ന്യൂസിലന്‍ഡ് ക്രിക്കറ്റര്‍ ജോണ്‍ റീഡ് (92) അന്തരിച്ചു. ടീമിന്റെ മുന്‍ ക്യാപ്ടനാണ്. വിസ്ഡണ്‍ ക്രിക്കറ്റര്‍ ഓഫ് ദി ഇയര്‍ ആയി 1959-ല്‍ തെരഞ്ഞെടുക്കപ്പെട്ടിട്ടുണ്ട്. രാജ്യാന്തര ക്രിക്കറ്റ് കൗണ്‍സിലിന്റെ മാച്ച് റഫറി, ക്രിക്കറ്റ് ന്യൂസിലന്‍ഡ് സെലക്ടര്‍ തുടങ്ങിയ പദവികളും വഹിച്ചു.

1949-ല്‍ ഇംഗ്ലണ്ടിനെതിരേ നടന്ന മാഞ്ചസ്റ്റര്‍ ടെസ്റ്റിലാണ് റീഡിന്റെ അരങ്ങേറ്റം. 1963-ല്‍ ഇംഗ്ലണ്ടിനെതിരെ ക്രൈസ്റ്റ് ചര്‍ച്ചില്‍ നടന്ന ടെസ്റ്റില്‍ ന്യൂസിലന്‍ഡിന്റെ രണ്ടാം ഇന്നിങ്സില്‍ റീഡ് 100 റണ്ണെടുത്തു. ന്യൂസിലന്‍ഡ് ആ മല്‍സരത്തില്‍ 159 റണ്ണിന് ഓള്‍ഔട്ടായെന്നത് ചരിത്രം. സെഞ്ചുറി പിറന്ന മത്സരങ്ങളിലെ ഏറ്റവും കുറഞ്ഞ സ്‌കോറെന്ന റെക്കോഡ് ഇപ്പോഴും ആ ടെസ്റ്റിനു സ്വന്തമാണ്.

റീഡ് നായകനായിരിക്കേയാണ് ന്യൂസിലന്‍ഡ് അവരുടെ കന്നി ടെസ്റ്റ് ജയം കുറിച്ചത്. വെസ്റ്റിന്‍ഡീസിനെയാണ് അവര്‍ ആദ്യമായി തോല്‍പ്പിക്കുന്നത്. ഫസ്റ്റ് ക്ലാസ് ഇന്നിങ്സില്‍ ഏറ്റവും കൂടുതല്‍ സിക്സറുകളെന്ന റെക്കോഡ് ഏറെനാള്‍ റീഡിന്റെ പേരിലായിരുന്നു. നോര്‍ത്തേണ്‍ ഡിസ്ട്രിക്ടിനു വേണ്ടി കളിച്ച മത്സരത്തില്‍ 15 സിക്സറും 35 ഫോറുമടക്കം 296 റണ്ണെടുക്കാന്‍ റീഡിനായി. മൂന്ന് ദശാബ്ദങ്ങള്‍ക്കു ശേഷം ആന്‍ഡ്രൂ സൈമണ്ട്സാണ് ഈ റെക്കോഡ് തകര്‍ത്തത്.

1965-ല്‍ വിരമിക്കുമ്പോള്‍ 58 ടെസ്റ്റുകളിലായി ആറ് സെഞ്ചുറികളടക്കം 3428 റണ്‍ സ്വന്തമാക്കിയിരുന്നു.