്ച്‌ മാത്രം സര്‍ജറിക്കായി മുതിരുകയെന്നും സുകന്യ കുറിയ്‌ക്കുന്നു. ഫേസ്ബുക്കിലൂടെയാണ് സുകന്യയുടെ പ്രതികരണം.

ഫേസ്ബുക്ക് കുറിപ്പിന്റെ പൂര്‍ണരൂപം

ലിംഗമാറ്റ ശസ്ത്രക്രിയയ്‌ക്ക് വിധേയരാകാന്‍ ആഗ്രഹിക്കുന്ന എന്റെ എല്ലാ സുഹൃത്തുക്കളോടും സ്ഥിരമായി പറയാറുള്ള ചില കാര്യങ്ങള്‍ ഉണ്ട്.

1. ഒരിക്കലും ഒരു പ്ലാസ്റ്റിക്ക് സര്‍ജന്റെ മുന്നില്‍ ബോട്ടം സര്‍ജറിക്കായി പോകരുത്, യൂറോളജിസ്റ്റ് ആയ ഒരു ഡോക്ടറെ സമീപിക്കുക.
2. നിങ്ങള്‍ ഏത് തരം സര്‍ജറി ആണ് ആഗ്രഹിക്കുന്നത് എന്ന് സ്വയം കണ്ടെത്തുക, അതിനായി മറ്റുള്ളവരുടെ അഭിപ്രായങ്ങള്‍ തേടരുത്.
3. സര്‍ജറിക്ക് പോകും മുന്‍പ് സര്‍ജറി എന്താണെന്ന് വ്യക്തമായി പഠിക്കുക. പലവിധം സര്‍ജറികളും ഇന്ന് നിലവിലുണ്ട്. അതില്‍ നിങ്ങള്‍ക്ക് ഏറ്റവും അനുയോജ്യം എന്ന് കരുതുന്നത് നിങ്ങള്‍ തിരഞ്ഞെടുക്കുക.
4. നിര്‍ബന്ധമായും ഒരു സൈക്കോളജിക്കല്‍ ഇവാലുവേഷന് വിധേയമാകുക. നിങ്ങള്‍ ശരിക്കും ഈ സര്‍ജറി ആഗ്രഹിക്കുന്നുണ്ട് എന്ന് ഉറപ്പ് വരുത്തുക. സര്‍ജറിക്ക് മുന്‍പ് സര്‍ജറിക്കായി അടങ്ങാത്ത അഭിനിവേശം ഉള്ളവര്‍ക്ക് പോലും, പിന്നീട് അത് വേണ്ടായിരുന്നു എന്ന് തോന്നാറുണ്ട് എന്ന് മനസ്സിലാക്കുക.
5. നിങ്ങളുടെ ശരീരം ഒരു പരീക്ഷണ വസ്തു ആകും എന്ന് തോന്നിയാല്‍, 'വരുന്നത് വരട്ടെ' എന്ന രീതിയില്‍ മുന്നോട്ട് പോകാതിരിക്കുക. കാരണം ഒരിക്കല്‍ ചെയ്താല്‍ പിന്നെ ഒരു മടങ്ങി പോക്കില്ലാത്ത ഒന്നാണ് ഈ സര്‍ജറി.
6. നിങ്ങളുടെ സുഹൃത്തുക്കളുമായി നിങ്ങളെ താരതമ്യം ചെയ്യാതെ ഇരിക്കുക. നിങ്ങളുടെ സുഹൃത്ത് അവരുടെ ഏറ്റവും നല്ല വശം മാത്രമായിരിക്കും നിങ്ങളുടെ മുന്നില്‍ പ്രകടിപ്പിച്ചിട്ടുണ്ടാകുക. ഒരു മറുവശം എല്ലാവര്‍ക്കുമുണ്ട് എന്ന ബോധം വളര്‍ത്തുക.
7. നിങ്ങള്‍ക്ക് ചുറ്റുമുള്ള നിങ്ങളുടെ കമ്മ്യൂണിറ്റി മെമ്ബര്‍മാര്‍ തന്നെ നിങ്ങളെ സര്‍ജറിക്ക് പ്രോത്സാഹിപ്പിച്ചേക്കാം. അല്ലെങ്കില്‍, സര്‍ജറി ചെയ്യാത്ത നിങ്ങളെ പരിഹസിച്ചേക്കാം. അതൊക്കെ ഒരു ചെവിയിലൂടെ കേട്ട് മറുചെവിയിലൂടെ കളയുക.
8. ഒരു കാരണവശാലും ഹിജഡ സംസ്കാരത്തില്‍ എത്തിപ്പെടാതിരിക്കുക. വിശാലമായ ഒരു ലോകം നിങ്ങളുടെ മുന്നിലുണ്ട്. അവിടെ സ്വാതന്ത്ര്യം എന്ന ഒരു നിധിയുണ്ട്. സര്‍വ സുലഭമായി തന്നെ.
9. സര്‍ജറി ചെയ്താല്‍ മാത്രമേ പൂര്‍ണത ലഭിക്കൂ എന്ന ചിന്താഗതി തെറ്റാണ്. നല്ലത് പോലെ ആലോചിച്ച്‌ മാത്രം സര്‍ജറിക്കായി മുതിരുക.
10. ഇപ്പോഴത്തെ സാഹചര്യത്തില്‍ ഒരു കാരണവശാലും കേരളത്തിലെ ആശുപത്രികളില്‍ സര്‍ജറിക്ക് വിധേയരാകാതിരിക്കുക.
11. അല്പം ചിലവ് കുറവുണ്ട് എന്ന് കരുതി ആശുപത്രി തിരഞ്ഞെടുക്കരുത്. ആരോഗ്യത്തേക്കാള്‍ വലുതല്ല പണം.
12. നമുക്ക് ചുറ്റുമുള്ള ലോകം അനുദിനം മാറുകയാണ്. ഇന്നലെ നമ്മെ കളിയാക്കിവര്‍ ഇന്ന് നമ്മെ അംഗീകരിക്കുന്നു. ഇന്ന് നമ്മെ കളിയാക്കുന്നവര്‍ നാളെ നമ്മെ അംഗീകരിക്കാനുള്ളവര്‍ മാത്രമാണ്.

നിങ്ങള്‍ക്ക് ഏത് സമയത്തും എന്ത് കാര്യത്തിനും എന്നെ കോണ്‍ടാക്‌ട് ചെയ്യാവുന്നതാണ്. എന്നാല്‍ കഴിയുന്ന എന്ത് സഹായവും ഒരു സുഹൃത്തെന്ന നിലയില്‍ തീര്‍ച്ചയായും നിങ്ങള്‍ക്ക് ചെയ്യും. ഉറപ്പ്.

ഞാന്‍ എന്ത് കരുതും എന്ന് കരുതി ഉപേക്ഷ വിചാരിക്കേണ്ട യാതൊരു ആവശ്യകതയും ഇല്ല.
കടുത്ത തീരുമാനങ്ങള്‍ എടുക്കും മുന്നേ, ഒന്ന് വിളിക്കാം.
പ്രിയ സുഹൃത്ത്,
സുകന്യ കൃഷ്ണ