കൊവിഡ് വ്യാപനം; ഐപിഎല് മാറ്റിവെച്ച തീരുമാനത്തെ പിന്തുണച്ച് മുംബൈ ഇന്ത്യന്സ് താരങ്ങള് രംഗത്ത്, സോഷ്യൽ മീഡിയയിൽ വൈറലായി വീഡിയോ
ഇന്ത്യയില് കൊവിഡ് പ്രതിസന്ധി രൂക്ഷമാകുകയും ഐപിഎല് താരങ്ങളില് ചിലരെ കൊവിഡ് ബാധിക്കുകയും ചെയ്ത സാഹചര്യത്തില് കഴിഞ്ഞ ദിവസം ഇന്ത്യന് പ്രീമിയര് ലീഗിന്റെ പതിനാലാം സീസണ് മാറ്റിവച്ചിരുന്നു.
ഇപ്പോഴിതാ ഐപിഎല് മാറ്റിവെച്ച ബി സി സി ഐയുടെ തീരുമാനത്തെ പിന്തുണച്ച് രംഗത്തെത്തിയിരിക്കുകയാണ് മുംബൈ ഇന്ത്യന്റെ നായകന് രോഹിത് ശര്മയുള്പ്പെടെയുള്ള താരങ്ങള്. ഇന്നലെ മുംബൈ ഇന്ത്യന്സ് തങ്ങളുടെ ഔദ്യോഗിക പേജിലൂടെയാണ് ഈ തീരുമാനത്തെ താരങ്ങള് പിന്തുണയ്ക്കുന്ന വീഡിയോ പങ്കുവെച്ചത്.
"മത്സരങ്ങള് മാറ്റിവെച്ചത് വളരെ നിര്ഭാഗ്യകരമാണ്. എന്നാല് കൊവിഡില് വലയുന്ന നമ്മുടെ രാജ്യത്തിന്റെ ഇപ്പോഴത്തെ അവസ്ഥ വളരെ മോശമായതിനാല് മത്സരങ്ങള് മാറ്റിവച്ചത് വളരെ നല്ല തീരുമാനമാണ്" എന്ന് മുംബൈ നായകന് രോഹിത് ശര്മ്മ പറഞ്ഞു.
"ടൂര്ണമെന്റ് പകുതി വഴിയില് നിന്നത് വളരെ നിര്ഭാഗ്യകരമാണ്. എന്നാല് എല്ലാവരുടെയും സുരക്ഷ മുന്നിര്ത്തി മത്സരങ്ങള് മാറ്റിയത് നല്ല തീരുമാനമാണെന്ന് " ജസ്പ്രീത് ബുംറയും അഭിപ്രായപ്പെട്ടു.
ഇവരെ കൂടാതെ മുംബൈ താരങ്ങളായ ജയന്ത് യാദവ്, ആദം മില്നെ, ബൗളിംഗ് കോച്ച് ഷെയിന് ബോണ്ട്, ഫീല്ഡിങ് കോച്ച് ജെയിംസ് പാമെന്റ് തുടങ്ങിയവരും തീരുമാനത്തെ പിന്തുണച്ചു. കൂടാതെ ഈ സാഹചര്യത്തില് എല്ലാവരും സുരക്ഷിതരായി വീടുകളില് കഴിയണമെന്നും താരങ്ങള് അഭ്യര്ത്ഥിച്ചു.
അതേസമയം, കൊവിഡ് ബാധയെ തുടര്ന്ന് ഐ.പി.എല് സീസണ് പാതി വഴിയില് നിര്ത്തിയതോടെ സ്വന്തം താരങ്ങളെ ചാര്ട്ടര് വിമാനങ്ങളില് നാട്ടിലെത്തിക്കുമെന്ന തീരുമാനവുമായി മുംബൈ ഇന്ത്യന്സ് ഉടമകളായ റിലയന്സ് രംഗത്തെത്തി. മറ്റു ടീമുകളിലെ താരങ്ങള്ക്കും ഈ വിമാനങ്ങളില് നാട്ടിൽ പോകാമെന്നും റിലയന്സ് അറിയിച്ചു.
https://www.facebook.com/Malayalivartha