ഇന്ത്യയ്‌ക്കെതിരായ രണ്ടാം ടെസ്റ്റിലും ന്യൂസിലന്‍ഡിനു തകര്‍പ്പന്‍ ജയം. മൂന്നാംദിനം ഇന്ത്യ ഉയര്‍ത്തിയ 132 റണ്‍സ് വിജയലക്ഷ്യം മൂന്നു വിക്കറ്റ് നഷ്ടത്തില്‍ ന്യൂസിലന്‍ഡ് മറികടന്നു. ലാഥത്തിന്റെയും (52) ബ്ലന്‍ഡലിന്റെയും (55) അര്‍ധ സെഞ്ചുറികളാണ് ന്യൂസിലന്‍ഡിന്റെ ജയം വേഗത്തിലാക്കിയത്.
ലാഥമിനെ ഉമേഷ് യാദവും ബ്ലന്‍ഡലിനെ ജസ്പ്രീത് ബുംറയും പവലിയന്‍ കയറ്റിയപ്പോഴേയ്ക്കും ഇന്ത്യ മത്സരം കൈവിട്ടിരുന്നു. രണ്ടാം ഇന്നിംഗ്‌സില്‍ ബുംറയ്ക്ക് രണ്ടു വിക്കറ്റ് വീഴ്ത്തി. ജയത്തോടെ ടെസ്റ്റ് പരമ്ബര ന്യൂസിലന്‍ഡ് സ്വന്തമാക്കി. നേരത്തെ ആറിന് 90 റണ്‍സെന്ന നിലയ്ക്ക് മൂന്നാം ദിനം ബാറ്റിംഗ് പുനഃരാരംഭിച്ച ഇന്ത്യയെ 124 റണ്‍സിന് ന്യൂസിലന്‍ഡ് വീഴത്തി.
രണ്ടാം ഇന്നിംഗ്‌സില്‍ കിവീസിനായി ട്രെന്‍ഡ് ബോള്‍ട്ടും (14 ഓവറില്‍ 4/28) സൗത്തിയും(11 ഓവറില്‍ 3/36) മികച്ച പ്രകടനം പുറത്തെടുത്തു. കോളിന്‍ ഡി ഗ്രാന്‍ഡ്ഹോം, നീല്‍ വാഗ്‌നര്‍ എന്നിവര്‍ ഓരോ വിക്കറ്റ് വീതം നേടി.