ഐപിഎൽ ഇനി ഈ വർഷം നടത്താൻ സാധിക്കുമോയെന്നാണ് ക്രിക്കറ്റ് ലോകത്ത് നടക്കുന്ന പുതിയ ചർച്ച. കൊവിഡ് വ്യാപനം  കാരണം ലീഗ് പാതി വഴിയിൽ നിർത്തി വച്ചിരിക്കുകയാണ്. 29 മത്സരങ്ങളാണ് ഈ സീസണിൽ ഇത് വരെ നടന്നത്. ഇനിയും 31 മത്സരങ്ങൾ നടക്കാനുണ്ട്.

ഈ വർഷം തന്നെ ബാക്കി മത്സരങ്ങൾ നടത്താനാവുമോയെന്ന് ആലോചിക്കുകയാണ് ബിസിസിഐ. സെപ്തംബറിൽ ബാക്കി മത്സരങ്ങൾ നടത്താനാവുമോയെന്നാണ് ഇപ്പോൾ ചിന്തിക്കുന്നതെന്ന് ഐപിഎൽ ചെയർമാൻ ബ്രിജേഷ് പട്ടേൽ പറഞ്ഞു. ഐസിസിയോടും മറ്റ് ബോർഡുകളോടും ഇക്കാര്യത്തിൽ ചർച്ചകൾ നടത്തേണ്ടതുണ്ടെന്നും അദ്ദേഹം വ്യക്തമാക്കി.

സെപ്തംബറിൽ നടത്താനായിൽ ടി20 ലോകകപ്പിനുള്ള തയ്യാറെടുപ്പുകൾക്കും അത് ഗുണം ചെയ്യും. ഒക്ടോബർ 18 മുതൽ നവംബർ 15 വരെയാണ് ലോകകപ്പ് മത്സരങ്ങൾ നടത്താൻ ഉദ്ദേശിക്കുന്നത്. ഇനി ഇന്ത്യയിൽ തന്നെ നടത്താനുള്ള സാധ്യത വളരെ കുറവാണ്. കഴിഞ്ഞ വർഷം നടത്തിയത് പോലെ യുഎഇയിൽ ലീഗ് നടത്തിയേക്കും.

എന്നാൽ സെപ്തംബറിൽ ഐപിഎൽ നടത്തിപ്പിന് അനുമതി ലഭിച്ചാലും കാര്യങ്ങൾ എളുപ്പമാവില്ല. ഇംഗ്ലണ്ടിനെതിരായ ഇന്ത്യയുടെ ടെസ്റ്റ് പരമ്പര അവസാനിക്കാൻ സെപ്തംബർ പകുതിയാവും. ലോകകപ്പിന് മുമ്പ് പിന്നീട് കഷ്ടിച്ച് ഒരു മാസം മാത്രമേ ലഭിക്കുകയുള്ളൂ. ഏതായാലും ലീഗ് നടത്തിപ്പിനായുള്ള വഴികൾ തേടുകയാണ് ബിസിസിഐ.