ഐപിഎല്ലിന് തയാറെടുക്കാന്‍ മുന്‍ ഇന്ത്യന്‍ ക്രിക്കറ്റ് ടീം ക്യാപ്റ്റന്‍ എം.എസ്. ധോണി ചെന്നൈയിലെത്തി. സൂപ്പര്‍ കിംഗ്‌സ് ആരാധകര്‍ അദ്ദേഹത്തിന് വന്‍ വരവേല്‍പ്പാണ് നല്‍കിയത്. ഐപിഎല്‍ മത്സരങ്ങള്‍ ഈ മാസം തുടങ്ങുന്നതിനായി ചെന്നൈയിലെത്തിയ ധോണിയുടെ വിഡിയോ ദൃശ്യങ്ങള്‍ ചെന്നൈ സൂപ്പര്‍ കിങ്‌സ് ടീം ഔദ്യോഗിക ട്വിറ്റര്‍ പേജില്‍ പങ്കുവച്ചിട്ടുണ്ട്.

ധോണി മാര്‍ച്ച് മൂന്നിനും നാലിനും ചെന്നൈയില്‍ പരിശീലിക്കുമെന്നു ചെന്നൈ സൂപ്പര്‍ കിങ്‌സ് സിഇഒ കാശി വിശ്വനാഥന്‍ പ്രതികരിച്ചു. മാര്‍ച്ച് 19-ന് ശേഷമായിരിക്കും ഔദ്യോഗികമായി ചെന്നൈയുടെ പരിശീലന ക്യാംപ് ആരംഭിക്കുക. ഇംഗ്ലണ്ടില്‍ നടന്ന ഏകദിന ലോകകപ്പോടെ ക്രിക്കറ്റില്‍നിന്ന് താല്‍ക്കാലിക അവധിയെടുത്ത ധോണി ഐപിഎല്ലില്‍ തിരിച്ചുവരവ് ഗംഭീരമാക്കാനാണ് ഒരുങ്ങുന്നത്. എട്ട് മാസങ്ങള്‍ക്കു ശേഷമാണ് ധോണി ക്രിക്കറ്റ് ഗ്രൗണ്ടില്‍ കളിക്കാന്‍ ഇറങ്ങുന്നത്. മാര്‍ച്ച് 29-ന് തുടങ്ങുന്ന ഐപിഎല്ലില്‍ ചെന്നൈ സൂപ്പര്‍ കിങ്‌സും മുംബൈ ഇന്ത്യന്‍സും തമ്മിലാണ് ആദ്യ മത്സരം.

നൂറു കണക്കിന് സിഎസ്‌കെ ആരാധകരാണ് ചെന്നൈയില്‍ ധോണിയെ സ്വീകരിക്കാന്‍ വിമാനത്താവളത്തിലെത്തിയത്. ചെന്നൈ സൂപ്പര്‍ കിങ്‌സ് മാനേജര്‍ റസല്‍ രാധാകൃഷ്ണന്‍ വിമാനത്താവളത്തില്‍നിന്ന് ധോണിയെ ടീം താമസിക്കുന്ന ഹോട്ടലിലേക്കു കൊണ്ടുപോയി. ഐപിഎല്ലിലെ ധോണിയുടെ പ്രകടനം അനുസരിച്ചായിരിക്കും രാജ്യാന്തര ക്രിക്കറ്റിലെ അദ്ദേഹത്തിന്റെ തിരിച്ചുവരവെന്ന് ബിസിസിഐ അധ്യക്ഷന്‍ സൗരവ് ഗാംഗുലിയും ഇന്ത്യന്‍ ക്രിക്കറ്റ് ടീം പരിശീലകന്‍ രവി ശാസ്ത്രിയും നേരത്തേ വ്യക്തമാക്കിയിട്ടുണ്ട്.

പിയൂഷ് ചൗള, അംബാട്ടി റായുഡു, കരണ്‍ ശര്‍മ എന്നീ താരങ്ങളും ചെന്നൈയിലെത്തിയിട്ടുണ്ട്. സീനിയര്‍ താരമായ പിയൂഷ് ചൗളയെ 6.75 കോടി രൂപയ്ക്കാണു ചെന്നൈ സൂപ്പര്‍ കിങ്‌സ് ടീമിലെത്തിച്ചത്. സുരേഷ് റെയ്‌ന, അംബാട്ടി റായുഡു എന്നിവര്‍ക്കൊപ്പം ധോണി ചെന്നൈയില്‍ പരിശീലിക്കുമെന്നു ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. ഇതിനു ശേഷം ഐപിഎല്‍ തുടങ്ങുന്നതിനു മുന്‍പ് നാട്ടിലേക്കു വീണ്ടും പോയി തിരിച്ചവരും. റെയ്‌നയും റായുഡുവും മൂന്നാഴ്ചയായി ചെന്നൈയില്‍ പരിശീലനത്തിലുണ്ട്.