സീസണിലാദ്യമായി ആദ്യം ബാറ്റു ചെയ്യാന്‍ അവസരം ലഭിച്ച ചെന്നൈ സൂപ്പര്‍ കിങ്‌സ്, സണ്‍റൈസേഴ്‌സ് ഹൈദരാബാദിന് മുന്നിലുയര്‍ത്തിയത് 168 റണ്‍സിന്റെ വിജയലക്ഷ്യമാണ്. ടോസ് നേടി ബാറ്റിങ് തിരഞ്ഞെടുത്ത ചെന്നൈ നിശ്ചിത 20 ഓവറില്‍ ആറു വിക്കറ്റ് നഷ്ടത്തിലാണ് 167 റണ്‍സെടുത്തത്. വെറ്ററന്‍ താരങ്ങളായ ഷെയ്ന്‍ വാട്‌സനും (38 പന്തില്‍ 42), അമ്പാട്ടി റായുഡുവും (34 പന്തില്‍ 41) ചേര്‍ന്ന് മൂന്നാം വിക്കറ്റില്‍ കൂട്ടിച്ചേര്‍ത്ത 81 റണ്‍സാണ് ചെന്നൈ ഇന്നിങ്‌സിന്റെ നട്ടെല്ല്.

ചെന്നൈ ടീമില്‍ നിരാശപ്പെടുത്തിയത് ഗോള്‍ഡന്‍ ഡക്കായ ഫാഫ് ഡുപ്ലേസി, ഡ്വെയിന്‍ ബ്രാവോ എന്നിവര്‍ മാത്രം. സാം കറന്‍ (21 പന്തില്‍ 31), എം.എസ്. ധോണി (13 പന്തില്‍ 21), രവീന്ദ്ര ജഡേജ (10 പന്തില്‍ പുറത്താകാതെ 25) എന്നിവരും ഭേദപ്പെട്ട പ്രകടനം പുറത്തെടുത്തു. ദീപക് ചാഹര്‍ രണ്ടു റണ്‍സുമായി പുറത്താകാതെ നിന്നു. ഇതിനു മുന്‍പ് കഴിഞ്ഞ സീസണിലെ ഒന്നാം ക്വാളിഫയറില്‍ മുംബൈ ഇന്ത്യന്‍സിനെതിരെയാണ് ചെന്നൈ ഏറ്റവും ഒടുവില്‍ ആദ്യം ബാറ്റു ചെയ്തത്. അതിനുശേഷം 9 മത്സരങ്ങളില്‍ തുടര്‍ച്ചയായി ചേസ് ചെയ്തു. 2014-ല്‍ കൊല്‍ക്കത്ത നൈറ്റ് റൈഡേഴ്‌സും തുടര്‍ച്ചയായി ഒന്‍പത് മത്സരങ്ങളില്‍ രണ്ടാമത് ബാറ്റു ചെയ്തിട്ടുണ്ട്.

ഹൈദരാബാദിനായി നാല് ഓവറില്‍ 19 റണ്‍സ് മാത്രം വഴങ്ങി രണ്ടു വിക്കറ്റെടുത്ത സന്ദീപ് ശര്‍മയുടെ പ്രകടനം ശ്രദ്ധേയമായി. ഖലീല്‍ അഹമ്മദും രണ്ടു വിക്കറ്റ് വീഴ്ത്തിയെങ്കിലും നാല് ഓവറില്‍ 45 റണ്‍സ് വഴങ്ങി.

ചെന്നൈയുടെ 167 റണ്‍സ് പിന്തുടരാനിറങ്ങിയ സണ്‍റൈസേഴ്‌സ് പതിവുപോലെ സാവധാനമാണ് തുടങ്ങിയത്. നിലയുറപ്പിച്ചശേഷം വേഗം കൂട്ടാനായിരുന്നു പദ്ധതിയെങ്കിലും, ഇത്തവണ പാളി. സാം കറന്‍ എറിഞ്ഞ നാലാം ഓവര്‍ ഹൈദരാബാദിന് ഇരട്ട പ്രഹരമേല്‍പ്പിച്ചു. ഈ ഓവറിലെ മൂന്നാം പന്തില്‍ സാം കറന്റെ റിട്ടേണ്‍ ക്യാച്ചില്‍ 13 പന്തില്‍ 9 റണ്‍സ് മാത്രം നേടിയ ഡേവിഡ് വാര്‍ണര്‍ പുറത്തായി. നേരിട്ട രണ്ടാം പന്തില്‍ത്തന്നെ ഫോറടിച്ച് തുടങ്ങിയ മനീഷ് പാണ്ഡെയും ഇതേ ഓവറില്‍ത്തന്നെ പുറത്തായി. മൂന്നു പന്തില്‍ നാലു റണ്‍സെടുത്ത പാണ്ഡെ, ഡ്വെയിന്‍ ബ്രാവോയുടെ േനരിട്ടുള്ള ഏറില്‍ റണ്ണൗട്ടായി.

