ഇന്നലെ ഐ പി എല്ലിലെ ആദ്യ മത്സരത്തില്‍ സണ്‍റൈസേഴ്‌സ് ഹൈദരാബാദിനെതിരെ 159 റണ്‍സ് വിജയലക്ഷ്യം പിന്തുടര്‍ന്ന രാജസ്ഥാന്‍ ഒരു ഘട്ടത്തില്‍ അഞ്ചിന് 78 റണ്‍സ് എന്ന നിലയില്‍ തകര്‍ന്നെങ്കിലും, അവസാന ഓവറുകളിലെ വിസ്മയ പ്രകടനത്തിലൂടെ തെവാത്തിയയും പരാഗും ടീമിനെ വിജയത്തിലെത്തിച്ചു. ഒരു പന്തു ബാക്കിനില്‍ക്കെ അഞ്ച് വിക്കറ്റ് നഷ്ടത്തിലാണ് രാജസ്ഥാന്‍ വിജയലക്ഷ്യം മറികടന്നത്. തെവാത്തിയ-പരാഗ് സഖ്യം ആറാം വിക്കറ്റില്‍ വെറും 47 പന്തില്‍നിന്ന് 85 റണ്‍സ് അടിച്ചുകൂട്ടിയാണ് ടീമിന് വിജയം സമ്മാനിച്ചത്. അവസാന നാല് ഓവറില്‍നിന്ന് മാത്രം ഈ സഖ്യം 58 റണ്‍സാണ് അടിച്ചുകൂട്ടിയത്. സീസണില്‍ രാജസ്ഥാന്റെ മൂന്നാമത്തെ വിജയമാണിത്. തുടര്‍ച്ചയായ നാലു തോല്‍വികള്‍ക്കു ശേഷമുള്ള ആദ്യ ജയവും. തെവാത്തിയ 28 പന്തില്‍ നാലു ഫോറും രണ്ടു സിക്‌സും സഹിതം 45 റണ്‍സോടെയും റയാന്‍ പരാഗ് 26 പന്തില്‍ രണ്ടു വീതം സിക്‌സും ഫോറും സഹിതം 42 റണ്‍സോടെയും പുറത്താകാതെ നിന്നു.

ഐ പി എല്‍ പോയിന്റ് പട്ടികയിലെ ഒന്നും രണ്ടും സ്ഥാനക്കാരായ ഡല്‍ഹി ക്യാപിറ്റല്‍സും മുംബൈ ഇന്ത്യന്‍സും നേര്‍ക്കുനേര്‍ എത്തിയ ഇന്നലത്തെ രണ്ടാമത്തെ മല്‍സരത്തില്‍ മുംബൈ ഇന്ത്യന്‍സിന് ജയം. വിജയത്തോടെ മുംബൈ പോയിന്റ് പട്ടികയില്‍ ഒന്നാം സ്ഥാനത്തേക്ക് കയറി. ഡല്‍ഹി രണ്ടാം സ്ഥാനത്തുണ്ട്.

ആദ്യം ബാറ്റു ചെയ്ത ഡല്‍ഹി ഈ സീസണിലെ ആദ്യത്തെ അര്‍ധസെഞ്ചുറി കണ്ടെത്തിയ ഓപ്പണര്‍ ശിഖര്‍ ധവാന്റെ മികവില്‍ നിശ്ചിത 20 ഓവറില്‍ നാലു വിക്കറ്റ് നഷ്ടത്തില്‍ 162 റണ്‍സാണെടുത്തത്. ധവാന്‍ 52 പന്തില്‍ ആറു ഫോറും ഒരു സിക്‌സും സഹിതം 69 റണ്‍സോടെ പുറത്താകാതെ നിന്നു. ക്യാപ്റ്റന്‍ ശ്രേയസ് അയ്യര്‍ 33 പന്തില്‍ 42 റണ്‍സെടുത്ത് പുറത്തായി. മുംബൈയ്ക്കായി ക്രുനാല്‍ പാണ്ഡ്യ നാല് ഓവറില്‍ 26 റണ്‍സ് മാത്രം വഴങ്ങി രണ്ടു വിക്കറ്റെടുത്തു. ട്രെന്റ് ബോള്‍ട്ട് നാല് ഓവറില്‍ 36 റണ്‍സ് വഴങ്ങി ഒരു വിക്കറ്റും വീഴ്ത്തി.

രണ്ടു പന്തുകള്‍ ബാക്കിനില്‍ക്കെ അഞ്ച് വിക്കറ്റ് നഷ്ടത്തിലാണ് ഡല്‍ഹി ഉയര്‍ത്തിയ 163 റണ്‍സ് വിജയലക്ഷ്യം പിന്തുടര്‍ന്ന മുംബൈ ലക്ഷ്യത്തിലെത്തിയത്. ഓപ്പണര്‍ ക്വിന്റന്‍ ഡികോക്ക് (36 പന്തില്‍ 53), സൂര്യകുമാര്‍ യാദവ് (32 പന്തില്‍ 53) എന്നിവരുടെ അര്‍ധസെഞ്ചുറികളാണ് മുംബൈയ്ക്ക് വിജയം സമ്മാനിച്ചത്. ഇഷാന്‍ കിഷന്‍ 15 പന്തില്‍ 28 റണ്‍സെടുത്ത് പുറത്തായി. ഡല്‍ഹിക്കായി കഗീസോ റബാദ നാല് ഓവറില്‍ 28 റണ്‍സ് മാത്രം വഴങ്ങി രണ്ടു വിക്കറ്റെടുത്തു. അക്‌സര്‍ പട്ടേല്‍, ആര്‍.അശ്വിന്‍, മാര്‍ക്കസ് സ്റ്റോയ്‌നിസ് എന്നിവര്‍ ഓരോ വിക്കറ്റ് വീഴ്ത്തി.

ക്യാപ്റ്റന്‍ രോഹിത് ശര്‍മ (12 പന്തില്‍ അഞ്ച്), ഹാര്‍ദിക് പാണ്ഡ്യ (0) എന്നിവര്‍ മുംബൈ നിരയില്‍ നിരാശപ്പെടുത്തിയെങ്കിലും കീറണ്‍ പൊള്ളാര്‍ഡും ക്രുനാല്‍ പാണ്ഡ്യയും ചേര്‍ന്ന് അവരെ വിജയത്തിലെത്തിച്ചു. പൊള്ളാര്‍ഡ് 14 പന്തില്‍ 11 റണ്‍സോടെയും പാണ്ഡ്യ ഏഴു പന്തില്‍ 12 റണ്‍സോടെയും പുറത്താകാതെ നിന്നു.