ദുബായ് രാജ്യാന്തര സ്റ്റേഡിയത്തില്‍ നടന്ന തണുപ്പന്‍ പോരാട്ടത്തില്‍ വിരാട് കോലി നയിക്കുന്ന റോയല്‍ ചാലഞ്ചേഴ്‌സ് ബാംഗ്ലൂരിനെ ചെന്നൈ എട്ടു വിക്കറ്റിന് തോല്‍പ്പിച്ചു. ബാംഗ്ലൂര്‍ ഉയര്‍ത്തിയ 146 റണ്‍സ് വിജയലക്ഷ്യം പിന്തുടര്‍ന്ന ചെന്നൈ, എട്ടു പന്തുകളും എട്ടു വിക്കറ്റും ബാക്കിനിര്‍ത്തിയാണ് ലക്ഷ്യത്തിലെത്തിയത്. സീസണിലെ അഞ്ചാമത്തെ തോല്‍വി വഴങ്ങിയെങ്കിലും 11 കളികളില്‍നിന്ന് 14 പോയിന്റുമായി ബാംഗ്ലൂര്‍ മൂന്നാം സ്ഥാനം നിലനിര്‍ത്തി.

കന്നി ഐപിഎല്‍ അര്‍ധസെഞ്ചുറി കണ്ടെത്തിയ യുവതാരം ഋതുരാജ് ഗെയ്ക്വാദ് ടീമിന്റെ വിജയശില്‍പിയായി. ബാംഗ്ലൂര്‍ ഉയര്‍ത്തിയ 146 റണ്‍സ് വിജയലക്ഷ്യത്തിലേക്ക് ബാറ്റെടുത്ത ചെന്നൈ ഓപ്പണര്‍മാരായ ഋതുരാജ് ഗെയ്ക്വാദും ഫാഫ് ഡുപ്ലെസിയും കരുതലോടെയാണ് തുടങ്ങിയത്. ആറാം ഓവറിലെ ആദ്യ പന്തില്‍ത്തന്നെ ഫാഫ് ഡുപ്ലേസിയെ പുറത്താക്കി ക്രിസ് മോറിസാണ് ബാംഗ്ലൂരിന് ബ്രേക്ക് ത്രൂ സമ്മാനിച്ചത്. പിന്നീട് ഒത്തുചേര്‍ന്ന ഗെയ്ക്വാദ് - അമ്പാട്ടി റായുഡു സഖ്യം കരുതലോടെ ചെന്നൈയെ മുന്നോട്ടുനയിച്ചു. 12-ാം ഓവറിലാണ് ചെന്നൈ 100 പിന്നിട്ടത്. സ്‌കോര്‍ 113-ല്‍ നില്‍ക്കെ റായുഡു മടങ്ങി. രണ്ടാം വിക്കറ്റില്‍ ഗെയക്വാദ് - റായുഡു സഖ്യം കൂട്ടിച്ചേര്‍ത്തത് 67 റണ്‍സ്. 44 പന്തില്‍നിന്നാണ് ഇരുവരും 67 റണ്‍സ് നേടിയത്. ഇതിനിടെ സകല വിമര്‍ശനങ്ങളുടെയും മുനയൊടിച്ച് ഗെയ്ക്വാദ് അര്‍ധസെഞ്ചുറി പൂര്‍ത്തിയാക്കി. ഒടുവില്‍ ധോണിക്കൊപ്പം പിരിയാത്ത മൂന്നാം വിക്കറ്റില്‍ 37 റണ്‍സ് കൂട്ടിച്ചേര്‍ത്ത് ഋതുരാജ് തന്നെ ടീമിനെ വിജയത്തിലെത്തിച്ചു. ക്രിസ് മോറിസ് എറിഞ്ഞ 19-ാം ഓവറില്‍ ഫോറും സിക്‌സും നേടിയാണ് ഋതുരാജ് വിജയം കുറിച്ചത്.

