ഈഡന് ഗാര്ഡന്സില് നടക്കുന്ന ആദ്യ രാത്രി-പകല് ടെസ്റ്റ് മത്സരത്തില് ധോണി ക്രിക്കറ്റ് കമന്റേറ്ററായി എത്തിയേക്കും
കൊല്ക്കത്ത ഈഡന് ഗാര്ഡന്സില് നടക്കുന്ന ഇന്ത്യ-ബംഗ്ലദേശ് രണ്ടാം ടെസ്റ്റില് ഇന്ത്യന് ക്രിക്കറ്റ് ടീമിന്റെ മുന് നായകന് മഹേന്ദ്രസിങ് ധോണി കമന്റേറ്ററുടെ വേഷത്തിലെത്തിയേക്കും. മത്സരത്തിന്റെ സംപ്രേക്ഷണാവകാശം കയ്യാളുന്ന സ്റ്റാര് സ്പോര്ട്സ്, ചരിത്ര ടെസ്റ്റ് മഹാസംഭവമാക്കുന്നതിന് ഇതുള്പ്പെടെ ശ്രദ്ധേയമായ ഒരുപിടി പദ്ധതികളാണ് ബിസിസിഐയ്ക്കു മുന്നില് സമര്പ്പിച്ചിരിക്കുന്നത്.ആദ്യ രാത്രിപകല് ടെസ്റ്റ് മത്സരമെന്ന നിലയില് ഇന്ത്യന് ക്രിക്കറ്റില് പുതിയ ചരിത്രമെഴുതുന്ന ടെസ്റ്റിനൊപ്പമുള്ള ഇതിഹാസ നായകന്റെ പുതിയ വേഷപ്പകര്ച്ചയ്ക്കായി ആകാംക്ഷയോടെ കാത്തിരിക്കുകയാണ് ആരാധകര്.
ഇന്ത്യന് ക്രിക്കറ്റിലെ എല്ലാ ടെസ്റ്റ് നായകന്മാരെയും ചരിത്ര ടെസ്റ്റിന്റെ ആദ്യ രണ്ടു ദിവസം ഈഡന് ഗാര്ഡന്സിലേക്കു ക്ഷണിക്കാനുള്ള നീക്കമുണ്ട്. നിലവിലെ ക്യാപ്റ്റന് വിരാട് കോലിക്കും സംഘത്തിനുമൊപ്പം മുന് നായകന്മാരെയും ദേശീയ ഗാനത്തിന് അണിനിരത്താനാണ് ശ്രമം. അതിനുശേഷം ഓരോ ക്യാപ്റ്റന്മാരും ഊഴം വച്ച് കമന്ററി ബോക്സില് അതിഥിയായെത്തും. അവരുടെ നായക കാലയളവിലെ ചരിത്ര നിമിഷങ്ങള് ആരാധകര്ക്കായി വിവരിക്കും.
ഓരോ ക്യാപ്റ്റന്റെയും പ്രത്യേക അഭിമുഖങ്ങളെടുത്ത് നാലാം ദിനം മുതല് ഇടവേള സമയത്ത് ഗ്രൗണ്ടിലെ വലിയ സ്ക്രീനില് പ്രദര്ശിപ്പിക്കാനുള്ള പദ്ധതിയും സ്റ്റാര് സ്പോര്ട്സ് ബിസിസിഐയ്ക്കു മുന്നില് വച്ചിട്ടുണ്ട്. ഈ പദ്ധതിയുടെ ഭാഗമായാണ് ധോണിയെ കമന്റേറ്ററിന്റെ വേഷത്തില് എത്തിക്കാനുള്ള ശ്രമം. മത്സരത്തിന്റെ ആദ്യ ദിനമാകും ധോണി കമന്ററി പറയാനെത്തുക.
