ഹരിയാനയുടെ പ്രമുഖ താരവും രഞ്ജി ട്രോഫി ക്രിക്കറ്റില്‍ ഏറ്റവും കൂടുതല്‍ വിക്കറ്റെടുത്ത സ്പിന്നറുമായ രാജീന്ദര്‍ ഗോയല്‍ (77) ദീര്‍ഘനാളത്തെ അസുഖത്തെ തുടര്‍ന്ന് അന്തരിച്ചു.

ഹരിയാനയുടെ പ്രമുഖ താരമായിരുന്ന അദ്ദേഹം 53 തവണ അഞ്ച് വിക്കറ്റ് നേട്ടവും 17 തവണ പത്ത് വിക്കറ്റ് നേട്ടവും കുറിച്ചു. മികച്ച സ്പിന്നറായിരുന്നെങ്കിലും ഇന്ത്യന്‍ ടീമില്‍ കളിക്കാനുള്ള ഭാഗ്യമുണ്ടായില്ല. 1964-65 സീസണില്‍ സിലോണിനെതിരേ (ഇന്നത്തെ ശ്രീലങ്ക) നടന്ന അനൗദ്യോഗിക ടെസ്റ്റില്‍ കളിച്ചത് മാത്രമാണ് എടുത്തു പറയാനുള്ളത്.

1958 മുതല്‍ 1985 വരെ 157 ഫസ്റ്റ് ക്ലാസ് ക്രിക്കറ്റ് മത്സരങ്ങള്‍ കളിച്ച ഗോയല്‍ 750 വിക്കറ്റുകളെടുത്തു. ഇടംകൈയന്‍ സ്പിന്നറായിരുന്ന ഗോയല്‍ രഞ്ജി ട്രോഫിയില്‍ 637 വിക്കറ്റുകളെടുത്തിട്ടുണ്ട്.

1979 സെപ്റ്റംബറില്‍ ഓസ്ട്രേലിയന്‍ ടീമിനെതിരേ വടക്കന്‍ മേഖലയ്ക്കു വേണ്ടി ആറു വിക്കറ്റെടുത്തതു രാജീന്ദര്‍ ഗോയലിന്റെ കരിയറിലെ പൊന്‍തൂവലാണ്. 43-ാം വയസുവരെ ഫസ്റ്റ് ക്ലാസ് ക്രിക്കറ്റില്‍ തുടര്‍ന്നു.

താരമെന്ന നിലയില്‍ രഞ്ജി ട്രോഫി നേടാനാവാത്തത് ്അദ്ദേഹത്തിന്റെ ഏറ്റവും വലിയ നിരാശയിലൊന്നായിരുന്നു. പിന്നീട് അദ്ദേഹം സെലക്ഷന്‍ കമ്മിറ്റി ചെയര്‍മാനായിരിക്കേ 1991-ല്‍ ഹരിയാന ബോംബെയെ (ഇന്നത്തെ മുംബൈ) അട്ടിമറിച്ച് രഞ്ജി കിരീടം നേടി. വാങ്കഡെ സ്റ്റേഡിയത്തില്‍ നടന്ന ഫൈനലില്‍ ഹരിയാനയെ നയിച്ചത് ഇന്ത്യന്‍ ടീമിന്റെ നായകനും ഓള്‍റൗണ്ടറുമായിരുന്ന കപില്‍ ദേവാണ്.

പുരുഷ, വനിതാ ടീമുകളുടെ മാച്ച് റഫറിയായും ഏറെനാള്‍ പ്രവര്‍ത്തിച്ചു. മികച്ച സേവനം പരിഗണിച്ച് 2017-ല്‍ ഗോയലിന് സി.കെ. നായിഡു ലൈഫ് ടൈം അച്ചീവ്മെന്റ് അവാര്‍ഡ് നല്‍കി ബി.സി.സി.ഐ. ആദരിച്ചു.

ഈ പുരസ്‌കാരം നേടുന്ന ടെസ്റ്റ് കളിക്കാത്ത താരങ്ങളില്‍ നാലാമനാണ്. പദ്മാകര്‍ ശിവാല്‍കര്‍, ഭാഹുസാഹബ് നിംബാല്‍കര്‍, മാധ്യമ പ്രവര്‍ത്തകന്‍ കെ.എന്‍. പ്രഭു എന്നിവരാണു മറ്റുള്ളവര്‍.