നേരത്തെ, ടോസ് നേടി ബാറ്റിങ് തിരഞ്ഞെടുത്ത ബാംഗ്ലൂര്‍, നിശ്ചിത 20 ഓവറില്‍ ആറു വിക്കറ്റ് നഷ്ടത്തിലാണ് 145 റണ്‍സെടുത്തത്. മൂന്നാം വിക്കറ്റില്‍ അര്‍ധസെഞ്ചുറി കൂട്ടുകെട്ട് തീര്‍ത്ത വിരാട് കോലി - എ.ബി.ഡിവില്ലിയേഴ്‌സ് സഖ്യമാണ് ബാംഗ്ലൂരിന് ഭേദപ്പെട്ട സ്‌കോര്‍ സമ്മാനിച്ചത്. ദേവ്ദത്ത് പടിക്കല്‍ (21 പന്തില്‍ 22), ആരോണ്‍ ഫിഞ്ച് (11 പന്തില്‍ 15), മോയിന്‍ അലി (ഒന്ന്), ക്രിസ് മോറിസ് (2) എന്നിങ്ങനെയാണ് പുറത്തായ മറ്റു താരങ്ങളുടെ പ്രകടനം. ഗുര്‍കീരത് മാന്‍ (2), വാഷിങ്ടന്‍ സുന്ദര്‍ (5) എന്നിവര്‍ പുറത്താകാതെ നിന്നു. ചെന്നൈയ്ക്കായി സാം കറന്‍ മൂന്ന് ഓവറില്‍ 19 റണ്‍സ് വഴങ്ങി മൂന്നു വിക്കറ്റെടുത്തു. ദീപക് ചാഹര്‍ നാല് ഓവറില്‍ 31 റണ്‍സ് വഴങ്ങി റണ്ടു വിക്കറ്റും സ്വന്തമാക്കി.

അബുദാബി ഷെയ്ഖ് സായിദ് സ്റ്റേഡിയത്തില്‍ നടന്ന രണ്ടാമത്തെ മല്‍സരത്തില്‍ രാജസ്ഥാന്‍ റോയല്‍സിന്, മുംബൈ ഇന്ത്യന്‍സിനെതിരെ തകര്‍പ്പന്‍ വിജയം. 196 റണ്‍സിന്റെ കൂറ്റന്‍ വിജയലക്ഷ്യമുയര്‍ത്തി വെല്ലുവിളിച്ച മുംബൈ ഇന്ത്യന്‍സിനെതിരെ നിര്‍ണായക ഘട്ടത്തില്‍ തകര്‍പ്പന്‍ ഫോമിലേക്കുയര്‍ന്ന സൂപ്പര്‍താരം ബെന്‍ സ്റ്റോക്‌സിന്റെ ഐതിഹാസിക സെഞ്ചുറിയും സ്റ്റോക്‌സിന്റെ പോരാട്ടത്തിന് അതേ മികവോടെ തകര്‍പ്പന്‍ അര്‍ധസെഞ്ചുറിയുമായി കൂട്ടുനിന്ന മലയാളി താരം സഞ്ജു സാംസണിന്റെ പോരാട്ടവീര്യവുമാണ് രാജസ്ഥാനെ വിജയത്തിലെത്തിച്ചത്. രാജസ്ഥാന്റെ വിജയത്തോടെ ചെന്നൈ സൂപ്പര്‍ കിങ്‌സ് ഈ സീസണില്‍ പ്ലേ ഓഫ് കാണാതെ പുറത്താകുന്ന ആദ്യ ടീമായി.

മുംബൈ ഉയര്‍ത്തിയ 196 റണ്‍സ് വിജയലക്ഷ്യം 10 പന്തുകള്‍ ബാക്കിനില്‍ക്കെ രണ്ടു വിക്കറ്റ് മാത്രം നഷ്ടത്തിലാണ് രാജസ്ഥാന്‍ മറികടന്നത്. 44 റണ്‍സിനിടെ രണ്ടു വിക്കറ്റ് നഷ്ടമാക്കി രാജസ്ഥാന്‍ തകര്‍ച്ചയിലേക്ക് നീങ്ങുമ്പോള്‍ ക്രീസില്‍ ഒന്നിച്ച സ്റ്റോക്‌സ് - സഞ്ജു സഖ്യം, പിരിയാത്ത മൂന്നാം വിക്കറ്റില്‍ 152 റണ്‍സ് അടിച്ചുകൂട്ടിയാണ് രാജസ്ഥാനെ വിജയത്തിലെത്തിച്ചത്. ജയിംസ് പാറ്റിന്‍സന്‍ എറിഞ്ഞ 19-ാം ഓവറിലെ ആദ്യ പന്തില്‍ സിക്‌സടിച്ച് സെഞ്ചുറി പൂര്‍ത്തിയാക്കിയ സ്റ്റോക്‌സ്, തൊട്ടടുത്ത പന്തില്‍ ഫോര്‍ നേടി വിജയറണ്ണും കുറിച്ചു.