മത്സരത്തിനായി എല്ലാ മുന് ക്യാപ്റ്റന്മാരെയും ക്ഷണിച്ചുകൊണ്ടുള്ള കത്ത് അയച്ചുകഴിഞ്ഞു. ക്ഷണം സ്വീകരിച്ചാല് ധോണിയെ ചരിത്രത്തിലാദ്യമായി കമന്റേറ്റര് വേഷത്തില് കാണാം. 2019 ഏകദിന ലോകകപ്പ് സെമിയില് ഇന്ത്യ പുറത്തായശേഷം ധോണിയെ കളത്തില് കണ്ടിട്ടില്ലാത്ത ആരാധകര്ക്ക് ബിസിസിഐ സമ്മാനിക്കുന്ന അപൂര്വമായൊരു സമ്മാനവുമാകും ഇത്.
മത്സരത്തിനു മുന്നോടിയായി തലേന്ന് ഇന്ത്യന് താരങ്ങളുടെ പരിശീലനം കാണാന് സ്റ്റേഡിയത്തില് സൗജന്യ പ്രവേശനവും ബിസിസിഐ അനുവദിച്ചിട്ടുണ്ട്. മത്സരത്തിനായി ഓഡിയോ കമന്ററി മാത്രമായും പരീക്ഷിക്കാന് നീക്കം നടത്തുന്നുണ്ട്. മത്സരവേദിയിലെത്തുന്നവര്ക്കായി ഓഡിയോ കമന്ററി തയാറാക്കാനാണ് നീക്കം.
അതിനിടെ, ഇന്ത്യന് ക്രിക്കറ്റില് വിപ്ലവകരമായ മാറ്റങ്ങള്ക്ക് നാന്ദി കുറിച്ച 2001ലെ ഓസ്ട്രേലിയയ്ക്കെതിരായ ടെസ്റ്റ് വിജയം ഈ ചരിത്ര ടെസ്റ്റിനിടെ ആഘോഷിക്കാനും സംഘാടകര്ക്കു പദ്ധതിയുണ്ട്. മത്സരത്തിന്റെ മൂന്നാം ദിനം ഉച്ചഭക്ഷണ സമയത്ത് അന്നത്തെ ചരിത്ര വിജയത്തില് പ്രധാന പങ്കുവഹിച്ച താരങ്ങളെ ആദരിക്കാനാണ് തീരുമാനം. വി.വി.എസ്. ലക്ഷ്മണ്, സൗരവ് ഗാംഗുലി, ഹര്ഭജന് സിങ്, അനില് കുംബ്ലെ, രാഹുല് ദ്രാവിഡ് എന്നിവരെയാകും ചടങ്ങില് ആദരിക്കുക. ചടങ്ങിന്റെ ഭാഗങ്ങള് പിന്നീട് മത്സരത്തിന്റെ ഇടവേളകളില് സംപ്രേക്ഷേപണം ചെയ്യാനാണ് തീരുമാനം.
പിങ്ക് ബോള് ടെസ്റ്റിന്റെ തലേന്ന് ഇന്ത്യന് ടീമിന്റെ പരിശീലനം ലൈവായി ടെലകാസ്റ്റ് ചെയ്യാനും സ്റ്റാര് സ്പോര്ട്സിനു പദ്ധതിയുണ്ട്. ഇന്ത്യന് ക്രിക്കറ്റിന്റെ ചരിത്രത്തിലാദ്യമായിട്ടാകും പരിശീലന സെഷന് ലൈവായി ടെലകാസ്റ്റ് ചെയ്യുന്നത്.
അതേസമയം, അനില് കുംബ്ലെ, രാഹുല് ദ്രാവിഡ് എന്നിവരുടെ പേരുകള്ക്കൊപ്പം ബ്രായ്ക്കറ്റില് ചോദ്യചിഹ്നവും ഉള്ളത് ഊഹാപോഹങ്ങള്ക്ക് കാരണമായി. ഇരുവരും മത്സരത്തിനെത്തുന്ന കാര്യം സ്ഥിരീകരിക്കാത്തതിനാലാണ് ഇവരുടെ പേരിനൊപ്പം ചോദ്യചിഹ്നമെന്നാണ് വിശദീകരണം.
https://www.facebook.com/Malayalivartha
