ഐ.പി.എല് 13-ാം സീസണില് ഇന്ന് കിരീടപ്പോരാട്ടം
ഐ.പി.എല് 13-ാം സീസണില് ഇന്ന് കരുത്തരായ മുംബൈ ഇന്ത്യന്സും ഡല്ഹി ക്യാപ്പിറ്റന്സും കലാശപ്പോരില് കൊമ്പുകോര്ക്കും. യുവതാരം ശ്രേയസ് അയ്യരുടെ ക്യാപ്റ്റന്സിയിലിറങ്ങുന്ന ഡല്ഹിക്ക് ഇതു കന്നി ഫൈനല്. ദുബായ് ഇന്റര്നാഷണല് സ്റ്റേഡിയത്തില് രാത്രി 7.30-നാണ് മത്സരം.
ഗ്യാലറികളില് ആവേശത്തിര തീര്ത്തിരുന്ന കാണികള്, ചിയര് ഗേള്സ് എന്നിങ്ങനെ ഇന്ത്യയുടെ സ്വന്തം ചെറുപൂരത്തിന്റെ പതിവുകാഴ്ചകള് കോവിഡ് വ്യാപനത്തിന്റെ പശ്ചാത്തലത്തില് കളത്തിനു പുറത്തായിരുന്നെങ്കിലും യു.എ.ഇയിലേക്ക് പറിച്ചുനട്ട ടൂര്ണമെന്റിന് ആവേശം ഒട്ടും കുറവായിരുന്നില്ല. വെല്ലുവിളികള് നിറഞ്ഞ ടൂര്ണമെന്റിന്റെ വിജയകരമായ പര്യവസാനം ബി.സി.സി.ഐയുടെ കൂടി വിജയമായാണ് വിലയിരുത്തപ്പെടുന്നത്.
മുംബൈ ഇതിനുമുമ്പ് നാലുവട്ടമാണ് ഐ.പി.എല്. കിരീടത്തില് മുത്തമിട്ടത്. 2013-ല് ആദ്യം കിരീടമുയര്ത്തിയ അവര് പിന്നീട് 2015, 2017, 2019 വര്ഷങ്ങളില് ജേതാക്കളായി. 2010-ല് റണ്ണറപ്പുമായി. ഡല്ഹിക്കാകട്ടെ ഇതു കന്നിക്കലാശപ്പോരും. ഇതിനുമുമ്പ് ഇരുടീമുകളും ഏറ്റുമുട്ടിയ അഞ്ചു മത്സരങ്ങളില് നാലിലും ജയം മുംബൈക്കായിരുന്നു. കഴിഞ്ഞവര്ഷം മാര്ച്ചിലാണ് ഡല്ഹി അവസാനം മുംബൈയെ കീഴടക്കിയത്. ആദ്യ ക്വാളിഫയറില് 57 റണ്ണിനായിരുന്നു ഡല്ഹിക്കെതിരേ മുംബൈ ജയിച്ചു കയറിയത്.
മുംബൈയുടെ ബാറ്റിങ് നിര ഏതു ബൗളിങ് യൂണിറ്റിന്റെയും ഉറക്കം കെടുത്തും. ക്വിന്റണ് ഡികോക്ക്, ഇഷാന് കിഷന്, സൂര്യകുമാര് യാദവ് എന്നിവര് തകര്പ്പന് ഫോമിലാണ്. മധ്യനിരയില് പാണ്ഡ്യ സഹോദരങ്ങളും വെസ്റ്റിന്ത്യന് കരുത്തന് കെയ്റണ് പൊള്ളാര്ഡ് എന്നിവരുടെ സാന്നിധ്യം ടീമിനെ സമതുലിതമാക്കുന്നു. ജസ്പ്രീത് ബുംറയും ട്രെന്റ് ബോള്ട്ടും ഉള്പ്പെടുന്ന പേസ് ദ്വയത്തിന്റെ മൂര്ച്ച എതിരാളികള് മുമ്പേയറിഞ്ഞതാണ്. രാഹുല് ചാഹറിന്റെ സ്പിന്നും വെല്ലുവിളിതീര്ക്കും. ട്രെന്റ് ബോള്ട്ടിന്റെ പരുക്കാണ് മുംബൈ ക്യാമ്പിനെ അലോസരപ്പെടുത്തുന്ന പ്രധാനഘടകം. ആദ്യ ക്വാളിഫയറില് പരുക്കു വലച്ചതോടെ പവലിയനിലേക്കു മടങ്ങിയ ബോള്ട്ട് പിന്നീടു കളത്തിലിറങ്ങിയില്ല.
കിട്ടാക്കനിയായ കിരീടം ഇത്തവണ ഷെല്ഫിലെത്തിക്കുകയെന്ന ദൗത്യമാണ് ശ്രേയസ് അയ്യര്ക്കും സംഘത്തിനുമുള്ളത്. ഏഴു വര്ഷത്തിനുശേഷം കഴിഞ്ഞതവണ പ്ലേ ഓഫ് യോഗ്യത നേടി. സണ് റൈസേഴ്സിനെതിരായ ആദ്യ പ്ലേ ഓഫ് ജയിച്ചെങ്കിലും ചെന്നൈ സൂപ്പര് കിങ്സിനെതിരേ രണ്ടാം ക്വാളിഫയറില് ആറു വിക്കറ്റിനു തോല്ക്കുകയായിരുന്നു. ഐ.പി.എല്ലിലെ ഏറ്റവും മികച്ച പ്രകടനവുമായി അന്നു മടങ്ങിയെങ്കിലും ഇത്തവണ ഒരുപടികൂടിക്കടന്ന് ഫൈനലിലേക്കു മുന്നേറാന് ടീമിനായി. ഇനി ഒറ്റലക്ഷ്യം; കിരീടം.
ഡല്ഹിയുടെ ആത്മവിശ്വാസം ഉയര്ത്തുന്നതാണ് സണ്റൈസേഴ്സിനെതിരായ കഴിഞ്ഞ മത്സരം. കഴിഞ്ഞ കളിയിലെ ടീമിനെ ഡല്ഹി അതേപടി നിലനിര്ത്തുമോയെന്നാണ് എല്ലാവരും ഉറ്റുനോക്കുന്നത്. ഋഷഭ് പന്ത്, അജിന്ക്യ രഹാനെ, ഷിംറോണ് ഹെറ്റ്മെയര് എന്നിവര്ക്കൊപ്പം ക്യാപ്റ്റനും ചേരുന്നതായിരുന്നു ഹൈദരാബാദിനെതിരായ ബാറ്റിങ്നിര. സ്പിന്നര് അക്സര് പട്ടേലിന്റെയും സ്റ്റോയ്നിസിന്റെയും ഓള്റൗണ്ട് മികവും ടീമിനു പ്രതീക്ഷപകരുന്നു. വിക്കറ്റ് വേട്ടയില് ടൂര്ണമെന്റില്ത്തന്നെ മുന്നിലുള്ള കഗീസോ റബാഡയ്ക്കൊപ്പം ആന്റിക് നോക്കിയ കൂടി ചേരുന്ന പേസ് ബാറ്ററി കിരീട സ്വപ്നങ്ങള്ക്കു നിറംപകരുന്നൂ.
https://www.facebook.com/Malayalivartha