തുടര്‍ന്ന് ബെയര്‍‌സ്റ്റോ - കെയ്ന്‍ വില്യംസന്‍ സഖ്യം നിലയുറപ്പിക്കാന്‍ സമയമടുത്തതോടെ റണ്‍നിരക്ക് ഇടിഞ്ഞു. രവീന്ദ്ര ജഡേജ എറിഞ്ഞ 10-ാം ഓവറിലെ അഞ്ചാം പന്തില്‍ ബെയര്‍‌സ്റ്റോ ക്ലീന്‍ ബൗള്‍ഡായി. 24 പന്തില്‍ രണ്ടു ഫോറുകള്‍ സഹിതം 23 റണ്‍സെടുത്താണ് ബെയര്‍‌സ്റ്റോ മടങ്ങിയത്. ചെന്നൈയുമായുള്ള സണ്‍റൈസേഴ്‌സിന്റെ ആദ്യമല്‍സരത്തിലെ ഹീറോ പ്രിയം ഗാര്‍ഗാണ് തുടര്‍ന്ന് വന്നത്. ഡ്വെയിന്‍ ബ്രാവോ എറിഞ്ഞ 14-ാം ഓവറില്‍ ഗാര്‍ഗും വില്യംസനും ഓരോ ബൗണ്ടറി നേടിയെങ്കിലും തൊട്ടടുത്ത ഓവറില്‍ 18 പന്തില്‍ 16 റണ്‍സെടുത്ത ഗാര്‍ഗ് മടങ്ങി. ഗാര്‍ഗിനെ കാണ്‍ ശര്‍മയുടെ പന്തില്‍ രവീന്ദ്ര ജഡേജ ക്യാച്ചെടുത്ത് പുറത്താക്കി. പിന്നാലെ ക്രീസിലെത്തിയ വിജയ് ശങ്കര്‍ 17-ാം ഓവറില്‍ ഡ്വെയിന്‍ ബ്രാവോയ്ക്കെതിരെ ഈ മത്സരത്തില്‍ ഹൈദരാബാദിന്റെ ആദ്യ സിക്‌സര്‍ നേടിയെങ്കിലും, അതേ ഓവറില്‍ പുറത്തായി. ജഡേജയുടെ ക്യാച്ചില്‍ പുറത്താകുമ്പോള്‍ നേടിയത് ഏഴു പന്തില്‍ 12 റണ്‍സ്.

അര്‍ധസെഞ്ചുറി പൂര്‍ത്തിയാക്കിയ വില്യംസനു മുന്നിലേക്ക്, 18-ാം ഓവര്‍ എറിയാന്‍ ധോണി കാണ്‍ ശര്‍മയെ കൊണ്ടുവന്നു. ആദ്യ പന്ത് ഫോറടിച്ച വില്യംസന്‍, രണ്ടാം പന്തില്‍ വീണു. 39 പന്തില്‍ 57 റണ്‍സ് നേടിയ വില്യംസന്‍ ഷാര്‍ദുല്‍ താക്കൂറിന് ക്യാച്ച് നല്‍കി മടങ്ങി. വില്യംസന്‍ പുറത്തായെങ്കിലും അടുത്ത നാലു പന്തില്‍നിന്ന് ഒരു സിക്‌സും രണ്ടു ഫോറും സഹിതം 15 റണ്‍സടിച്ച റാഷിദ് ഖാന്‍ - ഷഹബാസ് നദീം സഖ്യം വിജയത്തിലേക്കുള്ള ദൂരം കുറച്ചു.

സണ്‍റൈസേഴ്‌സിന് അവസാന രണ്ട് ഓവറില്‍ വിജയത്തിലേക്ക് വേണ്ടിയിരുന്നത് 27 റണ്‍സ്. ഷാര്‍ദുല്‍ താക്കൂര്‍ എറിഞ്ഞ 19-ാം ഓവര്‍ നാടകീയമായിരുന്നു. ഈ ഓവറില്‍ താക്കൂര്‍ എറിഞ്ഞ രണ്ടാം പന്തില്‍ വൈഡ് സിഗ്‌നല്‍ കാണിക്കാന്‍ ഒരുങ്ങിയ അംപയര്‍, തൊട്ടുപിന്നാലെ അതില്‍നിന്ന് പിന്‍വാങ്ങിയത് കൗതുകമായി. ഈ ഓവറിലെ അവസാന പന്തില്‍ റാഷിദ് ഖാന്‍ പുറത്തായതോടെ ചെന്നൈ പിടിമുറുക്കി. ഹിറ്റ് വിക്കറ്റായി മടങ്ങുമ്പോള്‍ റാഷിദ് നേടിയത് എട്ടു പന്തില്‍ 14 റണ്‍സ്. ഡ്വെയിന്‍ ബ്രാവോ എറിഞ്ഞ അവസാന ഓവറില്‍ ഷഹബാസ് നദീമും പുറത്തായി. അഞ്ച് പന്തില്‍ അഞ്ച് റണ്‍സെടുത്ത നദീം ബ്രാവോയ്ക്ക് തന്നെ ക്യാച്ച് സമ്മാനിച്ചു. ചെന്നൈയ്ക്കായി ഡ്വെയിന്‍ ബ്രാവോ, കാണ്‍ ശര്‍മ എന്നിവര്‍ രണ്ടു വിക്കറ്റ് വീതം വീഴ്ത്തി.