വിജയത്തോടെ 12 കളികളില്‍നിന്ന് 10 പോയിന്റുമായി രാജസ്ഥാന്‍ ആറാം സ്ഥാനത്തേക്ക് കയറി. 11 കളികളില്‍നിന്ന് 14 പോയിന്റുമായി മുംബൈ ഒന്നാം സ്ഥാനത്ത് തുടരുന്നു. 12 കളികളില്‍നിന്ന് എട്ടു പോയിന്റുള്ള ചെന്നൈ സൂപ്പര്‍ കിങ്‌സ് പുറത്താവുകയും ചെയ്തു.

ടോസ് നേടി ബാറ്റിങ് തിരഞ്ഞെടുത്ത മുംബൈ നിശ്ചിത 20 ഓവറില്‍ അഞ്ച് വിക്കറ്റ് നഷ്ടത്തിലാണ് 195 റണ്‍സെടുത്തത്. ഈ സീസണിലെ മൂന്നാമത്തെ വേഗമേറിയ അര്‍ധസെഞ്ചുറി കുറിച്ച പാണ്ഡ്യ 21 പന്തില്‍ രണ്ടു ഫോറും ഏഴു സിക്‌സും സഹിതം 60 റണ്‍സുമായി പുറത്താകാതെ നിന്നു. അങ്കിത് രാജ്പുത്ത് എറിഞ്ഞ 18ാം ഓവറില്‍ നാലു പടുകൂറ്റന്‍ സിക്‌സറുകള്‍ സഹിതം 27 റണ്‍സടിച്ച പാണ്ഡ്യ, കാര്‍ത്തിക് ത്യാഗി എറിഞ്ഞ അവസാന ഓവറില്‍ മൂന്നു സിക്‌സും രണ്ടു ഫോറും സഹിതം അടിച്ചെടുത്തത് വീണ്ടും 27 റണ്‍സ്! അഞ്ചാം വിക്കറ്റില്‍ സൗരഭ് തിവാരിയെ കൂട്ടുപിടിച്ച് വെറും 31 പന്തില്‍നിന്ന് പാണ്ഡ്യ കൂട്ടിച്ചേര്‍ത്തത് 64 റണ്‍സാണ്. ആറാം വിക്കറ്റില്‍ സഹോദരന്‍ ക്രുനാലിനൊപ്പം വെറും 11 പന്തില്‍നിന്ന് 30 റണ്‍സും അടിച്ചെടുത്തു. ഇതില്‍ ക്രുനാലിന്റെ സംഭാവന മൂന്നു റണ്‍സ് മാത്രം! അബുദാബി ഷെയ്ഖ് സായിദ് സ്റ്റേഡിയത്തില്‍ ഈ സീസണില്‍ പിറക്കുന്ന ഉയര്‍ന്ന സ്‌കോറാണ് മുംബൈയുടേത്.

രാജസ്ഥാനായി ജോഫ്ര ആര്‍ച്ചര്‍ നാല് ഓവറില്‍ 31 റണ്‍സ് വഴങ്ങിയും ശ്രേയസ് ഗോപാല്‍ നാല് ഓവറില്‍ 30 റണ്‍സ് വഴങ്ങിയും രണ്ടു വിക്കറ്റ് വീതം വീഴ്ത്തി. ഒരു ഓവറില്‍ നാല് സിക്‌സ് സഹിതം അങ്കിത് രാജ്പുത്ത് നാല് ഓവറില്‍ 60 റണ്‍സ് വഴങ്ങി.